Yu Ting Long Olgeta Taim Pasin Bilong Toktok Planti i No Stret?
Ol samting yumi no inap toktok planti long en i save givim bikpela hevi moa yet long yumi, a?—Bikman De Kustin, 1790-1857.
INAP tupela yia wanpela man i bin pilai nogut long wanpela wanwok meri. Meri i toktok planti long dispela samting, olsem na man hia i tok nogut long em na givim baksait long em. Em i bel hevi stret na dispela i wok long givim sik long em, tasol em inap mekim wanem? Na i olsem tu long wanpela sumatin i stap namba wan long klas na ol i rausim em long skul, long wanem, em i no laik insait long ol spot em skul i bin putim bilong skulim ol man long pait—bel bilong em i gat tok long dispela. Tupela hia i pilim olsem ol narapela i bin rongim ol, tasol olsem wanem? I stret ol i tokaut long dispela hevi? Na sapos ol i mekim olsem, dispela inap helpim ol o em bai mekim dispela hevi i go bikpela?
I gat planti samting olsem long nau em yumi ol man i save toktok planti long en—yumi stap namel long ol man i gat sin na planti samting long dispela graun i no stret. I gat kain kain samting bilong toktok planti long en, olsem taim man i kros long wanpela samting, o em i krai sori, o em i gat pen, o em i bel nogut long wanpela samting, o em i gat tok long wanpela man. Planti manmeri i laik abrusim pasin bilong toktok planti na tok pait, tasol yu ting long olgeta taim yumi mas pasim maus? Baibel i tok wanem long dispela samting?
Ol Samting Nogut Dispela i Mekim Long Yu Yet na Ol Narapela
Yumi ken save, sapos man i toktok planti tumas long olgeta taim, dispela em i samting nogut, na Baibel i no orait long dispela samting. Man bilong toktok planti bai nogutim em yet long ol samting bilong skin na spirit, na skrapim bel bilong ol man em i gat tok long ol. Wanpela savetok bilong Baibel i stori long meri bilong wanpela man, em i meri bilong toktok planti, na i tok: “Sapos meri bilong wanpela man em i meri bilong tok kros na toktok planti, orait em i olsem ren i kam insait long hul long het bilong haus na oltaim i wok long pundaun liklik liklik.” (Sindaun 27:15) Man i toktok planti long Jehova o long wanpela samting Jehova i givim long yumi, em i mekim bikpela rong. Taim lain bilong Israel i toktok planti long mana God i bin givim long ol taim ol i raun 40 yia long ples wesan nating, na ol i tok dispela mana em i “rabis kaikai,” Jehova i salim ol snek nogut i kam bilong givim strafe long ol dispela man i toktok planti na i no daun long em, na planti ol i dai.—Namba 21:5, 6.
Na tu, Jisas i tokim lain bilong em olsem ol i no ken toktok planti long “liklik hap pipia,” olsem ol liklik pasin kranki, ol i lukim i stap long ol narapela man—ol i mas tingim bikpela “plang,” olsem ol pasin kranki, bilong ol yet. (Matyu 7:1-5) Na olsem tasol, Pol i tokaut strong olsem man i sutim tok (olsem toktok planti) long narapela, em i “no inap tok olsem [em yet i] no gat rong . . . long wanem, [em yet i] save mekim wankain pasin olsem ol i mekim.” Ol dispela toksave i mas kirapim yumi na bai yumi no sutim tok nating long ol narapela na kisim pasin bilong toktok planti.—Rom 2:1.
Yu Ting Olgeta Kain Pasin Bilong Toktok Planti Em i No Stret?
Tasol olsem wanem? Yumi ken ting olsem olgeta kain pasin bilong toktok planti em i no stret? Nogat, yumi no ken ting olsem. Baibel i makim olsem i gat planti samting i no stret i kamap long graun, na i stret ol man i mas mekim sampela samting bilong stretim. Long wanpela tok piksa, Jisas i stori long wanpela jas nogut, na maski em i no laik, em i helpim wanpela meri em man bilong em i dai pinis, em ol narapela i daunim em na em i stap nogut. Jas i ting, nogut dispela meri i “wok long kam oltaim oltaim, na bihain mi les olgeta long harim toktok bilong en.” (Luk 18:1-8) Sapos i gat sampela rong i stap, yumi tu i no ken les long toktok planti long en inap long taim ol i stretim.
