Wanpela Bung Bilong Amamas—Klas Namba 104 i Winim Skul Bilong Gileat
“EM WANPELA de bilong amamas, na yumi olgeta i kisim bikpela amamas, a?” Long dispela tok Carey Barber, em wanpela bilong Lain Bilong Bosim Ol Witnes Bilong Jehova, em i kirapim program bilong bung bilong makim olsem ol sumatin bilong klas namba 104 bilong Wastaua Baibel Skul Bilong Gileat ol i winim skul. Dispela bung i kamap long Mas 14, 1998. Ol i singautim ol 4,945 manmeri i kam bung long kirapim dispela bung long singsing bilong Kingdom namba 208, nem bilong en “Singsing Bilong Amamas.”
Gutpela Tok Bilong Helpim Ol Long Stap Amamas
Namba wan hap bilong program i gat 5-pela sotpela tok bilong Baibel bilong givim sampela gutpela tok long olsem wanem ol i ken holim bikpela amamas i kamap long dispela de.
Joseph Eames bilong Dipatmen Bilong Raitim Tok i kamapim namba wan tok. Em i toktok long “Bihainim Pasin Bilong Ol Man i Stap Gut Long God.” As bilong dispela tok em stori bilong Baibel long 2 Samuel sapta 15 na 17, taim Apsalom, em pikinini man bilong Devit, em i pasim tok long kisim kingdom em God i bin givim long papa bilong em na em i kirapim ol manmeri long bikhet long Devit. Tasol i gat sampela man i bin stap gut long man Jehova i bin makim, em King Devit. Dispela stori inap skulim ol nupela misineri long wanem samting? Brata Eames i tok: “Maski yupela i go long wanem wanem hap bilong mekim wok misineri, stap gut long God na wok strong long kamapim pasin bilong i stap daun long ol man Jehova i putim bilong bosim yumi na wok gut wantaim ol. Helpim ol narapela long mekim olsem.”
Bihain long dispela tok, David Sinclair i stori long 10-pela samting em Song 15 i kamapim bambai man i ken stap long haus bilong Jehova. Nem bilong tok bilong em “Wok Long Stap Long Wok Misineri Bilong Yu,” i kirapim ol sumatin i winim skul long bihainim ol tok bilong dispela song long ples wok bilong ol olsem misineri. Brata Sinclair i kamapim long ples klia olsem em i bikpela samting long bihainim ol lo bilong God long olgeta taim. Wanem samting bai kamap sapos ol i mekim olsem? Song 15:5 i tok: “Man i bihainim ol dispela pasin, em i no inap pundaun.”
Bihain John Barr, em wanpela bilong Lain Bilong Bosim Ol Witnes, em i stori olsem pasin bilong mekim singsing long ol miting Kristen i save givim nupela strong long ol brata sista. Tasol wanem singsing i olsem nambawan gutpela singsing i kamap long olgeta hap long nau? Em gutnius bilong Kingdom bilong God long han bilong Krais. Wanem gutpela samting i kamap long dispela singsing, o wok bilong autim tok bilong Kingdom? Namba tu lain bilong singsing namba 208 i tok: “Tok bilong Kingdom yumi mas autim, na planti man bai kam long lain bilong God. Ol tu i singsing, amamas wantaim, ol man i harim long olgeta hap!” Tru tumas, long olgeta de inap olsem 1,000 nupela disaipel i kisim baptais. Brata Barr i pinisim tok bilong em olsem: “Yes ol brata, yumi amamas long save olsem ol i salim yupela i go long ol hap em planti man i wet bambai yupela i ken autim tok long ol.”
