Pasin Bilong Bagarapim Ol Samting Em Inap Pinis
WANPELA meri na wanpela man bilong raitim buk, em Jane Norman na Myron W. Harris, ol i tok: “Ol man i ting pasin bilong ol yangpela long bagarapim ol samting, em i rot bilong ol long kamapim pasin bikhet bilong ol na kros bilong ol long ol man i bikpela pinis na long ol lo bilong ol.” Dispela man na meri bilong raitim buk ol i tok, planti yangpela i ting olsem i no gat wanpela samting inap pinisim dispela pasin, tasol “long olgeta 3-pela 3-pela yangpela, wanpela i ting olsem pasin bilong ol yangpela long bagarapim ol samting inap i go daun sapos ol papamama i tingim moa pikinini bilong ol, na sapos ol yangpela inap mekim sampela gutpela samting na bai ol i no ken les.” Tru, pasin bilong givim sampela wok samting long ol yangpela na wok bilong ol papamama long bosim gut pikinini inap daunim pasin bilong bagarapim ol samting. Tasol olsem wanem? Dispela samting tasol inap stretim as bilong dispela hevi?
Planti yangpela i no mekim pasin nogut taim ol i stap wanpis. Tasol taim ol i stap wantaim ol narapela yangpela, ating ol i mekim pasin longlong o pasin nogut bambai ol narapela i tingim ol. Nelson i save mekim olsem. Taim em i kisim drak o dring planti tumas, planti taim em i kamapim kros na bel hevi bilong em long rot bilong bagarapim ol samting. Tok Misin Katolik i autim long pasin bilong makim hap graun bilong ol man na long ol samting i stret ol wokman i mas kisim, dispela i mekim na José i kros na em i ting olsem bilong kamapim klia tingting bilong em, em i mas insait long ol straik na pasin bilong bagarapim ol samting. Tasol Nelson na José i painim wanpela samting i winim tru pasin bilong bagarapim ol samting.
Sampela As Bilong Dispela Pasin
Nau yumi ken skelim gut i gat wanem as na sampela yangpela i insait long pasin bilong bagarapim ol samting. Tingting bilong planti yangpela i paul na ‘ol i tok, dispela graun em i wanpela ples nogut i pulap long ol longlong man.’ Wanpela ripot i tok: ‘Ol yangpela i save tingting planti long i stap bilong ol long bihain. Ol i tingting long ol samting i wok long kamap, maski planti man i bikpela pinis i no ting ol i save mekim olsem.’ Maski em i save long dispela samting o nogat, taim yangpela i insait long pasin bilong bagarapim ol samting, ating long dispela rot em i kamapim olsem em i bel hevi, o em i gat ol hevi em i no bin stretim, o em i no bin kisim ol samting em i mas kisim. Ripot yumi kamapim long kirap bilong dispela stori i tok olsem “no gat wanpela bilong ol man ol i bin givim askim long ol i tok pasin bilong bagarapim ol samting i gutpela o i gat as na ol i mas mekim olsem, nogat; na ol yangpela i bin mekim dispela pasin, ol tu ol i no mekim kain tok olsem.”
Ating wan wan taim tasol ol man i mekim tok amamas o strongim bel bilong ol yangpela. Planti man moa i ting olsem em i bikpela samting long skul gut, na planti bos moa i laik ol man i mas i gat bikpela save long mekim wok, olsem na ol yangpela inap pret na ting olsem ol i no inap kisim wok mani samting. Na tu, ating papamama, na ol tisa, na ol pren i toktok planti long yangpela na ol i strong long em i mas winim ol mak, na ol i tingting tasol long ol wok yangpela i mekim o em i no mekim na ol i no tingim em yet. Planti yangpela i bikhet o bagarapim ol samting, long wanem, ol i no amamas long ol yet. Sapos papamama i sori long yangpela na i tingim em tru, ating dispela bai daunim bel hevi bilong em, a?
