Sampela Hevi bilong Ol Famili i Gat Nupela Papa o Mama
FAMILI I GAT NUPELA PAPA O MAMA OL INAP I STAP AMAMAS! OLSEM WANEM?
Long nau, long olgeta hap bilong graun planti famili i gat nupela papa o mama. Ol dispela famili i gat sampela hatwok i narapela kain. Samting i gat hatwok tru long en, em wok bilong mekim bikpela long ol pikinini. Tupela stori i kamap bihain long dispela bai stori long dispela samting. Papamama bai soim olsem, maski famili i gat nupela papa o mama, ol inap mekim gut wok bilong mekim bikpela long ol pikinini.
OL MAN I NO SAVE MEKIM GUTPELA TOK LONG OL NUPELA PAPA NA MAMA. TAIM YUMI PIKININI, sampela bilong yumi i bin harim stori nating bilong wanpela yangpela meri, nem bilong em Sindarela, em nupela mama bilong em i bin mekim nogut tru long em. Ol pikinini long Yurop i lain tu long narapela stori nating (Snow White and the Seven Dwarfs). Nupela mama bilong yangpela pikinini meri long dispela stori em i wanpela meri nogut tru—em wanpela sangumameri!
Olsem wanem? Kain stori olsem i givim stretpela tingting long yumi long ol famili i gat nupela papa o mama? Olgeta nupela papa o mama i nogut olsem? Nogat. Klostu olgeta nupela papa o mama i laik ol pikinini ol i kisim long nupela poroman marit ol i ken stap gut. Tasol bai ol i gat sampela hatwok i save kamap insait long ol famili i gat nupela papa o mama.
Ol Hevi Bilong Mekim Bikpela Long Ol Pikinini
Taim namba wan marit i bagarap, planti taim as bilong dispela em tupela poroman marit ol i no gat pasin na tingting olsem man i bikpela pinis. Taim ol i maritim nupela poroman, pasin bilong lukautim ol pikinini inap kamapim hevi insait long marit. Sampela ripot i kamapim olsem long olgeta 10-pela 10-pela famili i gat nupela papa o mama, inap 4-pela i save brukim marit insait long 5-pela yia.
Ating ol nupela marit i no save long samting nupela poroman i mekim long ol pikinini bilong poroman ol i maritim, olsem: Bel bilong pikinini i bagarap tru, na pikinini i pilim olsem em i mas i stap gut long papa o mama tru bilong em na em i no ken laikim tumas nupela papa o mama, na ol pikinini i bel nogut na tingting nogut long nupela papa o mama. Ating ol dispela pikinini i ting olsem papa o mama tru bilong ol em i laikim moa nupela papa o mama na em i no laikim tumas ol. Na tu, ating papa o mama tru i no inap pilim gut as na ol pikinini i laikim yet poroman marit bilong em long bipo i bin lusim em. Wanpela manki i traim long kamapim as na em i pas gut wantaim papa tru bilong em, na em i tok: “Mama, mi save Papa i bin mekim nogut long yu, tasol em i bin mekim gutpela pasin long mi!” Maski dispela tok i tru, kain tok olsem inap mekim na mama i bel nogut long papa tru bilong pikinini.
Wanpela nupela papa i tok: “Mi no bin redi gut long karim ol hevi i save kamap long mekim bikpela long ol pikinini bilong nupela poroman marit bilong mi. Mi bin ting olsem, mi maritim mama bilong ol, olsem na nau mi papa bilong ol—na em tasol. Mi ting dispela i no hatwok! Mi no bin tingim i stap bilong ol pikinini wantaim papa tru bilong ol, em ol i laikim em tumas, na mi popaia planti taim.”
Ol hevi inap kamap tu long ol samting bilong stretim pikinini. Papa na mama i mas stretim ol pikinini long pasin sori, tasol planti taim ol pikinini i bikhet long dispela, maski em papa o mama tru i stretim ol. Na sapos nupela papa o mama i stretim ol bai ol i bikhet moa yet! Taim nupela papa o mama i stretim pikinini bilong nupela poroman, planti taim pikinini i save tok olsem, “Yu no papa tru bilong mi!” Kain tok olsem inap bagarapim tru bel bilong nupela papa o mama, a?
Olsem wanem? Ol papamama inap mekim gut wok bilong ol long mekim bikpela long ol pikinini em ol i no pikinini tru tru bilong ol? Nupela papa o mama inap mekim gutpela wok bilong helpim famili long stap amamas? Bekim bilong tupela askim em yes, sapos olgeta wan wan insait long dispela famili i bihainim Tok Bilong God, em Baibel.
[Piksa long pes 3]
“Yu no papa tru bilong mi!”