Bilong Wanem Yumi Mas Kamapim Pasin Nogut Bilong Man?
SAMPELA man long Wes Afrika i save tok: “Sapos man i kamapim long ples klia wanpela samting, em i kamap olsem birua bilong ol man.” Dispela samting i bin painim Olu taim em i sutim tok long bikbrata bilong em olsem em i bin mekim pasin pamuk wantaim susa bilong em. Bikbrata i belhat na singaut: “Yu man bilong giaman!” Orait nau em i kirap na paitim Olu nogut tru na rausim em long haus bilong famili, na em i kukim olgeta klos bilong Olu. Ol wanples i helpim tok bilong brata bilong Olu. Ol man bilong ples i no orait moa long Olu, olsem na em i mas lusim ples bilong em. Orait bihain ol man i lukim olsem dispela yangpela meri i gat bel, olsem na nau ol i save, Olu i bin tok tru. Nau brata bilong em i tokaut long rong bilong em na ol wanples i kisim bek Olu. Tasol sapos dispela rong i no bin kamap ples klia, narapela kain samting inap kamap—ol inap kilim i dai Olu.
Tru tumas, ol man i no save laikim Jehova ol i no amamas taim wanpela man i kamapim rong bilong ol. Sin i stap long skin bilong yumi na dispela i laik kirapim yumi long sakim ol tok bilong stretim yumi na yumi bel nogut long man i givim dispela tok long yumi. (Skelim wantaim Jon 7:7.) Olsem na planti man i save pasim maus na ol i no kamapim rong bilong ol narapela long man i gat namba long stretim ol.
Tok Bilong Stretim Man i Gutpela Samting
Tasol insait long lain bilong Jehova ol man i gat narapela kain tingting long tok bilong stretim ol. Ol man na meri i stap aninit long God ol i amamas long rot Jehova i putim bilong helpim ol manmeri insait long kongrigesen Kristen em ol i bin mekim rong. Ol i save, ol tok ol i kisim bilong stretim ol em i wanpela mak bilong pasin sori bilong Jehova.—Hibru 12:6-11.
Dispela i kamap klia long samting i bin painim King Devit. Kirap long taim em i yangpela yet em i stretpela man, tasol wanpela taim em i pundaun na mekim bikpela rong. Pastaim em i mekim pasin pamuk. Orait bihain em i laik haitim dispela rong na em i wokim rot bambai ol birua i ken kilim i dai man bilong dispela meri. Tasol Jehova i kamapim rong bilong Devit long profet Natan. Orait nau Natan i strongim bel na em i go tokim Devit long dispela samting. Natan i kamapim wanpela strongpela tok piksa. Em i stori long Devit long wanpela maniman i gat planti sipsip na wanpela rabisman i gat wanpela pikinini sipsip tasol na em i laikim tumas dispela liklik sipsip, tasol maniman hia i kisim dispela liklik sipsip na em i kilim na kukim bilong wanpela pren bilong em. Orait profet i askim Devit, ol i mas mekim wanem long dispela maniman. Bipo Devit em i man bilong lukautim ol sipsip, olsem na taim em i harim dispela tok em i belhat nogut tru. Em i tok: “Ol i [mas] kilim em i dai.” Orait nau Natan i sutim dispela tok piksa i go long Devit na em i tok: “Dispela maniman em yu tasol.”—2 Samuel 12:1-7.
Devit i no kros long Natan, na em i no mekim sampela tok bilong helpim em yet, na em i no kirap na sutim tok long ol narapela man, nogat. Taim Natan i krosim em, em i pilim tru rong bilong em. Bel bilong em i bagarap stret na em i tokaut olsem: “Mi mekim sin long ai bilong Bikpela.”—2 Samuel 12:13.
Taim Natan i kamapim rong bilong Devit na em i givim tok long Devit bilong stretim em, dispela i kamapim gutpela samting. Tru, God i no mekim long Devit na bai em i no ken kisim nogut long dispela rong em i bin mekim, nogat. Tasol em i tanim bel na em i kamap wanbel gen wantaim Jehova. Devit i ting olsem wanem long ol dispela tok bilong stretim em? Em i tok: “Sapos stretpela man i paitim mi, dispela i olsem em i mekim gutpela pasin sori long mi; na sapos em i givim tok long mi bilong stretim mi, em i olsem wel long het, na het bilong mi i no laik sakim.”—Song 141:5, NW.
Long taim bilong yumi tu, ol wokboi bilong Jehova inap mekim sampela bikpela rong, maski ol i bin i stap gut long Jehova inap planti yia. Taim ol i mekim rong, planti ol i save ol elda inap helpim ol, olsem na ol yet i save go long ol dispela elda bilong kisim helpim long ol. (Jems 5:13-16) Tasol sampela taim wanpela man i bin mekim rong em i laik haitim rong bilong em, olsem King Devit i bin mekim. Orait, sapos yumi kisim save long wanpela bikpela rong i bin kamap insait long kongrigesen, yumi mas mekim wanem?
