Askim

Olsem Matyu 17:​20 i tok, ol aposel i no inap oraitim wanpela manki, long wanem, ‘bilip bilong ol em i liklik tumas.’ Tasol Mak 9:​29 i tok, long rot bilong beten tasol ol inap oraitim em. Orait, long dispela tupela hap bilong Baibel, bilong wanem ol i kolim narapela narapela as na ol aposel i no inap oraitim dispela manki?

Long dispela tupela stori, tok bilong narapela i helpim tok bilong narapela, na tupela stori i no pait wantaim. Orait, pastaim lukim Matyu 17:​14-20. Wanpela man i tokim Jisas olsem pikinini bilong em i save kamap longlong na pundaun long graun na ol disaipel bilong em i no inap oraitim pikinini. Orait nau Jisas i rausim wanpela spirit nogut i save bagarapim em na Jisas i oraitim dispela manki. Ol disaipel i askim em long as na ol i no inap rausim dispela spirit nogut. Olsem long stori bilong Matyu, Jisas i bekim olsem: “Bilip bilong yupela em i liklik tumas, olsem na yupela i no inap. Mi tok tru long yupela, sapos yupela i gat bilip inap olsem liklik pikinini bilong dispela kain sayor ol i kolim mastet, orait bai yupela inap tokim dispela maunten hia, ‘Yu kirap na yu go long hap,’ na em bai i go. Na bai i no gat wanpela wok yupela i no inap long mekim.”

Orait nau lukim Mak 9:​14-29 na bai yu lukim sampela tok moa bilong dispela stori. Olsem: Mak 9:17 i soim yumi olsem long dispela taim wanpela spirit nogut i as bilong dispela sik olsem longlong na pundaun long graun. Sampela hap moa bilong Baibel i tok Jisas i bin oraitim dispela kain sik na em i oraitim ol man i gat spirit nogut i stap long skin bilong ol. (Matyu 4:24) Sik bilong dispela manki i narapela kain, long wanem, wanpela “mauspas na yaupas” spirit nogut i mekim​—⁠na tok bilong Dokta Luk i wanbel long dispela. (Luk 9:39; Kolosi 4:14) Yu ken lukim wanpela hap tok long Mak 9:​18, olsem “planti taim dispela spirit i save holim em strong.” Olsem na i no olgeta taim dispela spirit nogut i stap long em na mekim nogut long em​—⁠sampela taim tasol. Tasol ol disaipel i no inap rausim dispela spirit nogut na oraitim manki. Taim ol i askim Jisas long as na ol i no inap rausim spirit nogut, Jisas i tokim ol: “Pasin bilong prea tasol em inap long rausim dispela kain spirit. I no gat narapela rot.”

Tasol taim yu kaunim gut tok bilong Mak, ol dispela tok i no pait wantaim tok bilong Matyu. Long Mak 9:​19, Jisas i tok ol manmeri bilong dispela taim bilong em ol i no bilip. Na long ves 23, Jisas i tokim papa bilong dispela manki: “Sapos yu bilip, yu inap long mekim olgeta samting.” Olsem na Mak tu i kamapim klia olsem bilip i bikpela samting. Tasol long ves 29, Mak i kolim narapela hap tok bilong Jisas. Mak i kolim hap tok bilong Jisas long beten​—⁠em Matyu na Luk i no bin kolim.

Orait yumi ken tok wanem? Long ol narapela taim ol 12-pela aposel na 70 disaipel ol i bin rausim ol spirit nogut long ol man. (Mak 3:15; 6:13; Luk 10:17) Tasol long dispela taim ol disaipel i no inap rausim dispela spirit nogut. Bilong wanem? Sapos yumi tingim olgeta stori bilong dispela samting, yumi mas tok olsem ol i no bin redi gut long mekim dispela wok. Ating wanpela as bilong dispela samting em dispela spirit nogut i narapela kain, long wanem, ol spirit nogut i gat narapela narapela pasin na laik na strong bilong mekim ol samting. Bilong rausim dispela kain spirit nogut, ol i mas i gat strongpela bilip tru na ol i mas beten strong na askim God long helpim ol. Yumi save Jisas i gat dispela kain bilip. Na Papa bilong em, em Man bilong harim beten, em i helpim Jisas. (Song 65:⁠2) Jisas em inap tru long rausim spirit nogut long manki na oraitim em, na em i mekim olsem.