Olsem Wanem Man i Olsem God?

BAIBEL i tok: “God i wokim ol manmeri na ol i kamap olsem God yet. God i mekim ol i kamap man na meri.” Wanem insait bilong dispela tok? Olsem wanem namba wan man na meri i kamap olsem God?​—⁠Stat 1:⁠27.

Yu ting skin bilong tupela i wankain olsem bilong God? Nogat. Long wanem, man em i bilong graun, na God em i spirit; em i stap long heven long bikpela lait tru na ol man i no inap i go klostu long em. (Kisim Bek 33:​18-20; 1 Korin 15:50) Orait, olsem wanem man i olsem God? Man inap kamapim ol gutpela pasin olsem bilong God​—⁠God i gat strong, na em i laikim tru ol narapela, na em i mekim stretpela pasin, na savepasin, na ol narapela gutpela pasin.

Ol Pasin Bilong Jehova

Yumi inap lukim ol gutpela pasin bilong Jehova long ol samting em i bin wokim, na yumi inap lukim klia tru long ol samting em i mekim long namba wan man na meri, em Adam na Iv. (Rom 1:20) Em i laikim tru ol man, olsem na em i wokim graun i stret tru bilong man i ken i stap long en. Em i wokim gutpela meri bilong kamap poroman bilong man na mama bilong ol pikinini tupela i kamapim. Em i putim tupela long gutpela ples na givim planti samting long ol inap long ol i stap amamas. Na gutpela samting tru, em i givim rot long ol bilong i stap oltaim.​—⁠Stat 2:​7-9, 15-24.

Yumi lukim savepasin bilong God long traim bilong namba wan man na meri. Sapos tupela i laik i stap insait long famili bilong God na kamapim ol pikinini na i stap oltaim, ol i mas i stap olsem gutpela piksa​—⁠ol i mas i stap gut long God na lotu tru long em. Olsem na God i givim rot long tupela bilong kamapim bel bilong ol. Traim bilong tupela i stret​—⁠tupela i no ken kaikai pikinini bilong diwai bilong givim save long wanem samting i gutpela na wanem samting i nogut. God i mekim savepasin. Ol i mas kamapim klia pastaim, ol i laikim em tru na ol i laik bihainim tok, na bihain bai em i givim ol blesing em i tingting pinis long givim long ol!

Stretpela pasin bilong God i kamap klia long taim em i strong long tupela i mas bihainim ol lo bilong em na em i no senisim lo liklik. Na em i givim rot long tupela bilong mekim pasin i stret. Na taim tupela i mekim pasin i no stret, em yet i mekim stretpela pasin na givim strafe long tupela olsem em i kolim pinis.

Strong bilong God i kamap ples klia long taim em i mekim ol samting em i tok em bai mekim. Bikhetman Satan i tok olsem God i giaman, na em i tok long givim ol bikpela samting long Iv sapos Iv i sakim tok bilong God. (Stat 3:​1-7) Tasol em i no inap truim tok bilong em. Em i no inap pasim God long rausim Adam na Iv long Gaden Iden, na em i no inap pasim God long truim tok em i mekim long Adam, olsem: “Mi bin wokim yu long graun, na bai yu go bek gen long graun.” (Stat 3:19) Tasol tupela i no i dai wantu tasol, na dispela tu i makim olsem God i laikim tru ol man. Em i larim Adam na Iv i kamapim ol pikinini pastaim, na bai ol samting em i laik mekim long ol man long pastaim i ken kamap.​—⁠Stat 1:⁠28.

Na stretpela pasin na sori na strong na savepasin bilong God Jehova i kamap klia long taim em i mekim tok promis long kamapim wanpela pikinini bilong bagarapim ol wok bilong Satan, na pinisim ol hevi i bin kamap long pasin bikhet long wok king bilong Jehova. (Stat 3:15) Man bilong wokim yumi em i gutpela Man tru!

