Bilong Wanem Ol i Pait?

LONG Denva, Kolorado, Amerika, wanpela meri i karim wanpela nupela pikinini hariap tumas inap olsem 27 wik. Inap 3-pela mun dispela pikinini i stap long haus sik, na bihain ol i kisim em i go bek long haus. Tripela wik bihain long dispela, pikinini i kam bek long haus sik. Bilong wanem em i kam bek? Long wanem, taim pikinini i krai, papa bilong em i no laikim tru na em i seksekim em strong na kru bilong pikinini i bagarap. Pikinini i kamap aipas na hap skin bilong em i kamap nogut. Tru, ol dokta i helpim em taim mama i karim em hariap tumas na em i no i dai, tasol sori tru, ol i no inap helpim em long abrusim bagarap em i bin kisim long han bilong papa bilong em.

Planti pikinini i kisim bagarap o i dai long han bilong papamama bilong ol! Sampela man i ting, long olgeta yia long Amerika, 5,000 pikinini i dai long han bilong papamama! Na i no ol pikinini tasol i kisim bagarap. Nius World Health i tok, long Amerika, ‘namba wan as na ol meri i yangpela liklik ol i kisim bagarap, em man bilong ol i paitim ol.’ Na olsem wanem long ol narapela kantri? ‘Long ol kantri i stap rabis, wanpela long olgeta tupela tupela meri ol i skelim, ol i tok, man bilong ol i bin paitim ol.’ Tru tumas, pasin bilong pait i save kamap bikpela insait long famili.

Planti marit ol i wok long stretim kros bilong ol long rot bilong pait. Long sampela kantri, taim papamama o tisa i kros, ol i save paitim pikinini. Na bilong kisim amamas tasol, sampela bikhetmanki i save paitim ol manki i no strong tumas. Wanem samting i save kirapim ol man na ol i pait na bagarapim man?

Samting i Mekim na Ol i Pait

Sampela i tok, taim mama i karim yumi, laik bilong mekim pait i stap pinis long skin bilong yumi. Tru, long Amerika pasin raskol na bagarapim man i no bikpela olsem bipo, tasol namel long ol yangpela, dispela pasin i go bikpela. Na planti man moa yet i save amamas long harim stori bilong pait na bagarapim man. Tripela nambawan bikpela televisen-stesin long Amerika i kamapim planti piksa moa i stori long pait na kilim man i dai. Em nau, ol bisnis i save kisim planti mani long rot bilong ol piksa i kamapim pait. Karl Menninger, em wanpela dokta bilong stretim sik bilong tingting, em i tok, ‘yumi save putim ol stori bilong pait long namba wan pes bilong ol nius. Na long televisen yumi save kamapim planti stori bilong pait bilong amamasim ol pikinini. Tru tumas, yumi gat bikpela laik long harim ol stori bilong pasin raskol.’

Nau tasol ol saveman i kisim save olsem kru bilong man na i stap bilong famili, dispela tupela samting inap kirapim man long pait. Dokta Markus J. Kruesi i wok long Yunivesiti Bilong Ilinoi Bilong Skelim Pasin Bilong Ol Yangpela, na em i tok: ‘Mipela i kisim save olsem sapos i stap bilong famili i no gutpela, dispela inap kirapim ol yangpela long kisim pasin bilong pait.’ Buk Inside the Brain (Insait Long Kru Bilong Man) i tok: ‘Ol samting i kamap long i stap bilong man, dispela inap senisim sampela samting bilong kru bilong man na nau em i kirap kwik na mekim ol samting​—⁠em i no save tingting gut pastaim.’ Ol samting olsem ‘famili i bruk, na papa o mama tasol i lukautim pikinini, na pasin bilong i stap rabis, na kisim drak oltaim, ol dispela samting inap kamapim senis insait long kru na i kirapim man long bihainim pasin bilong pait​—⁠em samting bipo ol man i ting i no inap kamap.’

Wanpela senis ol i tok inap kamap long kru, i olsem: Marasin serotonin long kru i wok long go liklik​—⁠ol i ting dispela marasin i gat wok long daunim pasin bilong bel i kirap long pait. Na ol i kisim save olsem bia na wain samting inap mekim marasin serotonin long kru i go liklik. Em nau, i gat as tru na longtaim pinis ol saientis i bin tokaut olsem man i dring planti tumas em i save pait.

Tasol i gat narapela samting i mekim na pasin bilong pait i go bikpela long nau. Baibel, em buk bilong tokaut long ol samting bai kamap bihain, em i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut . . . Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. . . . Yu mas stap longwe long ol dispela kain man.” (2 Timoti 3:​1-5) Em nau, pasin bilong pait yumi lukim long nau em i truim dispela tok profet bilong Baibel i toktok long “taim bilong las de.”

Na i gat narapela samting i mekim na dispela taim yumi stap long en em i taim bilong pait na bagarapim man. Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Satan na ol ensel nogut bilong em ol i raus long heven na i kam daun long graun na nau ol i wok strong long mekim nogut long ol man. Satan em i “hetman bilong ol spirit nogut i stap long skai, em dispela strongpela spirit i wok yet insait long bel bilong ol man i save sakim tok bilong God,” olsem na pasin bilong pait i wok long kamap bikpela moa yet long graun.​​—⁠Efesus 2:⁠2.

Orait olsem wanem yumi inap karim ol hevi i save kamap long pasin bilong pait long nau? Na olsem wanem yumi inap stretim ol hevi i kamap namel long yumi wantaim ol narapela, na yumi no stretim long rot bilong pait?

[Rait long pes 3]

Planti pikinini i kisim bagarap o i dai long han bilong papamama bilong ol!