Yu Tingim Yet?

Yu bin tingim gut ol tok bilong ol nupela Wastaua? Sapos olsem, yu bai amamas long tingim ol tok i stap daunbilo:

◻ Olsem wanem planti marit long nau i bihainim gutpela pasin bilong Akwila na Prisila?

Akwila tupela Prisila i bin mekim wok long ol narapela narapela kongrigesen. Wankain olsem tupela, planti Kristen long nau, ol i go i stap long ol hap i sot long ol man bilong autim tok. Ol tu i amamas na belgut long lukim wok bilong Kingdom i kamap strong na long ol inap kisim ol gutpela pren Kristen.​—⁠12/15, pes 24.

◻ Baibel i tok wanem long ol samting bilong dring?

Baibel i kamapim stretpela tingting long dring. Baibel i tok, wain em i wanpela presen God i givim long yumi man. (Song 104:​1, 15) Tasol Baibel i tambuim pasin bilong dring planti tumas. (Luk 21:34; 1 Timoti 3:8; Taitus 2:⁠3; 1 Pita 4:3)​—⁠12/15, pes 27.

◻ Wanpela bikpela samting bilong buk bilong Hagai em wanem samting?

Maski buk bilong Hagai i gat 38 ves tasol, nem bilong God i stap inap 35 taim. Tasol i olsem dispela tok profet i no gat strong moa taim ol i rausim nem Jehova na ol i putim “Bikpela” olsem biknem.​—⁠1/1, pes 6.

◻ Yumi lain long wanem samting long sin bilong Devit na Manase?

Maski Jehova i bin lusim rong bilong Devit na Manase, tupela​—⁠na ol Israel tu​—⁠ol i bin kisim ol hevi i bin kamap long pasin nogut bilong tupela. (2 Samuel 12:​11, 12; Jeremaia 15:​3-5) Na olsem tasol, Jehova i save lusim rong bilong ol sinman i tanim bel, tasol sampela hevi inap kamap long pasin ol i mekim na ol i no inap abrusim.​—⁠1/1, pes 27.

◻ Olsem wanem ‘lek bilong ol man i autim gutnius’ bilong Kingdom bilong God i “naispela tru”? (Aisaia 52:⁠7, NW)

Taim man i go autim tok long ol narapela, lek bilong em i karim em i go. Olsem na lek i makim dispela man yet. Na planti manmeri, taim ol i harim na givim bel long gutnius bilong Kingdom, ol i ting, lek bilong ol man i autim tok i naispela tru.—⁠1/15, pes 13.

◻ Taim yumi “autim gutnius” yumi mas mekim wanem wok i gat tupela hap bilong en? (1 Korin 9:⁠16)

Namba wan: Yumi mas autim gutnius bilong Kingdom. Namba tu hap bilong dispela wok i olsem: Yumi mas skulim ol man i amamas long harim tok bilong Kingdom.​—⁠1/15, pes 23.

◻ Ol singsing bilong Kingdom yumi mekim long ol miting bilong kongrigesen i save helpim yumi olsem wanem?

Pasin bilong singsing em i givim rot long yumi long kamapim bel bilong yumi​—⁠yumi ting olsem wanem long Man bilong wokim yumi. (Song 149:​1, 3) Sapos yumi givim bel long mekim singsing long ol bung bilong kongrigesen, dispela i ken redim tingting na bel bilong yumi long kisim ol tok bai kamap long miting. Em i ken kirapim yumi long mekim bikpela wok moa long lotuim Jehova.​—⁠2/1, pes 28.

◻ Olsem wanem na yumi ken tok, de yumi dai i winim de mama i karim yumi? (Saveman 7:⁠1)

De yumi dai em inap winim de mama i bin karim yumi sapos yumi bin kisim gutpela nem long ai bilong Jehova, em inap kirapim bek ol man i stap gut long em na ol i dai. (Jon 11:25)​—⁠2/15, pes 12.

◻ Bilong wanem Buk Saveman i mas helpim yumi wan wan yet?

Em inap helpim yumi olgeta wan wan long stretim tingting bilong yumi long ol samting bilong i stap bilong yumi na ol samting yumi ting i bikpela samting. (Saveman 7:​2; 2 Timoti 3:​16, 17)​—⁠2/15, pes 16.

◻ Ol Witnes Bilong Jehova i bilong lain fandamental?

Nogat. Tru, ol i holim ol strongpela bilip, tasol ol i no bihainim ‘bilip fandamental’ olsem ol man long nau i save tingim dispela tok. Ol i no save mats na kros pait wantaim ol man i no wanbel wantaim ol. Ol i bihainim pasin bilong Gopas bilong ol, em Krais Jisas.​—⁠3/1, pes 6.

◻ Yumi no save long wanem taim stret Jisas bai kam na givim strafe bilong God long ol man, na dispela i mekim wanem long ol Kristen?

Dispela i helpim ol Kristen long was i stap na long olgeta de yumi ken kamapim long ples klia olsem yumi mekim wok bilong God, long wanem, yumi laikim tru em na i no olsem yumi laik kisim sampela samting long em.​—⁠3/1, pes 13.

◻ Yumi mas skelim wanem samting pastaim sapos yumi laik kisim wanpela brata i bin paulim mani bilong yumi i go long kot?

Yumi mas skelim gut, dispela bai mekim wanem long yumi, long ol narapela i insait long dispela, na kongrigesen, na long ol man ausait. (1 Korin 6:⁠7)​—⁠3/15, pes 21, 22.

◻ Yu inap painim amamas tru olsem wanem?

Pasin bilong stap amamas tru em samting bilong bel, na man i laik stap olsem i mas bilip tru na i mas stap wanbel wantaim Jehova. (Matyu 5:⁠3)​—⁠3/15, pes 23.

◻ Taim ol i singautim Kristen long harim kot em i mas mekim wanem?

Olgeta wan wan Kristen em gavman i singautim ol long insait long lain bilong harim kot, ol i mas tingim ol tok bilong Baibel ol yet i save gut long en, na maus bilong bel bilong ol, na tingim wanem samting ol yet i mas mekim. (Galesia 6:⁠5)​—⁠4/1, pes 29.