Yumi Inap i Stap Hamas Yia?

Ol manmeri i save stap planti yia, winim ol lain bilong bipo, na dispela i mekim na planti man i tingting olsem, ‘Yumi inap i stap hamas yia?’

WANPELA buk (The New Encyclopædia Britannica, 1995) i tok, long bipo, ol man i ting Pierre Joubert i bin stap planti yia tru, winim ol narapela man. Long yia 1814 em i dai taim em i gat 113 krismas. Tru, ol man i ting i gat sampela man i bin stap sampela yia moa, tasol yumi no gat ol pepa i kamapim dispela samting na yumi ken save dispela i tru o nogat. Tasol sampela pepa i kamapim olsem i gat sampela man ol i bin stap planti yia, winim Pierre Joubert.

Mama i bin karim Jeanne Louise Calment long Arl, long saut-is bilong Frans, long Februeri 21, 1875. Em i dai long Ogas 4, 1997​—⁠inap 122 yia bihain​—⁠na planti nius na televisen i kamapim dispela samting. Long 1986, Shigechiyo Izumi bilong Japan em i dai taim em i gat 120 krismas. Wanpela buk (Guinness Book of Records 1999) i kamapim olsem Sarah Knauss em i lapun tru, winim ol narapela man i bin stap long taim ol i wokim dispela buk. Em i gat 118 krismas. Mama i karim em long Septemba 24, 1880, long Pensilvenia, long Amerika. Marie-Louise Febronie Meilleur bilong Kwibek, Kanada, em i dai long yia 1998 taim em i gat 118 krismas, na taim em i dai krismas bilong em i winim bilong Sarah inap 26 de.

Tru tumas, namba bilong ol man i lapun tru em i go bikpela tru. Ol man i ting, i go inap long yia 2050, namba bilong ol manmeri i winim 100 krismas bai go bikpela tru, winim 2.2 milion. Na namba bilong ol man i gat 80 krismas na antap long en, dispela namba tu i go bikpela. Long 1970 i gat 26.7 milion man i gat bikpela krismas olsem, na long 1998 i gat 66 milion. Dispela namba i go bikpela inap 147 pesen, tasol namba bilong olgeta manmeri bilong graun i go bikpela inap 60 pesen tasol.

Na i no olsem ol man i stap planti yia moa tasol, nogat. Planti bilong ol i save mekim sampela samting em planti yangpela i gat 20 krismas ol i no inap mekim. Long 1990, John Kelley, em i gat 82 krismas, em i insait long wanpela resis i gat 42 kilomita, na insait long 5-pela aua na 5-pela minit em i pinisim dispela resis. Long 1991, Mavis Lindgren, em i wanpela bubu meri i gat 84 krismas, em i ran planti kilomita olsem insait long 7-pela aua na 9-pela minit. Na i no longtaim i go pinis, wanpela man i gat 91 krismas em i pinisim wanpela longpela resis (New York City Marathon)!

Long bipo tu sampela lapun i bin mekim sampela samting bilong kirap nogut long en. Baibel i tok, taim Abraham i gat 99 krismas, em i “ran i go long ol” man i kam lukim em. Taim Kalep i gat 85 krismas em i tok: “Strong bilong mi i no pinis. Nogat. Strong bilong mi i stap wankain yet olsem bipo [olsem 45 yia paslain] long taim Moses i bin salim mi i go long dispela wokabaut. Strong bilong mi i stap yet na mi inap i go pait na mekim olgeta samting.” Na Baibel i tok long Moses olsem taim em i gat 120 krismas “em i strongpela yet, na ai bilong en i gutpela.”​—⁠Stat 18:2; Josua 14:​10, 11; Lo 34:⁠7.

Krais Jisas i bin toktok long namba wan man, Adam, na long man i bin wokim sip, em Noa, olsem ol i man tru i bin stap long bipo. (Matyu 19:​4-6; 24:​37-39) Buk Stat i tok Adam i bin stap inap 930 yia, na Noa inap 950 yia. (Stat 5:5; 9:29) Olsem wanem? I tru ol man i bin stap planti yia olsem? Yumi inap i stap planti yia moa, winim ol dispela man, o bai yumi inap stap oltaim? Plis skelim dispela samting long stori i kamap bihain long dispela.