‘Em i Gat Strong na Inap Kirapim Man Long Skelim’
WANPELA Witnes Bilong Jehova long Frans i tok: “Ol tok bilong en i gat bikpela strong na inap kirapim man long bilip, olsem na kirap long tumora bai mi mekim wok long en taim mi autim tok.” Wanpela Witnes long Amerika i tok: “Kwiktaim mi kaunim na mi gat bikpela laik long go autim tok na mekim wok long en, long wanem, mipela i save bungim planti man i no save givim bel long harim tok na ol i no bilip long Baibel.” Ol i stori long wanem samting? Em wanpela buklet i gat 32 pes, nem bilong en, A Book for All People (Wanpela Buk Bilong Helpim Olgeta Man), em Sosaiti Was Taua i bin kamapim long ol “Bilip Long Tok Bilong God” Kibung Distrik long 1997/1998.
Taim ol i wokim dispela buklet, ol i tingim sampela lain ol i bin skul gut, tasol ol i no gat save long Baibel. Planti manmeri olsem, ol i gat tingting bilong ol yet long Baibel, maski ol yet i no bin kaunim. Wok bilong dispela buklet em i bilong helpim ol man long bilip olsem Baibel em inap tru long ol i ken skelim tok bilong en. Dispela buklet i no subim ol man long bilip olsem God i as bilong ol tok bilong Baibel. Em i kamapim ol tok i tru na i larim ol dispela tok yet i kamapim klia olsem Baibel em i tok bilong God. Tok bilong en i no strong tumas; em i klia na i tokaut stret.
Olsem tupela man hia i tok, ol man i bung long ol kibung ol i gat bikpela laik long mekim wok long dispela buklet taim ol i autim tok. Olsem na long Frans, ol i stretim rot long mekim bikpela wok autim tok long Ogas 23 na 24 taim planti handet tausen yangpela bilong olgeta hap bilong graun i kam bung long Paris bilong tingim wanpela bikpela de bilong olgeta yangpela. Inap 2,500 Witnes (planti i gat 16 i go inap 30 krismas) i tilim 18,000 bilong dispela buklet long tok Frans, Jeman, Inglis, Itali, Polan, na Spen.
Olsem na taim yumi autim tok, mekim wok long dispela buklet, A Book for All People. Mipela laik bai dispela buklet i mekim bikpela wok long kirapim ol man i gat stretpela tingting na bai ol i ken bilip olsem ol i mas skelim tok bilong Baibel.