Ripot Long Wok Bilong Kingdom
Em i Painim Wanpela “Bis i Gutpela Tru”
“KINGDOM bilong heven em i olsem wanpela bisnisman i wok long painim ol naispela naispela bis. Na taim em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.” Long dispela tok, Jisas i tok piksa long gutpela samting bilong Kingdom bilong God. (Matyu 13:45, 46) Ol man i save tingim gutpela samting bilong Kingdom, planti taim ol i save lusim planti samting bilong ol na bai ol i ken mekim wok bilong Kingdom. Dispela samting i kamap klia long wanpela stori i kam long Pingtong Provins long Taiwan, olsem:
Long 1991, Mista na Misis Lin i kirap stadi long Baibel wantaim ol Witnes Bilong Jehova. Taim wanpela pasto long ples i harim olsem, em i traim long pulim ol i go long lotu bilong em. Famili Lin i gat bisnis bilong salim blut bilong pik na pato long maket long hap bilong ol, olsem na ol i askim pasto long tingting bilong em long dispela bisnis bilong ol. Pasto i tok: “Olgeta samting God i wokim i bilong man i ken kisim olsem kaikai.” Tasol ol Witnes i strongim ol long skelim tok bilong Baibel long dispela samting. Ol i lain olsem God Jehova i tingim blut i holi, long wanem, “blut i save givim laip long olgeta manmeri na animal.” (Wok Pris 17:10, 11) Olsem na ol Kristen tru i mas klia long blut. (Aposel 15:20) Taim ol i skelim tok bilong Baibel long dispela samting, famili Lin i tingting long ol i no ken salim blut moa, maski ol i kisim mani long dispela wok inap long lukautim ol yet. Tasol i no longtaim na bikpela traim moa i painim ol gen.
Taim ol i no kisim save yet long tok i tru, famili Lin i planim 1,300 diwai buai long hap graun bilong ol. Diwai buai i save kamap bikpela insait long 5-pela yia na karim kaikai, tasol taim olgeta diwai i karim kaikai na ol i salim, famili Lin inap kisim 77,000 dola long olgeta wan wan yia. Namba wan kaikai bilong diwai buai i redi na taim bilong kisim i klostu, olsem na famili Lin i mas tingting gut long samting ol bai mekim. Taim ol i stadi long Baibel, ol i kisim save olsem ol Kristen i “mas rausim olgeta pasin doti bilong bodi na bilong spirit.” Ol i no ken mekim ol kain samting i no klin olsem smok tabak, kisim drak, na kaikai buai, na ol i no ken kirapim ol man long mekim dispela samting. (2 Korin 7:1) Nau ol bai mekim wanem?
Ol dispela samting i mekim na bel bilong Mista Lin i gat tok, na em i kirap lusim stadi. Tasol Misis Lin i kisim buai long ol olpela diwai na em i salim, na em i kisim olsem 3,000 dola winmani. Dispela i soim ol long bikpela mani ol inap kisim bihain sapos ol i larim ol diwai buai i stap yet. Tasol bel bilong Mista Lin i gat tok yet long dispela samting.
Em i wok long karim yet dispela hevi i go na wanpela taim em i askim ol Witnes long dispela hap long ol i mas katim ol diwai buai bilong em. Ol Witnes i stori gut olsem em yet i mas tingim samting em bai mekim, olsem na em i mas “karim hevi” bilong em yet, na em yet i mas katim ol diwai buai bilong em. (Galesia 6:4, 5) Ol i kirapim em long tingim tok promis i stap long 1 Korin 10:13, em i tok: “Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man. Na God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” Ol Witnes i toktok gut wantaim em, na ol i tok: “Sapos mipela i katim ol diwai buai bilong yu, bai yu bel hevi na bai yu sutim tok long mipela long dispela samting.” Sampela de bihain, long moningtaim Misis Lin i harim pairap bilong senso na em i kirap. Man bilong em na ol pikinini i wok long katim ol diwai buai!
Mista Lin i lukim olsem Jehova i save truim ol tok promis bilong Em. Mista Lin i kisim wanpela wok mani em bel bilong em i no gat tok long en, na em i kamap man bilong litimapim nem bilong Jehova. Em i kisim baptais long kibung sekit bilong ol Witnes Bilong Jehova long Epril 1996.
Tru tumas, Mista Lin i “salim olgeta samting bilong en” na em i baim wanpela “bis i gutpela tru.” Nau em i amamas tru long stap pren bilong God Jehova na mekim wok bilong Kingdom bilong Em.