Stap Olsem Gutpela Piksa Long Pasin Bilong Yu
1 Taim planti Witnes i bung wantaim long ol kibung distrik, ol man inap luksave moa yet long ol samting yumi mekim na pasin yumi mekim long ol narapela. Olsem na yumi olgeta i mas tingim gut tok bilong Baibel: “Bosim gut pasin bilong [yu]. Long olgeta samting yu save mekim, yu yet yu mas mekim ol gutpela pasin tasol, bai ol man i ken lukim pasin bilong yu na bihainim.” (Ta. 2:6, 7) Yumi mas wok strong na bai ‘yumi no ken lukautim ol samting bilong yumi tasol. Nogat. Yumi wan wan i mas lukautim ol samting bilong ol arapela manmeri bilong yumi na helpim ol long i stap gut.’ (Fl. 2:4) Orait, nau yumi ken tingim long wanem ol samting yumi ken bihainim dispela tok long “Givim Biknem Long God” Kibung Distrik klostu i laik kamap.
2 Kisim Ples Slip: Wanpela gutpela rot bilong yumi long kamapim ol gutpela pasin em long taim yumi stretim ol samting bilong kisim ples slip. Plis tingim gut ol dispela samting: (1) Toksave long kuskus bilong kongrigesen na em bai toksave long Dipatmen Bilong Rum Slip long yu laik kisim rum slip. Taim kuskus i kisim pinis ol pepa long Dipatmen Bilong Rum Slip, em i mas putim nem bilong yu long pepa na salim i go bek kwiktaim. (2) Taim yu putim nem pinis bilong kisim rum slip, no ken putim nem bilong kisim rum slip long narapela hap tu. Sapos planti bilong yumi i senisim tingting, dispela inap mekim na ol brata i mas givim sampela mani moa bilong inapim pe bilong ol rum slip. (3) Taim yumi lusim rum slip, rum i mas klin na ol samting i mas stap stret. (4) Bihainim lo bilong rum slip yu kisim.
3 Yumi mas bihainim gutpela pasin long hap yumi slip long en. Yumi gat nem olsem lain bilong bihainim stretpela pasin. (Hi. 13:18) Olsem na yumi mas tokaut stret long hamas man bai slip long rum bilong yumi. Yumi no ken kukim kaikai long rum sapos ol i tambuim dispela. Sapos yumi slip long haus bilong wanpela brata yumi no ken ting em haus bilong brata tasol na yumi kisim nating ol samting. Yumi amamas long gutpela pasin ol i mekim, na dispela i mas kirapim yumi long helpim ol long baim kaikai na ol narapela samting ol i givim long yumi. Sapos yumi mekim olsem yumi inap “mekim gutpela pasin long ol arapela” na long dispela rot ol narapela inap lukim ol gutpela pasin bilong yumi.—Ga. 6:10.
4 Ol Papamama na Ol Pikinini: Long dispela taim we planti yangpela i no save bihainim gutpela pasin, ol pikinini bilong yumi i stap narapela kain, na dispela i litimapim nem bilong Jehova na oganaisesen bilong em. Tasol sampela taim hevi i bin kamap, long wanem, ol papamama i no bosim gut ol pikinini. (Snd. 29:15) Ol papamama i no ken larim ol pikinini bilong ol i raun nating long ples slip, o long ples kibung.
5 Sampela papamama i pilim olsem em i helpim gut ol sapos paslain long kibung ol i toktok gen wantaim ol pikinini long pasin ol i mas bihainim. (Ef. 6:4) Ol i helpim ol pikinini long save olsem man i gat pasin bilong laikim narapela em ‘i no save hambak na bikhet nabaut’ o ‘tingim tumas em yet.’ (1 Ko. 13:5) Kibung distrik em taim bilong larim Jehova i skulim yumi, na ol pikinini na ol bikpela man tu ol i ken soim olsem ol i daun long dispela samting long rot bilong pasin ol i mekim long ples kibung.—Ais. 54:13.
6 Gutpela pasin bilong yumi inap mekim planti samting bilong daunim tingting kranki bilong sampela man na helpim ol man long laikim lotu i tru. (Mt. 5:16; 1 Pi. 2:12) I gutpela sapos pasin bilong yumi na pasin yumi mekim long ol man yumi bungim long taim bilong kibung distrik i mekim gutpela wok bilong autim tok long ol. Long dispela rot yumi ken stap olsem gutpela piksa na givim biknem long Jehova.—Ta. 2:7.
[Askim Bilong Stadi]
1. Bilong wanem yumi mas was gut long pasin bilong yumi long kibung distrik?
2. Yumi mas tingim wanem ol samting taim yumi stretim rot bilong kisim rum slip?
3. Olsem wanem yumi inap “mekim gutpela pasin long ol arapela” long ples slip bilong yumi?
4, 5. Olsem wanem ol pikinini inap litimapim nem bilong Jehova? Ol papamama i gat wanem wok?
6. Gutpela pasin bilong yumi inap mekim wanem long ol narapela?
[Blok long pes 5]
Tingim Gut Ol Narapela
▪ Kisim tasol ol rum yu bai yusim
▪ Toksave hariap long Dipatmen Bilong Rum Slip
▪ Sapos yu slip long haus bilong wanpela brata, no ken kisim nating ol samting
▪ Lukautim gut ol pikinini bilong yu