Bihainim Pasin Bilong God

Ol man i no gutpela moa, tasol ol inap kamapim ol pasin olsem bilong God. Olsem na Pol i tokim ol Kristen long taim bilong em: “Yupela i mas bihainim ol pasin [God] yet i save mekim.” (Efesus 5:⁠1) Tasol planti man long bipo, ol i no bin wok long bihainim ol pasin bilong God. Long taim bilong Noa, pasin bilong ol man i go nogut tru na God i bagarapim olgeta manmeri, tasol em i lukautim Noa wantaim lain bilong em na ol i no bagarap. Noa em i “gutpela [stretpela] man, na wokabaut bilong en i stret long ai bilong God,” na em i bihainim olgeta tok bilong God na dispela i kamapim klia olsem em i laikim tumas God.a “Noa i mekim olgeta samting olsem God i tokim em.” (Stat 6:​9, 22) Noa i laikim tumas ol man na stretpela pasin, olsem na em i “tokaut long stretpela pasin.” (2 Pita 2:⁠5) Em i bihainim savepasin, na em i mekim gutpela wok long strong bilong skin bilong em​—⁠em i wokim sip, na bungim kaikai na ol animal long en, olsem God i tokim em. Em i laikim tumas stretpela pasin, olsem na em i no larim pasin nogut bilong ol man i stap klostu i bagarapim gutpela pasin bilong em.

Baibel i stori long planti narapela man ol tu i wok long kamapim ol pasin olsem bilong God. Nambawan man tru long mekim, em Krais Jisas. Em i wankain tru olsem God, olsem na em inap tok: “Man i lukim mi, em i lukim Papa.” (Jon 14:⁠9) Nambawan gutpela pasin bilong Jisas, em i olsem: Em i laikim tru ol narapela. Em i laikim tumas Papa na ol manmeri, olsem na em i lusim heven na em i kamap man long graun; em i mekim stretpela pasin bilong givim biknem long Papa, na tokim ol man long rot bilong God long kisim bek ol. (Matyu 4:23; Jon 13:31) Na em i dai bilong helpim ol man na mekim nem bilong God i kamap holi. (Jon 13:⁠1) Jisas em i gutpela piksa. Sapos yumi laik kamapim ol pasin olsem bilong God, yumi mas bihainim pasin bilong Jisas.​—⁠1 Pita 2:⁠21.

Olsem Wanem Yumi Ken Kamap Moa Yet Olsem God?

Olsem wanem yumi ken kamapim ol pasin bilong God na kamap olsem em long nau? Orait, tingim pasin bilong laikim narapela. Jisas i tok: “Yupela i mas laikim [God] tru long bel . . . na long spirit . . . na long tingting bilong yupela.” Yumi mas mekim wanem bilong makim olsem yumi laikim tru God? Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”​—⁠Matyu 22:37; 1 Jon 5:⁠3.

Tasol bilong bihainim ol lo bilong Jehova, yumi mas save long en. Olsem na yumi mas kaunim Baibel na ol buk na nius bilong Baibel, na yumi mas stadi long en na tingim long bel. Na bai yumi inap tok, olsem man bilong raitim Song: “Mi laikim tru lo bilong yu. Mi save tingting long en long san na long nait.” (Song 119:97) Taim yumi save gut long ol tok bilong Baibel, yumi kisim tingting olsem bilong God. Yumi laikim tumas stretpela pasin na nolaik tru long pasin nogut. (Song 45:⁠7) Adam i kranki long dispela. Em i save long lo bilong Jehova, tasol em i no laikim tumas, olsem na em i no bihainim. Taim yumi kaunim Baibel, oltaim yumi mas askim yumi yet: ‘Olsem wanem mi ken bihainim dispela tok? Olsem wanem mi ken bihainim moa yet ol gutpela pasin bilong God?’

Jisas i tok tu: “Yu mas laikim ol [narapela] olsem yu laikim yu yet.” (Matyu 22:39) Ol man i tingting stret ol i laikim ol yet na mekim gut long ol yet. No gat rong long dispela. Tasol yu mekim olsem long ol narapela? Baibel i tok: “Sapos wanpela man i sot long samting na em i askim yu long givim em . . . sapos yu inap, yu mas givim em.” Yu save mekim olsem?​—⁠Sindaun 3:27; Galesia 6:⁠10.

Olsem wanem long savepasin? Sapos yumi laik kisim gutpela save bai yumi stadi long Baibel, long wanem, gutpela save bilong God i stap long en. Song 119:​98-100 i tok: “Lo bilong yu . . . i givim planti save long mi . . . na mi winim save bilong ol birua bilong mi. Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi. Na save bilong mi i winim save bilong ol lapun.” Na Sindaun 3:18 i tok, gutpela tingting i olsem “diwai bilong givim laip.” Sapos yumi kisim gutpela tingting na bihainim savepasin, bai God i orait long yumi na givim laip i stap oltaim long yumi.​—⁠Saveman 7:⁠12.

