Ol i Wanbel Long Bihainim Nambawan Gutpela Rot

Ol i Wanbel Long Bihainim Nambawan Gutpela Rot

Sapos ol manmeri i wok yet long kamap planti, i no longtaim na bai i gat 6 bilion manmeri i stap long graun. Maski olgeta man i bin kamap long rot bilong wanpela tumbuna tasol, planti i no ting ol i insait long wanpela famili i stap long olgeta hap bilong graun na ol i gat wok long bihainim tok bilong Man bilong wokim yumi, em i gat gutpela tingting na pasin sori. Pasin birua na pait i stap namel long ol kantri, na ol lain i gat narapela narapela skin, na ol lain bilong narapela narapela sindaun i kamapim klia olsem ol man i stap nogut tru.

TAIM yumi tingim ol pasin nogut bilong nau, ating bai yumi tok ol man i no inap kamapim pasin wanbel long olgeta hap bilong graun. Wanpela buk (The Columbia History of the World) i tok: “Long dispela bikpela askim long olsem wanem ol manmeri i ken stap wanbel wantaim, i no gat wanpela man long nau i painim wanpela nupela rot bilong kamapim dispela samting, nogat tru.”

Tasol bilong kamapim pasin wanbel namel long olgeta manmeri bilong graun, i no olsem yumi mas painim wanpela nupela rot. Baibel i kamapim pinis rot ol man i mas bihainim bilong i stap wanbel. Pasin bilong lotuim Man bilong wokim graun na olgeta samting i gat laip i stap long en, em i bikpela samting bilong helpim ol man long i stap wanbel. Ol manmeri bilong God ol i stap wanbel pinis long tingting, na laik, na pasin bilong ol. Ol i inap olsem 5.5 milion na ol i stap long 233 kantri, ol i wanbel tru long bilip olsem, rot God i makim em i nambawan gutpela rot bilong bihainim. Olsem man bilong raitim Song, ol i beten olsem: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.”—⁠Song 86:⁠11.

Long bipo yet profet Aisaia i bin tok olsem ol manmeri bai stap wanbel wantaim long mekim lotu i tru. Em i tok: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en. Ol lain manmeri bilong olgeta hap bai i tok olsem, ‘Kam yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ”—⁠Aisaia 2:⁠2, 3.

Pasin wanbel namel long ol Witnes Bilong Jehova em i narapela kain. Long olgeta hap, insait long 87,000 samting kongrigesen, ol i save kisim wankain kaikai bilong spirit long ol miting bilong ol long olgeta wik. (Matyu 24:45-47) Tasol kirap long Jun 1998 na i go inap long Janueri 1999, ol Witnes i kamapim pasin wanbel bilong ol long narapela rot. Ol i kam bung long ol 3-pela de kibung, “Bihainim Rot God i Makim,” ol i bin kamap long olgeta hap bilong graun. Long 13 kantri, ol brata sista bilong ol narapela narapela hap ol i bin kam, na ol i kolim ol dispela kibung olsem ol kibung intenesenel. Ol narapela kibung em ol kibung distrik. Tasol olgeta dispela kibung i kamapim wankain program i gat ol gutpela samting bilong spirit long en.

Em i gutpela tru long lukim ol manmeri i amamas, na bilas gut, ol i go insait long ol haus bilong mekim kibung na ol ples kibung bambai Jehova i ken skulim ol! Wanpela sista i go long kibung intenesenel long Misigen, Yunaitet Stets, em i kamapim tingting bilong em olsem: “Em i gutpela samting tru long lukim ol brata bilong yumi bilong olgeta hap bilong graun—⁠bilong Ripablik Sek, Babedos, Naijiria, Hangari, Inglan, Holan, Itiopia, Kenya, na planti narapela kantri—⁠ol i holimpas narapela narapela! Em gutpela tru long lukim ol brata sista i stap wanbel wantaim, na aiwara bilong amamas i pundaun, long wanem, narapela i laikim tru narapela na ol i laikim tru bikpela God bilong ol, em Jehova.” Narapela stori hia bai kamapim ol tok bilong program bilong kibung em planti milion long olgeta hap ol i bin amamas long harim.

[Piksa Kredit Lain long pes 3]