Nau James Mantz bilong Dipatmen Bilong Raitim Tok i givim wanpela tok, nem bilong en “Harim Tok Bilong Ol Man i Gat Save.” Em i tok, sampela save yumi inap kisim long wanpela rot tasol, em long ol samting i save painim yumi. (Hibru 5:8) Tasol Sindaun 22:17 i kirapim yumi long ‘putim gut yau long toktok bilong ol man i gat gutpela tingting na save,’ o long ol man i gat save pinis long ol samting. Ol sumatin i winim skul i ken lain long planti samting long ol misineri i go paslain long ol. Brata Mantz i tok: “Ol i save long pasin bilong sutim tok i go i kam wantaim ol papa bilong stua bambai ol i ken kisim ol samting long liklik pe. Ol i save long ol hap bilong taun ol i mas abrusim bambai ol i no ken kisim bagarap long skin o lusim stretpela pasin. Ol i save long ol samting ol asples i save bel hevi long en. Ol misineri i mekim wok bilong ol inap planti yia ol i save long samting yu mas mekim bambai yu ken stap amamas na mekim gut wok long hap yu go long en.”
Wallace Liverance, em kuskus bilong Skul Gileat, em i toktok long “Amamas Long Wok Bilong God Yu Kisim.” Em i tok sampela misineri, olsem aposel Pol, na Timoti, na Barnabas, ol i kisim wok bilong ol long God long rot bilong spirit holi o long wanpela narakain pasin olsem mirakel. Tasol ol misineri i skul long Gileat ol i kisim wanpela ples wok bilong ol long “wokboi i gat gutpela tingting.” (Matyu 24:45-47) Em i tok ples wok bilong ol misineri i wankain olsem ol ples Gideon i makim long ol lain bilong em taim ol i pait long ol Midian. (Hetman 7:16-21) Brata Liverance i tok: “Amamas long wok misineri em God i givim long yupela. Wankain olsem ol soldia bilong Gideon i bin ‘sanap’ long ples em Gideon i makim bilong ol, yupela i mas tingim ples wok bilong yupela i olsem ples yupela i mas i stap long en. Bilip strong olsem Jehova inap mekim wok long yupela olsem em i bin mekim wok long 300 man bilong Gideon.”
Pasin Bilong Tingim Ol Man i Kamapim Amamas
Wanpela Wastaua i bin tok: “Yumi no ken tingim ol nupela masin samting bilong nau olsem namba wan samting long laip bilong yumi, em ol samting i no inap i stap longpela taim. Em i gutpela moa sapos yumi tingim ol man olsem ol i bikpela samting na yumi lain long kisim amamas tru taim yumi mekim ol samting bilong helpim ol narapela.” Stret wantaim dispela tok, Brata Mark Noumair, wanpela tisa bilong Skul Gileat, em i toktok wantaim sampela sumatin long ol samting i bin painim ol taim ol i bin autim tok na em i tok: “Pasin bilong tingim gut ol narapela bai mekim na yupela bai kamap gutpela misineri.”
Ol Bikpela Samting Bilong Kisim Amamas
Wanem sampela bikpela samting bilong helpim yupela bambai wok misineri bilong yupela i ken kamap gutpela na yupela i ken amamas? Brata Charles Woody bilong Dipatmen Bilong Mekim Wok na Harold Jackson, bipo em i wanpela misineri long Latin-Amerika na nau em i wanpela helpim bilong Komiti Bilong Wok Tisa, ol i toktok wantaim sampela brata bilong ol Komiti Bilong Brens, em ol i go long namba 9 klas bilong skul bilong ol brata bilong Komiti Bilong Brens. Nau yumi ken kaunim sampela gutpela tok ol i bin kamapim, olsem:
Albert Musonda bilong Sambia i tok: “Taim wanpela misineri i go pas long sekanim ol brata, dispela i save kamapim gutpela samting, long wanem, ol brata bai pas gut wantaim dispela misineri, na misineri bai pas gut wantaim ol.”