Olsem wanem long stretpela pasin? Yumi stap namel long ol man i mekim pasin nogut, olsem na yumi mas mekim stretpela pasin bambai God i ken orait long yumi. Jisas i laikim stretpela pasin, na em i no laikim tru pasin nogut. (Hibru 1:⁠9) Long nau ol Kristen i mekim olsem. Dispela i kirapim ol long laikim ol gutpela pasin. Ol i klia long ol pasin nogut bilong dispela graun, na givim bel tru long bihainim laik bilong God.​—⁠1 Jon 2:​15-17.

Yumi olgeta i gat hap strong bilong skin na tingting, na taim yumi wok long kamap strongpela Kristen, yumi kisim strong bilong spirit tu. Jehova i givim spirit holi long yumi bilong strongim yumi, olsem na maski i olsem yumi no gat strong, yumi inap mekim wok bilong em. Pol i tok: “Long strong bilong [God] mi inap mekim olgeta samting.” (Filipai 4:13) Yumi tu inap kisim dispela strong sapos yumi beten askim God long givim spirit holi long yumi.

Autim Tok Bilong Kingdom

Yumi kamapim dispela 4-pela pasin bilong God long taim yumi bihainim dispela tok: “Go mekim olgeta lain manmeri i kamap disaipel bilong mi . . . baptaisim ol . . . lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:​19, 20) Dispela wok bilong skulim ol man i givim laip long ol man i harim na bilip. Taim yumi mekim dispela wok, yumi kamapim klia olsem yumi laikim tru ol man em pastaim yumi no save long ol!

Na taim yumi skulim ol man olsem, yumi bihainim savepasin. Em i kamapim kaikai bilong i stap oltaim. “Long wok bilong yu God bai i kisim bek yu yet, na . . . ol manmeri i save harim tok bilong yu”​—⁠no gat narapela wok inap mekim olsem. (1 Timoti 4:16) Wok bilong kamapim ol disaipel i helpim yumi olgeta​—⁠ol man i skulim ol narapela na ol man i harim tok, ol i kisim ol blesing bilong oltaim.

Na yumi save lainim ol disaipel long ol gutpela stretpela pasin. Yumi helpim ol long mekim wok bilong Jehova, em i “God i save mekim stretpela pasin.” (Malakai 2:17) Ol man long nau i dediket long God na mekim wok bilong em na stap gut long wok, God i kolim ol stretpela man, na ol inap abrusim bagarap long Armagedon.​—⁠Rom 3:24; Jems 2:​24-26.

Wok bilong autim tok bilong Kingdom long olgeta hap bilong graun em i kamapim long ples klia bikpela strong tru! (Matyu 24:14) Ol man i mas sanap strong bambai ol inap autim tok oltaim long ples i gat planti man i no laik harim tok. Tasol Jehova i givim strong long ol long rot bilong spirit holi, na bai ol inap i stap strong i go inap long las de.​—⁠Aisaia 40:​30, 31; Matyu 24:13; Luk 11:⁠13.

Tru, yumi sinman bilong lain bilong Adam na yumi no inap bihainim tru ol gutpela pasin. Tasol God i wokim yumi i kamap olsem em, na sapos yumi wok strong long bihainim moa yet ol pasin bilong em, orait yumi mekim gutpela wok long laip bilong yumi. (Saveman 12:13) Sapos yumi wok strong na mekim ol samting inap tru long strong na save bilong yumi, na taim yumi popaia, yumi beten askim God long lusim rong bilong yumi, orait, yumi ken tingting long abrusim bagarap na i stap long nupela taim God bai kamapim, i gat stretpela pasin tasol long en. Long dispela taim bai yumi kamap gutpela olgeta. Bai yumi stap long Paradais long graun wantaim olgeta gutpela manmeri i kamapim tru ol pasin bilong God Jehova. Bai yumi amamas tru! Tru tumas, bihain bai ol man i kamap olsem God.

[Ol Futnot]

[Piksa long pes 25]

Jisas i soim rot long yumi bilong bihainim ol pasin bilong God

[Piksa long pes 26]

Tru tumas, bihain bai ol man i kamap olsem God