Taim Jisas i tok yumi mas beten askim God long salim Kingdom bilong em i kam, i olsem em i laik kirapim yumi long tingim ol samting nogut bilong dispela taim nau na “krai” long God i mas stretim, a? (Matyu 6:10) Taim “planti tok moa” i kamap long kain kain pasin nogut i stap long Sodom na Gomora long bipo, Jehova i harim na em i salim ol ensel bilong em i go “lukim pasin ol dispela manmeri i mekim,” na long mekim wok bilong pinisim ol dispela pasin nogut. (Stat 18:20, 21) Em nau, ol dispela manmeri i bin toktok planti long Jehova long ol dispela pasin nogut, ol inap i stap bel isi, long wanem, Jehova i kirap stretim dispela samting na em i bagarapim dispela tupela taun wantaim ol man nogut i stap long en.
Kongrigesen Kristen
Olsem wanem long ol brata sista insait long kongrigesen Kristen? Maski ol i man na meri i gat sin, ol Kristen i wok strong long stap wanbel wantaim long mekim wok bilong God. Tasol sampela taim i gat sampela samting i kamap namel long ol na i stret ol i tokaut liklik long dispela samting na painim rot bilong stretim. Long taim bilong ol aposel, bihain liklik long de Pentikos, wanpela samting i kamap namel long ol Kristen God i bin makim ol long spirit holi. Planti nupela Kristen ol i stap long Jerusalem bambai ol i ken kisim sampela save moa na kamap strong. Ol aposel i bin stretim rot bilong helpim ol long kaikai. Tasol “ol disaipel i save tok Grik, ol i gat kros long ol disaipel i save tok Aram. Ol i tok olsem, ‘Long olgeta de yupela i save helpim ol manmeri i sot long kaikai samting, tasol yupela i no save helpim ol meri bilong mipela, man bilong ol i dai pinis.’ ” Tasol ol aposel i no krosim ol na tok i no stret ol i toktok planti long dispela samting, nogat; ol i kirap na mekim sampela wok bilong stretim dispela hevi. Olsem na sapos i gat as na brata i gat tok long wanpela samting na em i mekim long gutpela pasin daun, ol brata i gat wok long lukautim kongrigesen ol bai harim na mekim sampela wok bilong stretim dispela rong.—Aposel 6:1-6; 1 Pita 5:3.
Go Long Man i Gat Namba Long Helpim Yu
Ol dispela samting yumi stori pinis long en i kamapim klia olsem taim man i gat tok long wanpela samting, em i mas mekim long pasin daun na kamapim dispela rong long man i gat namba long helpim em. Olsem: Sapos yumi mas tromoi takis i bikpela tumas, nogut yumi tokaut long dispela samting long ol polis. O sapos yumi gat sik, nogut yumi kamapim dispela long wanpela jas. Olsem tasol, sapos wanpela rong i kamap insait o ausait long kongrigesen, i no gutpela sapos yumi kamapim dispela rong long ol man i no gat strong o namba bilong helpim yumi.
Long planti kantri long nau, sapos yumi gat hevi, i gat ol kot na sampela narapela lain yumi ken go lukim ol na ating ol inap helpim yumi. Dispela sumatin yumi stori pinis long em, taim em i kotim skul em i winim kot na skul i kisim em bek na skul i tok sori. Na olsem tasol, taim dispela wokmeri, em narapela i bin pilai nogut long em, em i go lukim wanpela lain olsem leba-yunion i gat wok long helpim ol meri, em nau, ol i helpim em. Ol bikman bilong skul i tok sori long em. Na ol bos bilong em ol i kirap mekim sampela samting bilong pasim dispela pasin bilong pilai nogut long meri.
Tasol yumi no ken ting wankain samting bai kamap na ol bai stretim olgeta wan wan samting yumi gat tok long en, nogat. Saveman King Solomon i tok stret olsem: “Ol samting i krungut pinis, em yumi no inap stretim.” (Saveman 1:15) Em nau, i gat sampela samting yumi mas wetim God i stretim long taim em yet i bin makim.
[Piksa long pes 31]
Taim man i toktok planti long wanpela samting na i gat as tru bilong en, ol elda i save harim na ol i mekim sampela wok bilong stretim dispela