Em Wok Bilong Husat?
Taim ol elda i kisim save long wanpela bikpela rong i bin kamap, ol i save go long dispela man bilong givim sampela tok long em bilong helpim na stretim em. Em wok bilong ol elda long skelim pasin bilong ol kain man olsem i stap insait long kongrigesen Kristen. Ol elda i save was gut bambai kongrigesen i ken stap strong long ol samting bilong spirit, olsem na taim man i mekim wanpela pasin i no gat gutpela tingting long en o i no stret, ol i save helpim em na givim sampela tok long em bilong stretim em.—1 Korin 5:12, 13; 2 Timoti 4:2; 1 Pita 5:1, 2.
Tasol olsem wanem sapos yu no wanpela elda na yu kisim save long wanpela bikpela rong em wanpela Kristen i bin mekim? Lo Jehova i bin givim long lain Israel i gat sampela tok bilong stiaim tingting bilong yumi. Lo i tok, sapos man i lukim wanpela man i mekim sampela pasin bilong bikhet na lusim bilip na givim baksait long God, o em i laik daunim gavman, o em i kilim man i dai o mekim sampela bikpela rong moa, orait man i bin lukim dispela samting, em wok bilong em long kamapim dispela rong na tokaut long kot long ol samting em i save pinis long en. Wok Pris 5:1 i tok: “Sapos ol i askim wanpela man long i go long kot bilong tokaut long samting em i bin lukim narapela man i mekim, o long samting em i bin harim narapela man i tok long en, tasol dispela man i no tokaut long dispela samting, orait em i mekim rong na i gat asua long ai bilong God.”—Skelim wantaim Lo 13:6-8; Esta 6:2; Sindaun 29:24.
Tru, long nau ol Kristen i no stap aninit long Lo Bilong Moses, tasol ol tok i as bilong dispela lo em inap stiaim ol. (Song 19:7, 8) Olsem na sapos yu kisim save olsem wanpela wanbilip Kristen i bin mekim wanpela bikpela rong, yu mas mekim wanem?
Ol Samting Yu Mas Mekim
Namba wan samting i olsem: I mas i gat as na yu bilip olsem dispela bikpela rong i bin kamap tru. Wanpela man i gat gutpela tingting na save em i bin tok: “Sapos yu kamap witnes long kot, yu no ken tok giaman na daunim nating man i no bin mekim rong.”—Sindaun 24:28.
Ating yu tingting long i go stret long ol elda. I no gat rong long mekim olsem. Tasol em i gutpela pasin sori sapos yu go long dispela man yet. Taim yu toktok wantaim em ating bai yu save, i gat sampela samting yu no bin klia gut long en. O ating ol elda i kirap pinis long mekim ol samting bilong stretim. Stap isi na toktok gut wantaim em long dispela samting. Sapos i gat as na yu bilip yet olsem em i bin mekim wanpela bikpela rong, orait yu ken wok long kirapim em long i go long ol elda bambai ol i ken helpim em, na tokim em long olsem wanem em i pasin bilong gutpela tingting sapos em i mekim olsem. Yu no ken kamapim dispela samting long ol narapela man, long wanem, dispela i olsem tok baksait.
Sapos bikpela hap taim liklik i bin lus na em i no go long ol elda, yu yet yu mas mekim. Orait nau wanpela o tupela elda bai toktok wantaim em long dispela samting. Ol elda i mas skelim na “painimaut gut as bilong tok” bambai ol i ken save, wanpela rong i bin kamap tru o nogat. Sapos em i bin kamap tru, bai ol i mekim ol samting bilong stretim, na ol bai larim ol tok bilong Baibel i stiaim ol.—Lo 13:12-14.
I mas i gat tupela o 3-pela man bilong tokaut long ol samting ol i bin lukim, olsem witnes long kot, bilong strongim tok olsem em i bin mekim wanpela rong. (Jon 8:17; Hibru 10:28) Sapos em i tok em i no bin mekim dispela rong, na yu wanpela tasol i tokaut na i no gat narapela, orait ol elda bai larim dispela samting i stap long han bilong Jehova. (1 Timoti 5:19, 24, 25) Ol bai mekim olsem, long wanem, ol i save olgeta samting “i stap ples klia tru” long ai bilong Jehova, na sapos man i bin mekim tru dispela rong, bihain rong bilong em bai kamap ples klia.—Hibru 4:13; Namba 32:23.
