Jisas—Em Hetman “i Bin Kamap Long Bipo Tru”
BEL bilong yu i kirap tru taim yu wetim wanpela wanblut i kamap na yu no bin lukim em inap longtaim tru. Orait bihain em i kamap na yu amamas na sekanim em. Yu putim gut yau taim em i tokim yu olsem i gat wanem as na papa bilong em i salim em i kam lukim yu. Orait kwiktaim tru taim i kamap bilong em i mas i go bek long ples bilong em. Yu bel hevi tru na yu tok gutbai long em. Tasol dispela bel hevi yu bin kisim taim em i lusim yu, em i pinis liklik long taim yu harim tok olsem em i kamap gut long ples.
Bihain, taim yu wok long lukim sampela olpela pas, yu painim sampela pas i stori liklik long ol samting dispela wanblut i bin mekim paslain tru long taim em i lusim ples na i kam bungim yu. Taim yu kaunim stori bilong ol dispela pas, yu kisim sampela save long ol samting bilong i stap bilong em na dispela i mekim na yu amamas tru long em i kam lukim yu, na yu amamas long ol wok em i mekim long nau.
“Long Bipo Tru”
Namel long ol olpela rait ol Juda long taim bilong ol aposel i holim, i gat rait bilong wanpela profet bilong God, em Maika, em i bin raitim olsem 700 yia paslain long dispela taim. Ol dispela rait i makim stret ples Mesaia bai kamap long en. “Yu, Betlehem Efrata, yu liklik tumas bilong ol i ken bungim yu wantaim ol planti tausen bilong Juda, tasol wanpela man bilong yu bai i kamap hetman long Israel, na em i bin kamap long bipo tru, kirap long taim bilong bipo bipo yet.” (Maika 5:2, NW) Na tru tumas, olsem dispela rait i tok, mama i karim Jisas long liklik ples Betlehem long Juda, long yia ol i save kolim long nau olsem yia 2 B.C.E. Tasol olsem wanem em i bin “kamap long bipo tru”?
Taim Jisas i no kamap man yet long graun, em i bin stap long narapela hap. Long pas aposel Pol i bin raitim long ol Kolosi, em i tok Jisas em i “piksa tru bilong dispela God yumi no inap lukim, na God i bin wokim em paslain long olgeta narapela samting.”—Kolosi 1:15, NW.
Taim Jehova, em As bilong gutpela tingting, ‘em i laik wokim ol samting long bipo bipo tru,’ em i wokim namba wan Pikinini bilong em “pastaim”—dispela tok, em spirit bilong God i bin kirapim King Solomon long raitim long Buk Sindaun. Bihain long taim Jisas i kam i stap long graun na em i go bek long heven, em i tokaut olsem “God i bin wokim em paslain long olgeta narapela samting.” Taim Jisas i no kam daun yet long graun, em i makim em yet olsem gutpela tingting na save, na em i tok: “Mi stap wantaim Bikpela long taim em i wokim skai.”—Sindaun 8:22, 23, 27; KTH 3:14, NW.
Taim God i wokim pinis Pikinini bilong em, Em i givim wanpela bikpela wok long em, olsem “saveman i bosim wok,” na em i wok wantaim Papa bilong em. Dispela i givim bikpela amamas tru long Jehova. Sindaun 8:30 i tok: “Olgeta de mi bin mekim em [Jehova] i amamas, long wanem, mi bin amamas tumas long lukim ol samting em i bin wokim.”
Bihain Jehova i singautim Pikinini bilong em long wok wantaim em long wokim ol man bilong graun. Em i tok: “Nau yumi wokim ol manmeri bai ol i kamap olsem yumi yet.” (Stat 1:26) Olsem na Jisas i kisim pasin bilong laikim tumas narapela samting tu, olsem em i tok: “Mi bin amamas long lukim . . . ol manmeri.” (Sindaun 8:31) Long kirap bilong Gutnius em i bin raitim, aposel Jon i tokaut long wok bilong Jisas long wokim ol samting taim em i no kam daun yet long graun: “Long dispela Tok [Jisas] tasol God i mekim kamap olgeta samting. Na i no gat wanpela samting i kamap long narapela rot. Nogat. Olgeta samting i kamap, em Tok yet i mekim kamap.”—Jon 1:3.
