Tingim Ol Narapela Taim Yupela i Mekim Ol Samting
1 “Ol lain bilong yupela i stap amamas tru; ol i save mekim gutpela pasin na daun long ol narapela.” Dispela em i tok bilong wanpela lain (convention and visitors bureau) bilong wanpela taun em kibung i bin kamap long en long Amerika. Kain tok olsem long gutpela pasin yumi mekim long ai bilong ol man em i save mekim gut bel bilong yumi. Dispela i kamapim olsem yumi ‘givim bel long God na long ol man, na long dispela pasin yumi mekim olgeta samting yumi save mekim.’ (1 Ko 16:14) Yumi nolaik tru long mekim sampela pasin em bai bagarapim gutpela nem bilong lain bilong God.
2 Yumi Gat Wok Long Lukautim Ples Slip Yumi Kisim: Long olgeta yia planti lain brata sista i save go longwe tru bilong i go long wanpela kibung. Ol brata sista i laik bai Dipatmen Bilong Rum Slip i ken painim ples slip bilong ol, ol i mas hariap toksave long dispela dipatmen. Dispela dipatmen bai salim wanpela pepa bilong askim long rum slip long olgeta wan wan kongrigesen na grup i stap longwe em ol bai kam long dispela kibung na bai ol i ken raitim nem bilong ol. Kuskus bilong kongrigesen o brata i lukautim grup bai skelim gut husat ol pablisa i sot long rum slip. Em i mas skelim na raitim tasol nem bilong ol pablisa tru tru na ol Baibel-stadi i wok long kamap strong. Taim ol brata i laik kisim wanpela haus slip bilong skul o ol narapela haus bilong putim ol brata sista, oltaim ol i save toktok gut wantaim ol lain i lukautim dispela haus bambai ol i ken painim rum slip i gat pe i daunbilo na bai dispela i ken helpim ol pablisa. Dispela ples slip em i no bilong helpim ol wanblut i no brata sista em ol i laik kisim rum slip i no gat bikpela pe tumas long en. Taim ol pablisa i givim nem bilong ol long kuskus bilong kongrigesen, ol i mas tingim olsem ol bai baim rum slip inap stret olsem pe ol i bin makim. Na tu, em i bikpela samting long wok gut wantaim ol lain i bosim dispela haus na bihainim tok bilong ol long mekim gut wok long hap ples bilong kukim kaikai, rum waswas, na toilet samting.
3 Bihainim Gutpela Pasin Long Ples Slip Bilong Yu: Planti taim ol wokman bilong ol ples slip i save amamas long ol Witnes Bilong Jehova i bihainim stretpela pasin, na mekim gutpela pasin, na ol i klinim gut ples. Wanpela maneja i stori long wanpela famili i bin stap long hotel bilong em na i tok olsem: “Ol pikinini bilong ol Witnes Bilong Jehova i gutpela pikinini tru, winim olgeta narapela pikinini mi bin bungim! Ol i save bilas gut tru olsem ol gutpela pikinini man na pikinini meri, na ol i gat gutpela pasin, na ol i save mekim gutpela pasin long ol man, na ol i no bikhet. Mipela i laik tok amamas long yupela i gat ol gutpela pikinini. Mipela i amamas long ol pikinini bilong yupela i bin stap long hia.” Ol kain tok olsem i gutpela tru, long wanem, ol man i wok wantaim yumi ol inap lukim pasin bilong lain bilong Jehova long laikim tru ol narapela na tingim gut ol.
4 Yumi mas strong tru long wok gut wantaim ol bosman bilong ol ples slip na bihainim ol lo ol i putim bilong kukim kaikai, mekim wok long ol rum waswas, na toilet. Yumi no laik mekim ol samting i nogutim nem bilong ol manmeri bilong Jehova. Yumi Kristen, olsem na yumi mas mekim stretpela pasin long olgeta taim. Sapos yumi slip long haus bilong wanpela brata yumi mas mekim wankain pasin, yumi no ken ting em haus bilong brata na yumi mekim nabaut. Yumi amamas long gutpela pasin ol i mekim long yumi na dispela i mas kirapim yumi na yumi mas redi long helpim ol long baim kaikai na ol narapela samting ol i givim long yumi. Yumi no ken kisim ol sit bet o blanket o ol narapela samting bilong dispela haus slip, dispela em pasin stil. Na taim yumi askim long kisim ples slip, yumi no ken giaman, yumi mas tokaut stret long hamas man o meri bai stap long dispela rum.
5 Mekim Gutpela Pasin Long Olgeta Man: Pasin bilong laikim tru Jehova na ol man i sindaun klostu long yumi i mas kirapim yumi long mekim gutpela na stretpela pasin ol narapela i ken bihainim. (Mt 22:37-39; Je 3:13) Baibel i tok yumi mas laikim ol narapela manmeri na tingim ol. (Ga 6:10) Yumi mas bihainim dispela lo long wanem wanem hap yumi stap long en, maski yumi stap long haus bilong wanpela famili Kristen, long Haus Kingdom, long haus slip bilong skul, o long hotel.