Tasol olsem wanem sapos em i tok em i no bin mekim rong na yu wanpela tasol yu tokaut olsem em i bin mekim? Ol inap sutim tok long yu olsem yu bin bagarapim gutnem bilong em? Nogat, ol i no inap mekim olsem sapos yu no bin kamapim nabaut dispela samting long ol man i no gat wok long save long en. Sapos yu save long wanpela samting i nogutim kongrigesen na yu kamapim long ol man i gat namba na wok bilong stretim dispela samting, i no olsem yu bagarapim gutnem bilong man, nogat. Dispela samting yu mekim i stret wantaim laik bilong yumi long mekim ol samting i stret na yumi stap gut long God long olgeta taim.—Skelim wantaim Luk 1:74, 75.
Pasin Holi Insait Long Kongrigesen
Wanpela as na yumi mas kamapim rong bilong man, em i olsem: Dispela i save lukautim kongrigesen na bai em i ken i stap klin. Jehova em i klinpela God, olsem holi. Em i laik bai olgeta man i lotuim em ol i mas i stap klin long ol samting bilong spirit na long pasin bilong ol. Long Baibel em i givim tok long yumi olsem: “Yupela i mas i stap olsem ol pikinini i save harim tok. Bipo yupela i no gat save, na yupela i save bihainim ol kain kain laik nogut. Tasol nau yupela i no ken bihainim dispela pasin moa. Nogat. God i singautim yupela pinis, em i holi na em i save mekim gutpela na stretpela pasin olgeta. Olsem na yupela i mas givim yupela yet long God na stap holi long olgeta wokabaut bilong yupela. Buk bilong God i tok olsem, ‘Yupela i mas i stap holi . . . , long wanem, mi God bilong yupela, mi stap holi.’ ” (1 Pita 1:14-16) Ol man i wok long mekim ol pasin i no klin o ol i mekim rong, ol inap mekim kongrigesen olgeta i kamap doti na Jehova i no orait moa long en sapos kongrigesen i no kirap na stretim ol o rausim ol.—Skelim wantaim Josua, sapta 7.
Ol pas aposel Pol i raitim long kongrigesen Kristen long Korin i soim yumi olsem taim sampela i kamapim rong wanpela man i bin mekim, dispela i helpim lain bilong God long kamap klin gen long ai bilong em. Long namba wan pas bilong em, Pol i tok: “Mi harim ol i stori olsem, wanpela kain pasin pamuk i kamap namel long yupela, em kain pasin nogut tru ol haiden yet i no save mekim. Dispela pasin i olsem, wanpela man i bin kisim meri bilong papa bilong en.”—1 Korin 5:1.
Baibel i no tok husat i bin givim dispela tok long aposel Pol. Ating em i bin harim dispela tok long Stefanas na Fortunatus na Akaikus, em ol i bin lusim Korin na i kam long Efesus, em ples Pol i stap long en long dispela taim. Na tu, Pol i bin kisim wanpela pas long kongrigesen Kristen long Korin. Tasol maski Pol i harim we dispela tok, taim ol man i lukim pinis dispela samting ol i kam toksave long Pol—na em i save em inap bilip long tok bilong ol—nau em inap tokim kongrigesen long ol samting ol i mas mekim. Em i tok: “Yupela i mas rausim dispela man nogut i stap namel long yupela.” Orait ol i rausim dispela man long kongrigesen.—1 Korin 5:13; 16:17, 18.
Olsem wanem? Dispela tok Pol i givim long kongrigesen em i kamapim gutpela samting? Yes, gutpela samting i kamap! Man i bin mekim dispela rong em i pilim tru rong bilong em na em i tanim bel. Long namba tu pas Pol i salim long ol Korin, em i tokim kongrigesen long “lusim sin bilong em na mekim isi bel bilong en.” (2 Korin 2:6-8) Olsem na taim ol i kamapim rong bilong dispela man, nau ol elda i kirap mekim ol samting bilong stretim dispela rong, na nau kongrigesen i kamap klin gen na God i orait gen long dispela man em i bin bagarapim pasin wanbel i stap namel long em na God.
Na i gat narapela stori olsem i stap long namba wan pas Pol i bin salim long kongrigesen Kristen. Long dispela taim Pol i kolim nem bilong ol man i bin lukim dispela samting na ol i kamapim long em. Long pas Pol i tok olsem: “Ol brata bilong mi, ol lain bilong Kloe ol i bin tokim mi olsem yupela i gat kros i stap namel long yupela.” (1 Korin 1:11) Pol i save, dispela kros, na pasin bilong ol long litimapim nem bilong sampela man, dispela i kamapim pasin bilong brukim lain na i laik bagarapim pasin wanbel i stap insait long kongrigesen. Pol i tingim tru i stap bilong ol wanbilip bilong em long ol samting bilong spirit, olsem na kwiktaim em i kirap raitim pas long kongrigesen na tokim ol long ol samting ol i mas mekim bilong stretim dispela hevi.
