¹ King Hesekia bilong Juda long bipo i mekim wok long ol man long kisim ol pas i go long ol manmeri bilong singautim ol i kam bung long Jerusalem. (2 Sto. 30:​6, 13) Pasin bilong ol manmeri i kamapim klia tingting bilong ol long lotu i tru. (2 Sto. 30:​10-12) Long Novemba na Disemba, ol wokman bilong Jehova long Papua Niugini bai i gat wankain rot long kamapim klia bel bilong ol olsem ol i amamas long bung wantaim long lotuim Jehova o nogat? Mipela i laik kirapim yu long stretim ol samting nau bambai yu ken i go long tripela de bilong “De Bilong Kisim Bek Yumi i Klostu” Kibung Distrik.

² Kirap Stretim Ol Samting Nau: Bilong yumi ken kisim gutpela helpim long kaikai bilong spirit ol i redim, yumi mas i stap bilong harim olgeta tok bilong program. I gutpela yu kirap nau na redim ol samting na bai yu na famili bilong yu i ken go long olgeta 3-pela de bilong kibung. (Snd. 21:⁠5) Planti bilong yupela i mas bungim mani bilong baim kaikai, ples slip, na rot bilong i go long kibung, na yupela i mas holim sampela mani bilong putim long kontribiusen bokis. Wok Kingdom bilong Epril 2005 pes 4 i gat sampela tok bilong helpim ol famili long wok gut wantaim long mekim ol samting bilong bungim mani bilong i go long kibung distrik. Ating sampela bilong yupela i ken makim hap gaden na ol kaikai i kamap long en, yupela i ken salim bilong kisim mani bilong baim rot bilong i go long kibung distrik. Bikpela samting em planti mun paslain long kibung, yu mas kirap bungim mani bilong i go long kibung distrik. Sampela bilong yupela i mas askim bos long kisim malolo. Na sampela i mas stretim tok wantaim poroman marit bilong ol husat i no stap long tok i tru. No ken wet inap long taim bilong kibung i klostu na yu mekim ol dispela samting. Nau yu mas beten long Jehova long ol dispela samting, na bilip tru olsem “em bai i helpim yu.”​—⁠Sng. 37:⁠5.

³ Taim wanpela liklik mangi i gat faipela krismas i stap long wanpela kibung distrik, em i tok: “Long ol samting bilong lotuim Jehova, mi save laikim moa yet kibung distrik.” Dispela tok i helpim yumi olgeta long pilim tru amamas yumi save kisim taim yumi go long kibung distrik i save kamap long olgeta yia. Olsem man bilong raitim song i tok: “Sapos mi stap wanpela de tasol long haus bilong yu, em i winim tru 1,000 de long narapela ples.” (Sng. 84:10) Long singsing Devit i kamapim laik bilong em long ‘i stap long haus bilong God inap olgeta de em i gat laip.’ (Sng. 27:⁠4) Devit i amamas tru long stap wantaim ol man i save lotuim Jehova. Yumi tu i mas bihainim pasin bilong em na go long 3-pela de bilong “De Bilong Kisim Bek Yumi i Klostu” Kibung Distrik.

[Askim Bilong Stadi]

1. Ol lain bilong God long bipo i kamapim amamas bilong ol long lotu i tru olsem wanem? Long nau yumi tu i gat rot bilong mekim wanem?

2. Bilong kibung i ken helpim tru yumi, nau yumi mas mekim wanem?

3. Yu save laikim wanem samting long kibung distrik i save kamap long olgeta yia? Yu mas tingting strong long mekim wanem?

[Box on page 7]

Det na Ples

Novemba 24-26, 2006

Port Moresby (Tok Inglis)

Disemba 1-3, 2006

Popondetta (Tok Pisin)

Kiunga (Tok Pisin)

Disemba 8-10, 2006

Port Moresby (Tok Pisin, tok ples Sain bilong ol yaupas)

Madang (Tok Pisin)

Agi (Tok Hiri Motu)

Disemba 15-17, 2006

Port Moresby (Tok Hiri Motu)

Rabaul (Tok Pisin)

Lae (Tok Pisin)