Yu Inap Bilip Long Maus Bilong Bel o Nogat?

PLANTI taim, kompas em i wanpela samting yumi inap bilip long en. Wanpela strong bilong graun, olsem magnet, i save bosim han bilong kompas na long olgeta taim em i save makim hap bilong not. Olsem na ol man bilong raun i go long ol narapela narapela hap ol inap larim kompas i soim rot long ol taim i no gat wanpela mak, olsem maunten o kain samting olsem, bilong soim rot long ol. Tasol taim ol i putim wanpela samting i gat magnet long en i stap klostu long dispela kompas, wanem samting bai kamap? Han bilong en bai sut i go long hap bilong dispela magnet na em i no makim moa hap bilong not. Em nau, ol i no inap bilip moa long dispela kompas bilong soim rot long ol.

Kain samting olsem inap kamap long maus bilong bel bilong yumi. Man bilong wokim yumi em i bin putim maus bilong bel insait long yumi bilong stiaim gut yumi. God i bin wokim ol man i kamap olsem em yet, olsem na long olgeta taim maus bilong bel i mas makim rot stret taim yumi laik skelim ol samting yumi mas mekim. Em i mas kirapim yumi long tingim ol stretpela lo bilong God. (Stat 1:27) Planti taim maus bilong bel i save mekim olsem. Aposel Pol i bin tok, sampela man i no gat lo bilong God, “tasol long tingting bilong ol yet sampela bilong ol i save bihainim pasin bilong lo.” Bilong wanem? Long wanem, “tingting [olsem bel] bilong ol dispela man bai i kotim ol long pasin ol i bin mekim.”​—⁠Rom 2:​14, 15.

Tasol i no olgeta taim maus bilong bel i save tokaut taim em i gat wok long mekim. Yumi gat sin, olsem na sampela taim yumi mekim ol samting yumi save i no stret long mekim. Pol i tokaut olsem: “Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” (Rom 7:​22, 23) Sapos planti taim yumi larim ol tingting i no stret i bosim yumi, ating isi isi maus bilong bel i no inap pilim moa dispela samting, na bihain em i no ken tokim yumi moa olsem dispela kain pasin em i no stret.

Tasol maski yumi gat sin, yumi inap mekim na bai maus bilong bel i stret wantaim ol lo bilong God. Em i bikpela samting long yumi mas mekim olsem. Taim yumi skulim gut bel bilong yumi na bel i stap klin, bai yumi inap pas gut wantaim God; na tu, yumi mas mekim olsem bambai yumi ken kisim laip i stap oltaim. (Hibru 10:22; 1 Pita 1:​15, 16) Na narapela samting tu, taim bel bilong yumi i no gat tok, dispela bai helpim yumi long bihainim gutpela tingting taim yumi skelim ol samting yumi mas mekim long i stap bilong yumi, na dispela bai helpim yumi long i stap bel isi na amamas. Man bilong raitim song i stori long man i gat kain maus bilong bel olsem, na em i tok: “Lo bilong God i stap long bel bilong en, na em i save bihainim God, na i no save lusim dispela lo.”​—⁠Song 37:⁠31.

Skulim Maus Bilong Bel

Bilong skulim maus bilong bel, i no olsem yumi lain long putim planti lo bilong God long tingting na nau yumi bihainim stret ol dispela wan wan lo, nogat; i no dispela samting tasol yumi mas mekim. Ol Farisi long taim bilong Jisas ol i bin mekim olsem. Ol dispela hetman bilong lotu ol i save pinis long Lo Bilong Moses, na ol i bin wok long kamapim sampela lo bilong ol man i kolim planti samting ol man i mas bihainim​—⁠ol i tok dispela bai helpim ol man na ol i no ken kalapim Lo Bilong Moses. Olsem na taim ol disaipel bilong Jisas i kisim sampela pikinini bilong wit long gaden long de Sabat na ol i kaikai, kwiktaim ol dispela Farisi i kirap toktok planti long dispela samting. Na ol i tok pait wantaim Jisas taim em i oraitim wanpela man long de Sabat, em han bilong en i dai pinis. (Matyu 12:​1, 2, 9, 10) Long ol dispela lo ol Farisi i bin kamapim, tupela samting Jisas na ol disaipel i bin mekim i brukim namba 4 bilong Tenpela Lo.​—⁠Kisim Bek 20:​8-​11.

Yumi save, ol Farisi i bin stadi long Lo Bilong Moses. Tasol yu ting maus bilong bel bilong ol i stret wantaim ol lo bilong God? Nogat tru! Bihain stret long taim ol i toktok planti long samting ol i ting em i pasin bilong brukim lo bilong Sabat, ol Farisi i bung na wokim toktok “bilong painim rot long kilim Jisas i dai.” (Matyu 12:14) Tingim dispela samting: Ol dispela hetman bilong lotu i tingim ol yet i stretpela man na ol i bel nogut tru long pasin bilong kisim pikinini bilong wit na kaikai na long pasin bilong oraitim man long de Sabat; tasol bel bilong ol i no gat tok long bung na wokim toktok bilong kilim Jisas i dai!