Rolando Morales bilong Guatemala i tok, taim sampela gutpela man i laik givim wanpela dring long nupela misineri, long gutpela pasin em i ken tok: “Mi nupela man long dispela kantri. Mi gat laik tru long kisim, tasol skin bilong mi i no lain yet long dispela dring olsem skin bilong yu i lain pinis. Ating bihain mi inap dring, na mi bai amamas long mekim olsem.” Wanem gutpela samting i save kamap long kain tok olsem? “Ol man i no ken bel hevi, na ol misineri i bin mekim gutpela pasin long ol narapela.”
Wanem samting inap helpim ol misineri long stap strong long wok bilong ol na ol i no ken les? Brata Paul Crudass, em i bin winim namba 79 klas bilong Gileat, na inap 12-pela yia em i bin mekim wok misineri long Laibiria, em i tok: “Mi save, taim ol pikinini i lusim papamama ol papamama i sori long ol pikinini bilong ol. Tasol taim wanpela misineri i wok long lain long kantri na ol samting bilong en, olsem pasin bilong ol man na ol manmeri yet, ating em bai pilim olsem em i laik lusim ples wok bilong em. Sapos nau em i kisim wanpela pas long papamama i tok, ‘Mipela i sori tru long yu; mipela i no save mipela bai mekim wanem, long wanem, yu no stap,’ ating kain tok olsem inap kirapim em long kisim ol samting bilong em na go bek long papamama. Em i bikpela samting long ol famili i stap long hia long nau long tingim dispela samting.”
Bihain long dispela hap bilong program, Theodore Jaracz, em wanpela bilong Lain Bilong Bosim Ol Witnes, em i mekim laspela tok. Nem bilong en: “Larim Kingdom i Stap Olsem Nambawan Bikpela Samting Long Laip Bilong Yupela.” Olsem wanem ai bilong ol misineri i ken lukluk stret i go long wok bilong ol na ol narapela samting i no inap pulim nabaut tingting bilong ol? Em i kirapim ol long stretim gut taim bilong ol long stadi long Baibel, na dispela bai helpim ol long putim yet ol wok bilong Kingdom i go pas long ol narapela wok bilong ol. Na em i givim dispela gutpela tok moa olsem: “Sampela misineri i bin lusim stadi bilong ol yet, long wanem, ol i lusim bikpela hap taim long ol nupela masin na kompyuta samting. Yumi mas save, yumi mas bihainim stretpela tingting taim yumi mekim wok long wanpela masin samting, na yumi no ken lusim bikpela hap taim long wanpela samting em inap pasim yumi long stadi gut long Tok Bilong God.”
Bihain long tok bilong Brata Jaracz ol sumatin i kisim pepa setifiket bilong skul na ol i kaunim wanpela pas em klas i raitim bilong tok tenkyu. Wanpela sumatin i kamapim stret tingting bilong olgeta sumatin bilong klas olsem: “Mipela i lukim sampela samting i kamapim long ples klia pasin sori em Jisas i tok em i olsem mak bilong ol disaipel bilong em, na dispela i strongim mipela long save olsem, maski mipela i stap long wanem wanem hap, i gat wanpela gutpela oganaisesen bilong helpim mipela—em i olsem wanpela mama i gat pasin sori. Taim mipela i tingim dispela gutpela helpim, mipela i redi long go long olgeta hap bilong graun.” Olgeta i pilim tru dispela laspela tok bilong bung em i makim olsem ol sumatin bilong klas namba 104 i winim skul Gileat.
[Blok long pes 24]
Ol Samting Bilong Ol Sumatin
Hamas kantri ol i kam long en: 9
Hamas kantri ol bai go long en: 16
Hamas sumatin: 48
Hamas ol i marit: 48
Krismas bilong ol, averes: 33
Hamas yia long tok i tru, averes: 16
Hamas yia long wok painia, averes: 12
[Piksa long pes 25]
Klas Namba 104 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.
[Piksa long pes 26]
Ol brata i bin skulim ol sumatin long klas namba 104: (kirap long han kais) W. Liverance, U. Glass, K. Adams, M. Noumair