Mausman Bilong Jehova
Tok bilong Jon i kamapim klia narapela bikpela wok em Pikinini bilong God i holim, olsem wanpela mausman. Kirap long taim em i bin kamap, em i mekim wok olsem Tok. Olsem na taim Jehova i givim tok long Adam, na bihain taim em i givim tok long Adam wantaim Iv, ating em i bin mekim long rot bilong dispela Tok. Em i save laikim tru ol man bilong graun, olsem na i no gat narapela inap long givim tok bilong God long ol man bilong helpim ol olsem em inap mekim, a?—Jon 1:1, 2.
Taim Tok i lukim Iv, na bihain Adam, ol i bikhet long Man bilong wokim ol, ating dispela i mekim na em i bel hevi tru! Na yumi save em i laik tru long stretim ol hevi em pasin bikhet bilong tupela i bin kamapim long ol pikinini bilong ol! (Stat 2:15-17; 3:6, 8; Rom 5:12) Jehova i givim tok long Satan, em i bin kirapim Iv long bikhet, na Em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri.” (Stat 3:15) Tok i bin lukim dispela samting i kamap long Iden, olsem na em i save Satan bai birua nogut tru long em, long wanem, em i namba wan bilong dispela lain, olsem pikinini, bilong meri. Em i save, Satan em i man bilong kilim ol man i dai.—Jon 8:44.
Bihain, taim Satan i wok long skelim pasin bilong gutpela man Jop long i stap gut long God, ating Tok i belhat stret long ol tok Satan i sutim long Papa bilong em bilong bagarapim gutnem bilong Em. (Jop 1:6-10; 2:1-4) Em nau, long wok bilong em olsem nambawan ensel, i stret ol i kolim Tok olsem Maikel—insait bilong dispela nem i olsem “Husat i Wankain Olsem God?” na i makim olsem em i strong tru long sambai long Jehova na sakim olgeta man i laik kisim wok bilong God olsem nambawan bos.—Daniel 12:1; KTH 12:7-10.
Long taim bilong ol Israel, Tok i lukim Satan i wok strong long pulim ol man i go lusim lotu bilong Jehova. Taim ol Israel i lusim pinis Isip, God i tokim ol Israel long maus bilong Moses: “Harim. Bai mi salim ensel i go pas long yupela bilong lukautim yupela long rot. Na em bai i bringim yupela i go kamap long dispela kantri mi bin redim bilong yupela. Yupela i mas harim gut tok bilong en na bihainim. Yupela i no ken sakim tok bilong en, long wanem, mi yet mi stap wantaim em, na em bai i no inap lusim rong bilong ol manmeri i sakim tok.” (Kisim Bek 23:20, 21) Husat dispela ensel? Yumi ken ting em Jisas tasol, taim em i no kam daun yet long graun.
Em i Daun Long God
Moses i dai long yia 1473 B.C.E., na ol i planim skin bilong em “long wanpela ples daun long Moap long hapsait bilong taun Betpeor.” (Lo 34:5, 6) Ating Satan i laik mekim wok long skin bilong Moses, olsem bilong kirapim ol Israel long mekim pasin olsem lotuim god giaman. Maikel i nolaik tru long dispela samting, tasol em i daun long Papa bilong em Jehova na em i larim dispela samting i stap long han bilong Em, em i Bos. “Maikel i no bikhet, na em i no mekim tok nogut long Satan. Nogat.” Em i givim tok lukaut tasol long Satan olsem: “Bikpela yet i ken krosim yu.”—Jut 9.
Orait bihain ol Israel i kirap long rausim ol birua na kisim Graun Bilong Promis, em Kenan. Klostu long taun Jeriko, Josua i kisim gutpela tok bilong strongim bel bilong em, olsem Tok bai wok yet long lukautim lain Israel. Long dispela hap Josua i bungim wanpela man i holim bainat i stap. Josua i go long em na i askim em olsem: “Yu wanpela soldia bilong mipela o yu wanpela birua?” Ating Josua i kirap nogut taim dispela man i tokaut long em i husat. Em i tokim Josua: “Mi no soldia na mi no birua. Mi kepten bilong ami bilong Bikpela.” Olsem na Josua i brukim skru na putim pes bilong em i go daun long graun klostu long lek bilong dispela mausman bilong Jehova i gat biknem, em Jisas taim em i no kam daun yet long graun, em dispela man bihain bai kamap Mesaia, olsem “dispela bikman God i bin makim.”—Josua 5:13-15; Daniel 9:25.