Long nau klostu olgeta brata sista long ol kongrigesen i stap long olgeta hap ol i wok strong long i stap gut long ai bilong God bambai kongrigesen i ken stap klin long ol samting bilong spirit. Bilong mekim olsem, sampela i save karim pen na hevi; na sampela ol i bin i dai bambai ol i ken holimpas pasin bilong i stap gut long God. Olsem na sapos wanpela rong i kamap na yumi ting i no bikpela samting, o yumi haitim dispela rong, i olsem yumi no pilim hatwok bilong ol dispela brata sista.
Bilong Helpim Ol Man i Bin Mekim Rong
Bilong wanem sampela man i bin mekim rong ol i surik long i go long ol elda bilong kongrigesen? As bilong en, em planti ol i no save long gutpela helpim ol inap kisim taim ol i go long ol elda. Sampela ol i gat tingting kranki na ol i ting sapos ol i kamapim rong bilong ol, ol elda bai kamapim dispela rong long olgeta manmeri bilong kongrigesen. Na sampela i save giamanim bel bilong ol na ol i ting dispela samting ol i mekim i no wanpela bikpela rong. Na sampela ol i ting ol yet inap stretim pasin bilong ol na ol elda i no gat wok long helpim ol.
Tasol ol dispela man i bin mekim rong ol i mas i gat ol elda bilong kongrigesen long mekim pasin sori na helpim ol. Jems i tok: “Ating wanpela bilong yupela i gat sik? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”—Jems 5:14, 15.
Em gutpela rot tru Jehova i wokim bilong helpim ol man i bin mekim rong na bai ol i ken kamap strong gen long ol samting bilong spirit! Taim ol elda i givim ol gutpela tok bilong Baibel long ol bilong mekim isi bel bilong ol na stretim ol, na ol i beten bilong helpim ol, ol dispela elda inap helpim ol dispela man i gat sik long spirit na bai ol inap lusim pasin bilong mekim rong na ol i ken kamap gutpela gen. Olsem na taim ol man i mekim rong ol i tanim bel na ol i go long ol elda i gat pasin sori, ol i no pilim olsem ol i nogut pinis—ol i pilim olsem ol i kisim nupela strong na bel bilong ol i stap isi. Wanpela yangpela man bilong Wes Afrika em i bin mekim pasin pamuk na em i haitim dispela rong bilong em inap sampela mun. Taim rong bilong em i kamap ples klia pinis, em i tokim ol elda: “Mi laikim tru sapos wanpela i bin askim mi long pasin bilong mi long prenim dispela meri! Tasol nau mi autim rong bilong mi na bel bilong mi i stap isi.”—Skelim wantaim Song 32:3-5.
Em Wanpela Pasin Sori
Ol wokboi bilong God i baptais pinis ol i ‘lusim pinis pasin bilong i dai, na ol i stap long pasin bilong laip.’ (1 Jon 3:14) Tasol sapos ol i mekim wanpela bikpela rong, ol i go bek gen long rot bilong i dai. Sapos ol elda i no helpim ol, orait pasin bilong mekim rong bai kamap strong long bel bilong ol na ol i no inap pilim, na ol i no laik tanim bel na kirap gen long lotuim God tru.—Hibru 10:26-29.
Taim man i kamapim rong bilong narapela, dispela i makim olsem em i tingim tru dispela man i bin mekim rong. Jems i tok: “Ol brata bilong mi, sapos wanpela bilong yupela i lusim tok tru bilong God na i go nabaut, na wanpela brata i bringim em i kam bek gen, orait dispela brata i mekim gutpela pasin tru. Yupela i mas tingim gut dispela tok. Sapos wanpela brata i go long man bilong mekim sin na i helpim em long lusim rot nogut na i kam bek long God, orait dispela brata bai i kisim bek . . . man bilong mekim sin, na bai em i no i dai. Long dispela pasin God bai i lusim planti sin tru.”—Jems 5:19, 20.
Olsem na bilong wanem yumi mas kamapim wanpela pasin nogut? Long wanem, dispela i save kamapim gutpela samting. Taim yumi kamapim rong bilong wanpela man, dispela em i wanpela pasin sori Kristen yumi mekim long God, na long kongrigesen, na long dispela man i bin mekim rong. Sapos olgeta wan wan man na meri bilong kongrigesen i stap gut long God na sambai long ol stretpela lo bilong em, Jehova bai mekim gut tru long kongrigesen. Aposel Pol i tok: “[Jehova] bai i strongim yupela, na bai yupela i stap strong inap long las de, na bai yupela i no gat asua long De bilong Bikpela bilong yumi Jisas Krais.”—1 Korin 1:8.
[Piksa long pes 26]
Taim wanpela Witnes i mekim rong, yumi mekim pasin sori sapos yumi kirapim em long i go toktok wantaim ol elda
[Piksa long pes 28]
Ol elda i save helpim ol man i bin mekim rong na bai God i ken orait gen long ol