Samting i Helpim Ol Man Long Lusim Pasin Bikhet
WANPELA MAN LONG FRANS I RAITIM DISPELA STORI BILONG KIRAP!
OL SAMTING i wok long kamap long nau i kamapim long ples klia olsem long planti taun long Frans ol man i lusim pinis pasin bilong bihainim lo. Wanpela nius (L’Express) bilong Frans i tok, “insait long 6-pela yia pasin bilong pait na bagarapim man i go bikpela tru long planti taun.” Na tu, namba bilong ol pikinini i insait long dispela pasin i go antap tru.
Ol man i bikhet ol i insait long ol kain kain pasin nogut olsem bagarapim ol samting, maketim ol drak, giamanim ol man na pulim ol samting bilong ol, kukim ol haus samting, stilim ol samting, na tu, ol i mekim nogut long ol wokman bilong gavman. Ol polis, na ol paiaman, na ol man i save wok long ol PMV samting, na sampela moa, ol i save kisim bikpela hevi tru long han bilong ol dispela bikhetman.
Bilong wanem pasin pait na bagarapim man i go bikpela tru? Tupela saveman i tok, “ol famili i bruk, olsem na ol man i bikhet long olgeta wok bilong gavman.” Tupela i kamapim tu olsem “ol [yangpela] i pilim olsem ol lain bilong gavman i no tingim ol” na ol i no gat “gutpela samting long wetim long bihain.”
Ol Witnes Bilong Jehova i save autim tok bilong Baibel long ol gutpela samting bai i kamap bihain, long ol hap em pasin bikhet i bikpela tru long en. Long wanpela program bilong televisen long Frans, wanpela man bilong raitim nius em i tok: “Planti taim ol Witnes Bilong Jehova i save go long ol dispela hap bilong taun na ol hap i no gat gutpela sindaun long en—em ol hap ol lain bilong welfe, na polis, na ol lain bilong gavman i no save go tumas long en. Long ol dispela haus na rot, ol i save putim yau na harim tok bilong ol man na ol i toktok wantaim ol.” Wok bilong ol i bin kamapim gutpela samting olsem pas bilong wanpela yangpela man i save kaunim Kirap! i tok.
“Mi laik tok tenkyu tru long ol buk na nius bilong yupela. Yupela i helpim mi tru, na tu, yupela i helpim mi long pas gut moa wantaim papamama bilong mi. Mi gat 16 krismas na mi kamap bikpela insait long lotu Muslim.
“Mi laik tok olsem yupela i bin helpim mi long lusim pasin bikhet na sakim lo. Dispela i mekim na mi save givim bel moa long lotu bilong mi, tasol mi save kaunim Baibel tu. Yupela i helpim mi na nau mi skul gen. Na narapela samting moa em olsem: Long rot bilong ol nius yupela i helpim sampela narapela man moa i stap klostu long hap bilong mi na ol tu i lusim pasin bikhet—long olgeta mun mi save lusim ol nius wantaim ol. Mi laik tok tenkyu tru long yupela na mi pilim olsem mi gat dinau long yupela.”