Ating yu lukim olsem sampela lain bilong gavman i les pinis na ol i lusim wok bilong pinisim pasin bilong raitim nabaut ol tok na ol narapela pasin bikhet, tasol ol manmeri i tingting planti long dispela samting, ol i laik ol tisa na lain i wok long skul bai stiaim ol yangpela bambai ol i no ken mekim dispela pasin. Wanpela buk (The World Book Encyclopedia) i stori long wok bilong kot na polis, na em i tok: ‘Man i bagarapim ol samting i mas baim kot o em i mas kalabus. Lo bilong sampela gavman i tok, ol papamama i mas baim ol samting pikinini bilong ol i bagarapim. Tasol planti bilong ol man i save bagarapim ol samting, ol i no kisim strafe. Kot na polis i hatwok long mekim wok bilong ol, na pe bilong wan wan samting ol man i bagarapim i no bikpela tru, olsem na ol i no kotim ol.’ Wanpela ripot i kamapim olsem ol polis i holim inap 3 pesen tasol bilong ol man i mekim dispela pasin.
Ating yu wanbel long tok olsem nambawan rot bilong stretim as bilong pasin bilong bagarapim ol samting, em papamama i mas mekim gut wok bilong ol. Tasol taim sindaun bilong famili i bagarap, ol lain man i kisim hevi long dispela. Profesa Ana Luisa Vieira de Mattos bilong Yunivesiti Bilong Sau Paulo, long Brasil, em i tok, as bilong sampela hevi bilong ol yangpela i olsem: ‘Papamama i no bosim gut ol yangpela, ol i no putim planti lo bilong stiaim ol, ol i no toktok gut wantaim, ol i no lukautim ol, ol i no tingim ol, o ol i les long ol samting.’
Long taim bilong yumi, yumi bin lukim truim bilong tok bilong Jisas: “Pasin nogut bai i kamap bikpela, olsem na planti man bai i lusim pasin bilong laikim ol arapela.” (Matyu 24:12) Na yumi olgeta i lukim olsem tok i stap long 2 Timoti 3:1-4 i kamap tru long nau, a? Aposel Pol i tok: “Yu mas save olsem, long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu . . . Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas . . . na ol bai i no laikim God.” Tru tumas, taim yumi stap namel long kain man olsem dispela i kirapim yumi long mekim pasin bikhet. Tasol yumi no ken les. Tru, ol man i no bin pinisim pasin bilong bagarapim ol samting, tasol i gat ol manmeri i bin senisim pasin bilong ol yet, na ol i no mekim moa pasin bikhet. Ol i lusim pinis pasin bilong bagarapim ol samting.
Gutpela Tok Bilong Stiaim Ol Yangpela
Wanem samting i bin helpim ol man bilong bagarapim ol samting na ol narapela man long senisim pasin bilong ol? Ating sampela tisa na papamama i hatwok long bilip olsem, Baibel i gat gutpela tok bilong stiaim ol man na dispela tok i stret long taim bilong yumi. Taim ol bikhetman i bihainim tok bilong Baibel, dispela i bin kirapim ol long bihainim dispela lo bilong God: “Sapos ol planti man i mekim pasin nogut, orait maski long bihainim pasin bilong ol.” (Kisim Bek 23:2) Planti ol i laikim tok i tru bilong Baibel long ol bilip na tok em bipo ol i no bin save gut long en, na save ol i kisim i helpim ol long bihainim gutpela pasin. Tingim José, em i wanpela yangpela long Sau Paulo. Taim em i go bikpela, em i bilip olsem man i mas mekim wok long ol imis taim em i lotu. Taim em i kisim save olsem God i gat nem, em Jehova, na God i no orait long pasin bilong lotu long ol imis, José i senisim pasin bilong em bambai em i ken mekim ol samting God i laikim.—Kisim Bek 20:4, 5; Song 83:18, NW; 1 Jon 5:21; KTH 4:11.
Nelson i no insait moa long pasin pait na straik i save mekim em i bel hevi, tasol em i wetim gutpela samting bai kamap bihain, na dispela i mekim gut bel bilong em. Em i tok: “Bipo famili bilong mi i givim baksait long mi, long wanem, mi raun wantaim ol man nogut na kisim ol drak, tasol nau ol i givim biknem long mi. Planti taim papa i askim mi long givim sampela tok long ol bikpela brata bilong mi bilong stretim ol. Kirap long taim mi stadi long Baibel wantaim ol Witnes Bilong Jehova, mi amamas, long wanem, nau i stap bilong mi i gat as bilong en.” Marko em i wanpela yangpela i sindaun long taun namel long ol man bilong pait, na taim em i kisim save olsem Kingdom bilong God bai kamapim Paradais long graun, dispela i mekim gut bel bilong em.—KTH 21:3, 4.
