Stap Holi Long Olgeta Pasin Bilong Yu
1 Yumi ol wokman bilong God holi, Jehova, olsem na yumi save wok strong long i stap holi long olgeta pasin na wokabaut bilong yumi. (1 Pi. 1:15, 16) Dispela i makim olsem, yumi save wok strong long bihainim ol lo bilong Jehova long olgeta samting long i stap bilong yumi. Kibung distrik bilong dispela yia bai givim rot long yumi long mekim ol samting i soim olsem yumi stap holi.
2 Long Ples Slip: Long las yia, maneja bilong wanpela hotel em sampela bratasista i bin stap long en long taim bilong kibung distrik em i tok: “Ol Witnes Bilong Jehova ol i gutpela lain tru i bin kam stap hia. . . . Mipela laikim ol kain manmeri olsem yupela i stap long hotel bilong mipela.” Bilong helpim yumi long holim yet gutpela nem olsem, yumi mas bihainim ol dispela tok: (1) Taim kongrigesen bilong yu i kisim ol fom long Dipatmen Bilong Rum Slip, kwiktaim yu mas toksave long kuskus sapos yu laikim ples slip. Makim hamas rum stret yu mas kisim, na no ken makim sampela rum moa em yu no gat wok long en, na no ken kalapim mak bilong hotel long hamas man i ken slip long wanpela rum. (2) Sapos yu mas rausim nem bilong yu long ples slip, orait kwiktaim yu mas toksave long Dipatmen Bilong Rum Slip. (3) Yu no ken kukim kaikai long ol rum i gat tambu long mekim. (4) Taim yu toktok wantaim ol wokman long ples slip bilong yu, bihainim ol gutpela pasin em spirit bilong God i save kamapim, na mekim moa yet long taim ol i wok long stretim ol samting bilong ol lain i kam bilong kisim rum na long taim bilong lusim dispela ples.—Ga. 5:22, 23.
3 Taim yumi mekim gutpela pasin long ol man, i olsem yumi autim tok long ol. Long las yia, wanpela yangpela Witnes i mekim gutpela pasin taim em i askim wanpela kuskus bilong hotel long hap pepa na pen samting bilong raitim pas, na bihain em i tok tenkyu long em. Kuskus i pilim tru gutpela pasin bilong Witnes, na em i tok: “Long nau yumi no inap lukim ol yangpela i mekim gutpela pasin olsem.” Tasol sampela taim ol papamama i no bosim ol pikinini taim ol i stap long ples slip. Ol papamama i no ken larim ol pikinini i pilai nabaut long laik bilong ol yet. Ol i mas bosim gut ol na bai pasin bilong ol i ken litimapim nem bilong Jehova.—Snd. 29:15.
4 Long Ol Haus Kaikai na Ol PMV: Wanpela man bilong tilim kaikai long haus kaikai klostu long ples kibung em i tok: “Ol Witnes i narapela kain. Ol i save rispek long ol man.” Bilong mekim gutpela pasin yumi no ken toktok bikmaus na lap strong, nogut dispela i bagarapim sindaun bilong ol narapela i sindaun na kaikai. Taim yumi kaikai na dring, yumi laik mekim olgeta samting bilong givim biknem long God. (1 Ko. 10:31) Long ol narapela taim tu, taim yumi kisim PMV o painim sia long bas, oltaim yumi mas kamapim ol gutpela pasin Kristen.
5 Long Kibung: Long ples kibung yumi mas kamapim moa yet gutpela pasin bilong yumi. Plis bihainim tok bilong ol atendan i wok long ples bilong putim ol ka na insait long haus kibung tu. (Hi. 13:17) Ol famili i mas sindaun wantaim, papamama i no ken larim ol pikinini bilong ol, na ol bikpela pikinini tu, i sindaun wantaim ol narapela yangpela. Long sampela taim, papamama i no was long ol pikinini na ol i bin pilai, bikmaus, na ron i go nabaut long hap bilong kibung, na ol i mekim olsem tu long taim bilong program. Plis ol papamama, yupela i mas was gut long ol pikinini bilong yupela. No ken skruim redio kaset samting long pawa bilong ples kibung o long masin bilong saun. Taim yu mekim wok long ol dispela samting, yu mas mekim tasol long pasin i no pulim ai o tingting bilong ol narapela. Sapos yu laik kisim piksa, no ken mekim wok long lait bilong kamera long taim ol tok bilong program i kamap. Yu mas stretim ol mobail fon samting pastaim na bai yu no pulim ai na tingting bilong ol narapela. Sapos yu lukim eksiden i kamap insait long ples kibung, no ken singautim ambiulens—plis toksave long wanpela atendan o Dipatmen Bilong Fest Eid.
6 Pasin bilong yumi i mekim na yumi stap narapela kain long ol narapela lain na em i givim biknem long God bilong yumi. (1 Pi. 2:12) Long kibung, pasin bilong yumi ol Witnes Bilong Jehova bai stap ples klia long ai bilong ol man. Olsem na yu mas tingting strong long i stap holi long olgeta pasin na wokabaut bilong yu.
[Askim Bilong Stadi]
1. Bilong wanem em i bikpela samting long yumi mas i stap holi long olgeta pasin bilong yumi?
2. Olsem wanem yumi ken mekim gutpela pasin long ples slip?
3. Ol yangpela Witnes i ken mekim wanem kain pasin na ol narapela i pilim tru?
4. Olsem wanem yumi ken soim olsem yumi tingim ol narapela man?
5. Bilong mekim gutpela pasin, yumi mas mekim wanem long ples kibung?
6. Olsem wanem pasin bilong yumi long kibung i ken givim biknem long God?
[Blok long pes 6]
Mekim Pasin i Holi
◼ Bihainim ol lo bilong ples slip
◼ Was gut long ol pikinini
◼ Tingim gut ol narapela