Yu Tingim Yet?
Yu bin tingim gut ol tok bilong ol nupela Wastaua? Sapos olsem, bai yu amamas long tingim bek ol tok i stap daunbilo:
◻ Dispela bilip olsem God i makim pinis ol samting i mas painim yumi bihain, bilong wanem em i no stret?
Sapos God i save pinis olsem Adam bai mekim sin, na God i makim em pinis bilong mekim olsem, orait bai Jehova i kamap as bilong sin taim em i wokim man, na bai em yet i as bilong ol pasin nogut na hevi i painim ol man. Tasol yumi save dispela i no stret, long wanem, Jehova em i God bilong sori na God bilong mekim stretpela pasin na em i nolaik tru long pasin nogut. (Song 33:5; Sindaun 15:9; 1 Jon 4:8)—4/15, pes 7, 8.
◻ Ol manmeri bilong planti kantri i wok long mekim wanem na dispela i truim tok bilong Aisaia 2:2-4?
Ol i kapsait i kam long haus bilong lotuim Jehova, na ol i lusim pinis pasin bilong ‘skul long pait,’ long wanem, ol i bilip olsem ol ami bilong God long heven bai lukautim ol, em ol i redi long pinisim olgeta man i birua long bel isi.—4/15, pes 30.
◻ Ol strongpela soldia bilong God em Joel 3:10, 11 i toktok long en ol i husat?
Inap olsem 280 taim Baibel i kolim trupela God olsem “Jehova bilong ol bikpela lain ami.” (2 King 3:14, NW) Ol dispela ami em strongpela lain ensel long heven em ol i redi i stap bilong mekim laik bilong Jehova.—5/1, pes 23.
◻ Jehova i laik bai Jop i mas beten bilong helpim ol man i bin mekim sin long em na dispela i lainim yumi long wanem samting? (Jop 42:8)
Pastaim long Jehova i ken oraitim sik bilong Jop, em i laik bai Jop i mas beten bilong helpim ol man i bin mekim sin long em. Dispela i makim olsem Jehova i laik bai yumi mas lusim tingting long sin ol narapela i mekim long yumi na bai em i ken lusim tingting long sin bilong yumi. (Matyu 6:12; Efesus 4:32)—5/1, pes 31.
◻ Wanem insait bilong tok bilong Jems, em i tok: “Oltaim yupela i mas sanap strong na karim hevi, bai dispela pasin i ken kamap strong tru long yupela”? (Jems 1:4)
Pasin bilong sanap strong na karim hevi i mas mekim wok bilong en. Wok bilong en i olsem: Em i mas mekim yumi i stap gut na yumi no sot long wanpela pasin bilong God. Olsem na taim ol hevi i kamap long yumi na yumi no mekim wanpela samting i no stret wantaim tok bilong Baibel bilong pinisim kwik ol dispela hevi, bai yumi kisim bilip i winim planti traim na i kamap strong tru.—5/15, pes 16.
◻ Bilong wanem God i bin wet inap longtaim tru long stretim ol hevi bilong ol man?
Tingting bilong Jehova long ol yia samting em i narapela kain long tingting bilong yumi long ol yia samting. God i save stap oltaim oltaim, olsem na long ai bilong God ol yia kirap long taim God i wokim Adam i kam inap nau i olsem 6-pela de tasol. (2 Pita 3:8) Tasol maski yumi gat wanem tingting long ol yia samting, olgeta wan wan de i lus pinis i save bringim yumi i kam klostu moa long taim bilong Jehova long kamapim laik bilong em.—6/1, pes 5, 6.
◻ Wanem samting i save kirapim ol Witnes Bilong Jehova?
Ol tok Jehova i save skulim ol man long en i kamapim wanpela lain i narapela kain tru, em ol i bin skul long laikim tru ol narapela insait long lain bilong ol, na laikim tru ol narapela i stap klostu long ol olsem ol i laikim ol yet. (Aisaia 54:13) Pasin bilong laikim tru ol narapela i save kirapim ol Witnes Bilong Jehova long wok yet long autim tok, maski ol man i les long harim o ol i mekim nogut long ol. (Matyu 22:36-40; 1 Korin 13:1-8)—6/15, pes 20.
◻ Wanem insait bilong tok bilong Jisas olsem: “Yupela i mas taitim bun tru, bilong i go insait long liklik dua”? (Luk 13:24)
Tok bilong Jisas i makim olsem yumi mas taitim bun, na wok strong tru. Tok bilong Jisas i makim tu olsem sampela bai traim long “i go insait long liklik dua” long taim i stret long ol yet, na ol i laik wok isi tasol. Olsem na yumi wan wan i ken askim olsem, ‘Mi save givim bel tru na wok strong?’—6/15, pes 31.
◻ Ol man i kirap bek long matmat, olsem wanem God bai “skelim pasin bilong ol” long ol “tok i stap long ol dispela buk”? (KTH 20:12)
Ol dispela buk i no kamapim ol samting bipo ol i bin mekim, nogat. Taim ol i dai, ol rong ol i mekim bipo taim ol i no dai yet, i tekewe pinis. (Rom 6:7, 23) Tasol sin bilong Adam bai pas yet long ol man i kirap bek. Olsem na ol dispela buk bai kamapim ol tok bilong God em olgeta i mas bihainim, bambai ofa bilong Krais Jisas inap helpim tru ol.—7/1, pes 22.
◻ Yumi lainim wanem samting long dispela tok piksa bilong Jisas long man Samaria i mekim gut long narapela? (Luk 10:30-37)
Tok piksa bilong Jisas i kamapim olsem stretpela man tru em i save bihainim ol lo bilong God, na tu, em i save bihainim ol pasin bilong God. (Efesus 5:1) Tok piksa i kamapim tu olsem yumi mas laikim olgeta man, na yumi no ken tingim ol i bilong narapela kantri, na pasin na sindaun bilong ol i narapela kain, na ol i bilong narapela lotu. (Galesia 6:10)—7/1, pes 31.
◻ Wanem tripela samting inap helpim yu long save gut long ol pikinini bilong yu na long stiaim tingting bilong ol?
(1) Helpim ol pikinini bilong yu long makim wanpela wok mani i gutpela long ol; (2) redim ol long karim ol hevi i save kamap long skul na ples wok; (3) lainim ol long olsem wanem ol inap lukautim ol yet na ol i no ken sot long ol samting bilong spirit.—7/15, pes 4.
◻ I gat wanem as na God i malolo long “de namba 7”? (Stat 2:1-3)
I no olsem strong bilong God i pinis na em i malolo, nogat. Em i lusim wok bilong em long wokim ol samting long graun bambai ol samting em i wokim pinis i ken wok long kamap gutpela tru na givim biknem long em.—7/15, pes 18.
◻ Long wanem tripela rot yumi ken bihainim stretpela pasin?
Namba wan samting: Yumi mas bihainim ol lo bilong God. (Aisaia 1:17) Namba tu samting: Yumi mekim stretpela pasin taim yumi mekim pasin long ol man i wankain olsem pasin yumi laik bai Jehova i mekim long yumi. (Song 130:3, 4) Namba 3 samting: Yumi bihainim stretpela pasin olsem bilong God taim yumi wok strong long autim tok. (Sindaun 3:27)—8/1, pes 14, 15.