“Olgeta Taim Yupela i Mas Strong Long Mekim Gutpela Pasin”
1 Bilong bihainim pasin Kristen, ‘olgeta taim yumi mas strong long mekim gutpela pasin long olgeta manmeri.’ (1 Te. 5:15) Taim yumi go long ol kibung distrik, yumi gat planti rot long mekim gutpela pasin long ol narapela. Long kain taim olsem, yumi stap long ai bilong ol man bilong ausait na ol bai kisim tingting long yumi—olsem yumi wanem kain lain—long pasin yumi mekim long ol. Bilong holimpas gutpela nem ol Witnes Bilong Jehova i bin kisim, yumi mas soim olsem yumi save “mekim gutpela pasin long olgeta man.” (1 Pi. 2:17) Olsem na yumi ‘no ken lukautim ol samting bilong yumi yet tasol, nogat; yumi mas lukautim ol samting bilong ol arapela na helpim ol long i stap gut.’ (Fl. 2:4) Tingim olsem wanem yumi ken bihainim dispela tok taim yumi kisim rum slip long kibung.
2 Olsem wanem? Yu stretim rot pinis bilong kisim rum slip? I gat sampela samting yumi mas tingim na bai yumi ken wok gut wantaim Dipatmen Bilong Rum Slip. (1) Toksave long kuskus bilong kongrigesen na em bai toksave long Dipatmen Bilong Rum Slip long yu laik kisim rum slip. Taim kuskus i kisim pinis ol pepa long Dipatmen Bilong Rum Slip, em i mas putim nem bilong yu long pepa na salim i go bek kwiktaim. (2) Taim yu putim nem pinis bilong kisim rum slip, no ken putim nem bilong kisim rum slip long narapela hap tu. Sapos planti bilong yumi i senisim tingting, dispela inap mekim na ol brata i mas givim sampela mani moa bilong inapim pe bilong ol rum slip. (3) Taim yumi lusim rum slip, rum i mas klin na ol samting i mas stap stret. (4) Bihainim lo bilong rum slip yu kisim.
3 Lainim Ol Pikinini Long Mekim Gutpela Pasin: Sampela taim hevi i bin kamap, long wanem, ol papamama i no bin was long ol pikinini. (Snd. 29:15) Sampela papamama i bin insait long sampela wok na larim ol pikinini i pilai long ples slip o long ples kibung na ol i no bin was long ol. Sampela pikinini i bin mekim bikpela pairap na dispela i bin bagarapim sindaun bilong ol Witnes na ol man i no Witnes.
4 Yupela papamama, paslain long kibung i gutpela sapos yupela i stori wantaim ol pikinini long pasin Kristen em ol i mas bihainim long olgeta kain taim na ples. (Ef. 6:4) Tokim ol olsem, man i gat pasin sori tru em “i no save hambak na em i no save bikhet nabaut. Em i no save tingting tumas long em yet. Em i no save belhat kwik.” (1 Ko. 13:5) Ol man i bikpela pinis inap strongim dispela tok sapos ol yet i stap olsem gutpela piksa bilong ol narapela i ken lukim. Yupela ol pikinini, yupela i ken bihainim gutpela pasin long ol dispela rot: Bihainim tok bilong papamama, no ken mekim nabaut long ol samting long ples slip, tingim gut ol man yu stap namel long ol. (Kl. 3:20) Taim yumi wanbel long mekim gutpela pasin long ol narapela, yumi save ‘givim biknem long tok tru bilong God, em Man bilong kisim bek yumi.’—Ta. 2:10.
5 Gutpela pasin bilong yumi i save kirapim ol man long litimapim nem bilong yumi, na tu, em i save daunim pasin bilong sampela ol i toktok planti long yumi. Maski yumi stap long ples kibung o raun long taun dispela kibung i kamap long en o wokabaut long rot o go long stua o stap long haus kaikai o malolo long ples slip o autim tok, olgeta tok na pasin yumi mekim i mas kamapim klia olsem yumi gat laik long mekim gutpela pasin.
[Blok long pes 12]
Plis Tingim:
■ Long ples slip, stap isi na daun long ol narapela.
■ Bihainim ol lo bilong ples slip; dispela bai helpim olgeta.
■ Stap wantaim ol pikinini na was gut long ol.