Maus Bilong Bel—Em Wanpela Hevi Yumi Karim o Em i Helpim Yumi?
‘BEL bilong mi i gat tok!’ Em nau, sampela taim bel bilong yumi olgeta i gat tok. Sampela taim bel i gat liklik tok tasol na nau bel i no stap isi, tasol sampela taim bel i kotim yumi strong na i sutim tru lewa bilong yumi. Na taim bel bilong yumi i gat tok, dispela inap mekim na yumi kisim bikpela bel hevi tru o yumi pilim olsem yumi no inap mekim wanpela gutpela samting.
Orait, ating maus bilong bel i olsem wanpela hevi yumi mas karim, a? Sampela inap ting olsem. Sampela lain bilong bipo i ting maus bilong bel i stap pinis insait long skin bilong yumi taim mama i karim yumi. Planti ol i ting God yet i bin givim maus bilong bel long yumi bilong soim rot long yumi long bihainim stretpela pasin. Olsem na sampela ol i bin tok long dispela maus bilong bel olsem “God i stap insait long bel bilong yumi,” na “pasin bilong yumi bilong pastaim tru,” na “maus bilong God.”
Tasol long nau planti man i laik ting olsem maus bilong bel em i wanpela samting yumi wok long kisim—ol pasin samting papamama yet o ol wanples i save mekim, dispela i wok long mekim sampela samting long yumi. Olsem: Sampela dokta ol i tok, pikinini i save pret long kisim strafe na dispela i lainim em long givim baksait long ol pasin i no stret, olsem na samting yumi kolim maus bilong bel i olsem yumi wok long kisim tingting bilong papamama long ol samting i stret o i no stret na ol bilip bilong ol. Na sampela i tok, yumi save kisim tingting bilong ol man long wanem samting i gutpela, na wanem samting i stret, na nau yumi tu i holim dispela tingting. Na sampela i tok, taim bel i kotim yumi, i no olsem yumi gat wanpela maus bilong bel tru, nogat; taim yumi gat laik long mekim wanpela samting na ol strongpela lo bilong ol man i tok yumi mas mekim narapela samting, em nau, i olsem i gat wanpela pait i kamap long bel bilong yumi, na dispela tasol i mekim na bel i gat tok! Em tingting bilong sampela man.
Tasol maski ol man i ting olsem wanem long maus bilong bel, planti man, meri, pikinini ol i bin sanap strong na bihainim maus bilong bel taim papamama o famili, o ol wanples samting i laik subim ol long mekim ol samting em bel bilong ol i gat tok long en. Na sampela i orait long i dai bambai ol i ken bihainim maus bilong bel! Na maski olgeta lain i gat ol narapela narapela pasin na bilip, klostu olgeta i ting olsem kilim man i dai, stil, pamuk na bagarapim marit, giaman, mekim pasin sem long wanblut, ol dispela pasin i gat rong. Dispela i kamapim klia olsem maus bilong bel i stap pinis insait long skin bilong yumi taim mama i karim yumi.
Maus Bilong Bel—Baibel i Tok Wanem Long En?
Man i save tru long dispela samting, em God Jehova yet, long wanem, “em wanpela tasol i bin wokim yumi.” (Song 100:3) Baibel i tok, God i wokim man “i kamap olsem” God yet. (Stat 1:26) Taim God i wokim man, em inapim man long pilim wanem samting i stret na wanem samting i no stret; kirap long taim namba wan man i kamap, maus bilong bel em i wanpela samting tru i stap insait long skin bilong man.—Skelim wantaim Stat 2:16, 17.
Aposel Pol i strongim dispela tok long pas em i salim long ol Rom, em i tok: “Ol arapela lain ol i no gat lo [bilong God], tasol long tingting bilong ol yet . . . ol i save bihainim pasin bilong lo. . . . Long dispela pasin bilong ol, tok bilong lo God i bin raitim long bel bilong ol em i kamap ples klia. Na tingting i stap insait tru long bel bilong ol, dispela tu i soim olsem lo i stap long bel bilong ol. Olsem na long de God i makim bilong skelim olgeta pasin hait na tok hait bilong olgeta man, tingting bilong ol dispela man bai i kotim ol long pasin ol i bin mekim. Na sampela taim ating em bai i orait long pasin ol i bin mekim.” (Rom 2:14, 15) Em nau, planti man i no bin go bikpela aninit long Lo God i bin givim long ol Juda, tasol ol i bihainim sampela as lo bilong dispela Lo, na i no olsem ol man i subim ol long mekim, nogat; “tingting bilong ol yet” i kirapim ol long mekim!
Olsem na maus bilong bel i no olsem wanpela hevi yumi mas karim, nogat; em i wanpela presen God i bin givim long yumi, olsem wanpela gutpela samting yumi holim. Tru, em inap givim bel hevi long yumi, tasol sapos yumi bihainim stret maus bilong bel em inap mekim gut long yumi, olsem yumi stap belgut na bel i stap isi. Maus bilong bel inap soim rot long yumi, na lukautim yumi, na kirapim yumi. Wanpela Baibel (The Interpreter’s Bible) i tok olsem: “Bilong tingting na bel i ken i stap gutpela, man i mas wok strong bambai ol samting em i mekim i kamap wankain olsem ol samting em i pilim olsem em i mas mekim.” Olsem wanem yumi inap mekim olsem? Yumi inap lainim bel bilong yumi na mekim em i wok gut? Long stori i kamap bihain long dispela, bai yumi toktok long ol dispela askim.