Ol bikpris i kamapim wankain tingting nogut. Ol dispela man nogut i no pilim liklik olsem ol i gat asua taim ol i kisim 30 mani silva long bokis mani bilong haus lotu na ol i laik givim long Judas bilong em i ken kamapim Jisas. Tasol taim Judas i bekim mani long ol na em i tromoi i go bek insait long haus lotu, orait nau maus bilong bel bilong ol dispela bikpris i mas skelim wanpela samting bilong lo. Ol i tok: “Dispela mani em i pe bilong kilim man i dai. Yumi no ken putim wantaim mani bilong tempel.” (Matyu 27:​3-6) Ating ol dispela bikpris i tingting planti olsem nau mani bilong Judas i no klin. (Skelim wantaim Lo 23:18.) Tasol dispela lain yet i ting i no gat rong long tromoi mani bilong baim man long kamapim Pikinini bilong God long ol birua!

Tingting i Stret Wantaim Tingting Bilong God

Stori bilong dispela lain i kamapim klia olsem: Bilong skulim gut maus bilong bel, i no olsem yumi mas lain long planti lo, olsem ol samting yumi ken mekim o yumi no ken mekim, na em tasol, nogat; yumi mas mekim sampela samting moa. Tru, yumi mas kisim save long ol lo bilong God, na yumi mas bihainim ol dispela lo bambai yumi ken kisim laip i stap oltaim. (Song 19:​7-​11) Tasol i gat narapela samting tu yumi mas mekim​—⁠yumi mas skulim bel bilong yumi na bai ol tingting bilong bel i stret wantaim tingting bilong God. Orait nau tok profet Jehova i mekim long maus bilong Aisaia bai kamap tru long yumi, em i tok: “Bai yupela i lukim [Jehova] long ai bilong yupela yet. Na taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.”​—⁠Aisaia 30:​20, 21; 48:⁠17.

Tasol dispela i no makim olsem taim yumi mas skelim wanpela bikpela samting, wanpela nek bai tokim yumi long samting yumi mas mekim, nogat. Tasol taim tingting bilong yumi i stret wantaim tingting bilong God long ol samting, orait maus bilong bel inap helpim yumi long skelim gut ol samting yumi mas mekim na God i ken amamas long en.​—⁠Sindaun 27:⁠11.

Yumi ken tingim Josep, em i bin stap olsem 1,700 yia samting paslain long Krais. Taim meri bilong Potifar i laik pulim em long mekim pasin pamuk wantaim em, Josep i no laik mekim. Em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:⁠9) Long taim bilong Josep, i no gat wanpela lo bilong God ol i bin raitim na i tok pasin pamuk i no stret. Na tu, Josep i sindaun long Isip na em i stap longwe tru long famili bilong em, olsem na em i no gat lo bilong famili long skulim em o ol lo bilong papa. Olsem na wanem samting i helpim Josep long sakim dispela traim? Em i bin skulim maus bilong bel. Josep i bin kisim tingting bilong God olsem man wantaim meri bilong em i mas kamap “wanpela bodi tasol.” (Stat 2:​24) Olsem na em i save, i no stret long kisim meri bilong narapela man. Tingting bilong Josep i stret wantaim tingting bilong God long dispela samting. Long bel bilong em, pasin pamuk em i wanpela rong.

Long nau i no gat planti man i kain olsem Josep. Pasin pamuk i go bikpela tru, na planti man i no pilim olsem ol i gat wok long i stap stret, long wanem, ol i mas tingim Man bilong wokim ol, o ol yet, o poroman marit bilong ol, nogat. Dispela pasin i stap long nau em i wankain olsem buk Jeremaia i stori long en: “I no gat wanpela man i tanim bel na i tok, ‘Olaman. Mi mekim bikpela sin tru.’ Nogat. Olgeta i strong tru long bihainim laik bilong ol yet, olsem ol soldia i sindaun long hos na i ran strong long pait.” (Jeremaia 8:⁠6) Olsem na yumi gat bikpela wok moa yet long mekim tingting bilong yumi i stret wantaim tingting bilong God. Yumi gat wanpela gutpela samting tru bilong helpim yumi long mekim olsem.

Helpim Bilong Skulim Maus Bilong Bel

Ol tok bilong Baibel i “gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:​16, 17) Taim yumi stadi long Baibel, dispela bai helpim yumi long skulim tingting bilong yumi na bai yumi inap skelim wanem ol pasin i gutpela na wanem ol pasin i nogut. (Hibru 5:​14) Em bai helpim yumi long kisim pasin bilong laikim tru ol samting God i save laikim tru na nolaik tru long ol samting em i nolaik tru long en.​—⁠Song 97:10; 139:⁠21.