Long taim bilong profet Daniel tu, Maikel i pait long Satan. Long dispela taim Maikel i kam helpim wanpela wanwok ensel taim spirit nogut bilong bosim kantri Persia i “pasim” rot bilong dispela ensel inap 3-pela wik. Dispela ensel i tok: “Wanpela namba wan ensel, nem bilong en Maikel, em i kam bilong helpim mi, long wanem, em i lukim mi wanpela tasol i stap wantaim ol king bilong Persia, na i no gat man bilong helpim mi.”—Daniel 10:13, 21.
Biknem Long Heven na Long Graun
Long yia 778 B.C.E., em yia King Usia bilong Juda i dai, profet bilong God, em Aisaia, em i kisim wanpela driman na i lukim Jehova i sindaun long sia king bilong em. Jehova i askim olsem: “Bai yumi salim husat? Husat bai i bringim tok bilong mi i go?” Aisaia i tok em bai mekim. Tasol Jehova i toksave long em olsem ol wanlain Israel bai i no inap harim ol tok em i autim long ol. Aposel Jon i tok olsem ol Juda long taim bilong em ol i no bilip, ol i wankain olsem ol man long taim bilong Aisaia, na em i tok: “Aisaia i lukim bikpela namba na strong bilong [em] na em i mekim dispela tok.” Em i lukim bikpela namba na strong bilong husat? Bilong Jehova na Jisas, taim em i stap yet wantaim Jehova long heven na em i no kam daun yet long graun.—Aisaia 6:1, 8-10; Jon 12:37-41.
Sampela handet yia bihain, Jisas i kisim wanpela bikpela wok tru, winim olgeta narapela wok em i bin mekim paslain long dispela taim. Jehova i kisim laip bilong gutpela Pikinini bilong em long heven na putim long bel bilong Maria. Nainpela mun bihain Maria i karim wanpela pikinini man, em Jisas. (Luk 2:1-7, 21) Aposel Pol i tok: “Long taim stret God i bin makim, em i salim Pikinini bilong en i kam. Meri i karim em.” (Galesia 4:4) Na aposel Jon tu i tokaut olsem: “Tok em i bin kamap man, na em i kam i stap namel long mipela. Mipela i lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.”—Jon 1:14.
Mesaia i Kamap
Taim Jisas i gat 12-pela krismas samting, em i kisim save olsem em i mas mekim wok bilong Papa bilong em i stap long heven. (Luk 2:48, 49) Inap 18 yia samting bihain, Jisas i kam long Jon Bilong Baptais long wara Jordan na em i kisim baptais. Taim Jisas i beten i stap, heven i op na spirit holi i kam daun long em. Man! Tingim olgeta samting i kamap long tingting bilong Jisas taim em i tingim planti tausen tausen yia em i bin wok wantaim Papa bilong em olsem saveman i bosim wok, na mausman, na bikman bilong ami bilong God, na nambawan ensel, Maikel. Orait nau em i amamas tru long harim nek bilong Papa bilong em i tokim Jon Bilong Baptais: “Dispela em i Pikinini bilong mi. Mi laikim em tumas. Bel bilong mi em i amamas long em.”—Matyu 3:16, 17; Luk 3:21, 22.
Jon Bilong Baptais i bilip tru olsem pastaim Jisas i bin stap long heven. Taim Jisas i kam long em, Jon i tokaut olsem: “Lukim. Em i Pikinini Sipsip Bilong God. Em i kam bilong tekewe sin bilong olgeta manmeri bilong graun.” Na Jon i tok moa olsem: “Em dispela man tasol bipo mi bin tok long en olsem, ‘Man i kam bihain long mi, em i namba wan bilong mi. Long wanem, em i stap bipo, taim mi no kamap yet.’ ” (Jon 1:15, 29, 30) Aposel Jon tu i save Jisas i bin stap bipo. Em i tok: “Man i kam long heven, em i antap long olgeta samting. Em i save autim tok long ol samting em i lukim pinis na i harim pinis.”—Jon 3:31, 32.