Tingim tu wanpela man bipo em i insait long wanpela lain raskol, na em i man bilong pait na bagarapim ol samting. Papamama bilong em i dai pinis na taim em i liklik i stap bilong em i no gutpela, olsem na Valta i amamas tru long save, God i gat lain bilong em namel long ol manmeri nogut. Ol i wok strong long bihainim ol lo bilong Baibel long i stap bilong ol, na ol i gat pasin sori, na narapela i save tingim narapela na mekim gutpela pasin long em. Valta i tok: “Olsem Jisas i bin tok promis, nau mi gat bikpela famili, ‘ol brata, ol susa, ol mama, na ol papa.’ Na mi wet long taim ol manmeri bai stap amamas na wanbel aninit long stretpela gavman bilong God.”—Mak 10:29, 30; Song 37:10, 11, 29.
Samting i Winim Pasin Bilong Kros
Ol dispela man bilong bagarapim ol samting long bipo, nau ol i mekim gutpela pasin sori long ol narapela, na i no dispela samting tasol, nogat; ol i “no save laikim pasin nogut.” (Song 97:10; Matyu 7:12) Olsem wanem long yu? Maski yu wanpela man i kisim hevi long pasin nogut bilong ol man bilong bagarapim ol samting, tasol taim yu stadi long Baibel bai yu save olsem Jehova i stap tru, na em i wanpela gutpela Papa bilong heven i laik lukautim yu. (1 Pita 5:6, 7) Maski yu gat ol pasin kranki o yu stap rabis, God i ken helpim yu long kamap strong long ol samting bilong spirit. Dispela em i wanpela gutpela samting tru, a?
Jehova na Pikinini bilong em, Krais Jisas, ol i gat laik tru long olgeta kain manmeri i gat rot long kisim save long tok i tru bilong Baibel. Baibel inap helpim ol man long lusim pasin bikhet long nau, tasol i no dispela samting tasol; em inap kirapim ol long wok strong long bihainim ol lo bilong God. Long dispela rot ol i kam insait long wanpela lain brata i gat nem olsem lain bilong klinpela na gutpela pasin, em lain Witnes Bilong Jehova i stap long olgeta hap bilong graun. Olsem Efesus 4:24 i tok, ol dispela gutpela Kristen i “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” I no longtaim na graun bai pulap long kain manmeri olsem, long wanem, ol tasol bai abrusim bagarap na i stap oltaim.—Skelim wantaim Luk 23:43, NW.
Nupela Taim i No Gat Pasin Bilong Bagarapim Ol Samting Em Inap Kamap
Olsem wanem? Yu bilip olsem pasin bilong bagarapim ol samting bai pinis? Sapos dispela bikpela senis bai kamap, em bai kamap olsem wanem? Klostu nau Kingdom bilong God bai pinisim pasin nogut bilong dispela graun. Ol manmeri bai stap long graun, sapos ol i sakim stretpela lo bilong em, bai ol i gat kot. (Skelim wantaim Aisaia 24:5, 6.) “Bikpela [bai] bagarapim tru ol man bilong mekim sin,” tasol ol man i laikim stretpela pasin bai abrusim bagarap. “Ol i bilip long em. Olsem na em i save helpim ol, na em i save kisim bek ol long han bilong ol man nogut, na ol i stap gut.”—Song 37:38-40.
Tru tumas, as bilong pasin bilong bagarapim ol samting bai pinis olgeta. Na olgeta kain pasin nogut, na pasin bilong daunim ol man, na pen na hevi tu bai pinis. Tasol long nupela taim bai i gat stretpela pasin, na ol manmeri i ken i stap bel isi na kisim gutpela sindaun. Aisaia 32:18 i stori long ol samting bai kamap: “Ol manmeri bilong [mi] bai i gat gutpela sindaun na bai ol i stap gut na malolo long ol ples bilong ol. Na bai ol i no pret long wanpela samting.” Em nau, graun olgeta bai kamap gutpela ples paradais i pulap long ol manmeri i laikim tru ol narapela na i tingim ol.
Planti milion manmeri na ol man em bipo ol i save bagarapim ol samting, nau ol i pas gut wantaim God Jehova. Ol i no insait moa long pasin bilong bagarapim ol samting. Olsem wanem? Bai yu larim Tok Bilong God i stiaim yu tu bilong kisim laip long nupela taim? Gutpela sapos yu bihainim man bilong raitim Song em i kamapim tok bilong Jehova: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”—Song 32:8.
[Piksa long pes 7]
Pasin bilong ol papamama long tingim na laikim tru ol yangpela bai lukautim ol