Olsem na taim yumi stadi long Baibel, yumi mas wok strong long pilim insait bilong tok na pilim ol bikpela samting bilong tok i tru​—⁠nogut yumi tingting tasol long kisim save long olgeta liklik liklik tok bilong Baibel. Wastaua (tok Inglis) bilong Septemba 1, 1976, i tok: ‘Taim yumi stadi long Baibel, yumi mas wok strong long pilim gut stretpela pasin na pasin sori bilong God na putim i go daun tru long bel bilong yumi na bai ol i kamap olsem pasin bilong yumi yet, wankain olsem pasin bilong yumi long kaikai na pulim win. Yumi mas wok strong long kirapim tingting bilong yumi long pilim tru olsem yumi gat wok long bihainim stretpela pasin, na bilong mekim olsem, yumi mas wok long kisim pasin bilong pilim tru wanem samting i stret na wanem samting i no stret. Na tu, yumi mas strong long kirapim maus bilong bel long pilim tru wok bilong en long bihainim tok bilong nambawan Jas na Man bilong givim lo. (Ais 33:22) Olsem na taim yumi lain long sampela samting bilong God, yumi mas wok strong long bihainim pasin bilong em long olgeta samting long i stap bilong yumi.’

Kisim “Tingting Bilong Krais”

Na taim yumi stadi long Baibel, dispela bai helpim yumi long kisim “tingting bilong Krais,” em tingting bilong bihainim tok na mekim pasin daun, olsem Jisas i bin mekim. (1 Korin 2:​16) Em i amamas tru long mekim laik bilong Papa bilong em​—⁠i no olsem wanpela samting em i mekim tasol na em i no tingim pastaim, nogat. Devit, em man bilong raitim song, em i mekim tok profet i stori long tingting bilong Jisas, olsem: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”a​—⁠Song 40:⁠8.

Yumi mas kisim “tingting bilong Krais” bambai yumi ken skulim maus bilong bel. Taim Jisas i stap long graun olsem wanpela man i gutpela olgeta, em i kamapim ol pasin bilong Papa bilong em inap tru long wanpela man bilong graun i ken mekim. Olsem na em inap tok: “Man i lukim mi, em i lukim Papa.” (Jon 14:⁠9) Long olgeta samting i bin painim em long graun, em i mekim ol samting Papa bilong em i laik bai em i mekim. Olsem na taim yumi stadi long ol samting bilong i stap bilong Jisas, yumi klia gut long pasin bilong God Jehova.

Baibel i tok, Jehova em i God bilong ‘marimari na sori. Na em i no save belhat kwik. Em i save laikim tru olgeta manmeri.’ (Kisim Bek 34:⁠6) Planti taim Jisas i kamapim ol dispela pasin long ol samting em i mekim long ol aposel bilong em. Planti taim ol i bin tok pait long husat i stap namba wan namel long ol, tasol long pasin isi Jisas i skulim ol long maus na long pasin bilong em olsem “man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.” (Matyu 20:​26, 27) Em nau, dispela stori i soim yumi olsem taim yumi stadi long ol tok bilong Baibel long i stap bilong Jisas, yumi inap kisim tingting i stret wantaim tingting bilong God.

Taim yumi wok long kisim sampela save moa long ol samting bilong Jisas, dispela bai inapim yumi moa yet long bihainim pasin bilong Papa bilong yumi long heven, Jehova. (Efesus 5:​1, 2) Taim maus bilong bel i stret wantaim tingting bilong God, em bai stiaim yumi i go long stretpela rot. Jehova i tok promis long ol man i bilip long em: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”​—⁠Song 32:⁠8.

Maus Bilong Bel i Skul Pinis Em i Helpim Yumi

Moses i save pinis long pasin bilong ol man bilong graun long bihainim laik nogut bilong ol yet, olsem na em i givim toksave long ol Israel olsem: “Yupela i mas lukaut gut na bihainim olgeta dispela lo nau mi givim yupela. Na yupela i mas toksave long ol pikinini bilong yupela, olsem bai ol tu i ken bihainim olgeta tok bilong God oltaim.” (Lo 32:46) Yumi tu i mas raitim lo bilong God long bel bilong yumi. Sapos yumi mekim olsem, orait maus bilong bel bai stiaim gut wokabaut bilong yumi na helpim yumi long skelim stret ol samting yumi tingting long mekim.

Tasol yumi mas was gut. Baibel i tok: “Sampela man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go, na bihain bai ol i dai.” (Sindaun 14:12) Bilong wanem dispela kain samting i save kamap planti taim? Long wanem, i olsem Baibel i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:⁠9) Olsem na yumi olgeta i gat wok long bihainim tok bilong Sindaun 3:​5, 6, i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”

[Futnot]

[Piksa long pes 7]

Maus bilong bel em Baibel i skulim pinis, em i olsem kompas​—⁠em inap makim stretpela rot yumi mas bihainim

[Kredit Lain]

Kompas: Courtesy, Peabody Essex Museum, Salem, Mass.