Long yia 61 C.E. samting, aposel Pol i tokim ol Kristen Hibru long pilim tru olsem em i bikpela samting moa yet long Mesaia i bin kamap long graun na em i mekim wok olsem Hetpris. Pol i laik bai ol i tingim wok bilong Jisas olsem Mausman, olsem na em i tok: “Long dispela taim nau, em long taim bilong las de, God i bin autim tok long yumi long maus bilong Pikinini Man bilong em. . . . Long han bilong en God i bin mekim kamap dispela graun tu.” Ating Pol i toktok long wok bilong Jisas olsem “saveman i bosim wok” long taim God i bin wokim olgeta samting, o em i toktok long wok bilong Jisas insait long ol samting God i wok long mekim bambai ol man i ken kamap wanbel gen wantaim em; tasol long dispela tok Pol i mekim, em tu i tokaut olsem taim Jisas i no kamap man yet long graun, em i bin i stap.—Hibru 1:1-6; 2:9.
Em i Stap Gut Long God Kirap Long “Bipo Tru”
Pol i tokim ol Kristen long Filipai: “Yupela i mas holim wankain tingting olsem Krais Jisas i bin holim. Em i . . . no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai.” (Filipai 2:5-8) Jehova i tingim tru pasin bilong Jisas long i stap gut long em, na long pasin sori em i kirapim bek Jisas long matmat na kisim em i go bek long ples bilong em long heven. Tru tumas, kirap long bipo bipo tru Jisas i stap olsem nambawan gutpela piksa long pasin bilong i stap gut long God!—1 Pita 2:21.
Yumi tenkyu tru long Baibel i kamapim sampela stori bilong i stap bilong Jisas long heven taim em i no kam daun yet long graun! Ol dispela tok i strongim yumi na yumi tingting strong long bihainim pasin bilong em long i stap gut long wok bilong God, na long nau yumi strong moa long mekim olsem, long wanem, nau em i stap King bilong Kingdom bilong God. Yes, yumi mas amamas long dispela “King bilong kamapim gutpela sindaun na bel isi,” em Krais Jisas, em Hetman na King bilong yumi, “em i bin kamap long bipo tru”!—Aisaia 9:6; Maika 5:2, NW.
[Blok long pes 24]
Taim Em i No Kamalp Man Yet Long Graun Em i Bin Stap
Tok bilong Jisas yet, olsem yumi lukim daunbilo, i tokaut klia olsem taim em i no kamap man yet long graun em i bin stap:
◻ “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.”—Jon 3:13.
◻ “I no Moses i bin givim bret bilong heven long yupela. Nogat. Papa bilong mi em i save givim bret tru bilong heven long yupela. Dispela bret God i givim, em i lusim heven na i kam daun na i givim laip long ol manmeri bilong graun. Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.”—Jon 6:32, 33, 38.
◻ “Dispela bret i lusim heven na i kam daun, em i bilong ol manmeri i ken kaikai na bai ol i no inap i dai. Mi dispela bret i gat laip na i lusim heven na i kam daun. Sapos wanpela man i kaikai dispela bret, em bai i gat laip i stap oltaim.”—Jon 6:50, 51.
◻ “Sapos yupela i lukim Pikinini Bilong Man i go antap long dispela ples bipo em i stap long en, orait olsem wanem?”—Jon 6:62.
◻ “Ol man i ken bilipim tok bilong mi, long wanem, mi save long ples mi kirap long en na mi kam, na mi save long ples mi bai i go long en. . . . Yupela ol lain bilong daunbilo. Tasol mi, mi bilong antap. Yupela i bilong dispela graun. Tasol mi no bilong dispela graun.”—Jon 8:14, 23.
◻ “Sapos i tru God em i Papa bilong yupela, orait yupela bai i laikim mi, long wanem, mi stap wantaim God na mi kam. Mi no kam long tingting bilong mi yet. Nogat. God i salim mi na mi kam.”—Jon 8:42.
◻ “Tru tumas mi tokim yupela, taim Abraham i no kamap yet, Mi Yet Mi Stap.”—Jon 8:58.
◻ “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu. Papa, mi laik bai ol manmeri yu bin givim long mi ol i ken i stap wantaim mi long ples mi stap long en. Mi laik bai ol i ken lukim bikpela lait na namba bilong mi. Taim graun i no kamap yet, yu laikim mi, na yu bin givim dispela lait na namba long mi.”—Jon 17:5, 24.
[Piksa long pes 23]
Josua i bungim bikman bilong ami bilong Jehova