‘Em i Bin Kirapim Tru Bel na Tingting’
‘Mi kisim bikpela amamas moa yet na bel bilong mi i kirap tru taim mi wok long kaunim buk Is There a Creator Who Cares About You? Em i kirapim wanpela strongpela laik long bel bilong mi, olsem mi mas kisim sampela save moa. Tenkyu tru long dispela buk em i bin kirapim tru bel na tingting bilong mi.’
EM TOK bilong wanpela Witnes Bilong Jehova long Not Karolaina, Amerika, em i kamapim tingting bilong em long buk em Sosaiti Was Taua i bin kamapim long “Bihainim Rot God i Makim” Kibung Distrik long 1998/1999. Maski sapos yu no gat dispela buk, yu ken harim tingting bilong sampela moa.
Wanpela man i bin kisim dispela buk long wanpela kibung long San Diego, Kalifonia, Amerika, na sampela de bihain em i raitim pas na i tok: ‘Dispela buk i strongim tru bilip bilong mi. Em i kirapim mi na bel bilong mi i pilim tru ol gutpela samting Jehova i bin wokim. Nau mi kamap long pes 98, na taim mi kamap long laspela pes, bai mi bel hevi stret! Mi kisim bikpela amamas tru long kaunim dispela buk.’
Wanpela meri bilong Esia i tok: “Man bilong mekim tok long kibung em i kolim dispela buk olsem ‘wanpela buk i narapela kain,’ na dispela tok i stret tru wantaim ol tok bilong dispela buk. Wanpela bikpela samting bilong dispela buk i olsem: Em i no subim man long bilip olsem God i stap, tasol em i mekim ol tok i kamapim long ples klia dispela samting.”
Sampela samting buk i stori long en bilong kamapim long ples klia olsem God i stap, em ol samting bilong ples antap, na laip, na yumi tu, em ol man bilong saiens i kisim save pinis long en na yumi kirap nogut long en. Planti ol i pilim tru dispela samting. Wanpela meri bilong Kalifonia i tok: ‘Bel bilong mi i pilim tru ol tok bilong dispela liklik buk. Mi kaunim kaunim i go na mi no inap lusim. Olgeta wan wan pes i stori long ol samting bilong antap na ol samting i stap laip em ol man bilong saiens i wok long kisim save long en. Man! Mi lainim planti samting tru! Dispela liklik buk bai stap olsem wanpela gutpela samting tru bilong mi, na bai mi kamapim tok bilong en long ol narapela manmeri.’
I gat narapela samting bilong dispela buk em planti man i amamas tru long en—em i stori long ol tok bilong Baibel i kamapim klia ol pasin bilong Man bilong wokim olgeta samting. Planti ol i tok, ‘Klostu long pinis bilong en, buk i kamapim ol bikpela tok bilong ol wan wan buk bilong Baibel, na em i mekim long pasin i gutpela tru.’ Bihain liklik long wanpela kibung i bin kamap long Nu Yok, Amerika, narapela meri i tok: ‘Mi ting dispela nupela buk em i nambawan buk tru yupela i bin wokim i kirapim tru tingting bilong mipela. Mi amamas tru long ol samting bilong saiens i kamapim long ples klia olsem i gat wanpela Man i bin wokim olgeta samting. Ol tok bilong Baibel em buk i kamapim em inap stret bilong kamapim klia ol tok bilong buk na bilong kirapim laik bilong man long kaunim sampela tok moa.’
Ol Tok Bilong Saiens i Klia
Ol tok bilong saiens em ol sapta bilong pastaim i kamapim, yumi inap ting i hatwok long kisim gut, tasol yumi ken harim tingting bilong sampela long ol dispela tok.
Wanpela man bilong Kanada i tok: ‘Dispela buk i narapela kain tru long ol buk bilong saiens samting em ol man bilong raitim ol i save bilasim gut tok bilong en na bai yumi kirap nogut long save bilong ol. Ol tok yupela i kamapim long ol samting bilong saiens na long skin bilong man olsem DNA na kromosom samting, yupela i kamapim klia tru na mipela inap kisim gut. Sapos yupela i bin raitim ol buk bilong skul yunivesiti mi bin stadi long en inap planti yia i go pinis, em bai gutpela tru!’
Wanpela profesa bilong ol samting bilong saiens long yunivesiti em i tok: ‘Buk i kamapim klia tru ol bikpela tok bilong skelim na em i no kamapim planti tok i strong tumas. Buk i helpim man long skelim gut ol tok na i kamapim tok bilong planti saientis i gat nem. Olgeta man i laik save long ples antap na graun na ol samting i gat laip ol i bin kamap olsem wanem, ol i mas kaunim dispela buk, maski ol i saientis o nogat.’
Wanpela yangpela meri i mekim kos bilong kamap nes em i tok: “Mi kirap nogut taim mi opim buk long sapta 4 na mi kaunim tok bilong wanpela buk em mipela i mekim wok long en long klas! Mi givim buk long profesa bilong mipela na mi tokim em, mi save em bai laikim tru ol tok i stap long en. Mi soim em long pes 54 i stori long kru bilong man. Em i kaunim na em i tok, ‘Em gutpela tru! Bai mi skelim ol tok bilong en.’ ”
Wanpela memba bilong palamen long Beljam i tok: ‘Samting i kirapim tru tingting bilong mi em ol tok bilong saiens dispela buk i kamapim na i makim olsem ol tok bilong saiens long nau i no narapela kain long ol tok em Baibel i kamapim, olsem i gat wanpela God tasol i stap; saiens i wanbel wantaim ol tok bilong Baibel long dispela samting. Em wanpela bikpela samting yumi mas tingim.’
Save Gut Long Man Bilong Wokim Yumi
Dispela buk i bin helpim ol man long planti kantri long save gut long God na pilim olsem ol i stap klostu long em. Wanpela meri long Biktaun Fukuoka, long Japan, em i kaunim dispela buk na em i tok: ‘Dispela buk i olsem ai bilong wanpela kamera i sutim stret Jehova na i kamapim klia tru ol pasin bilong em. Ol man inap bilip tru long ol tok bilong dispela buk. Em i helpim mi long save gut long Jehova, na bipo mi no bin ting mi inap save gut long em olsem.’ Wanpela man bilong El Salvado i tok: ‘Yupela i kamapim klia tru olsem God em i man bilong marimari, na em i gat gutpela pasin, na em i no save belhat kwik, na em i save sori tru na mekim gutpela pasin long ol man. Tru tumas, mipela i mas i gat dispela buk bilong helpim mipela long i go klostu moa long God na Pikinini bilong em. Em i namba wan buk i tokaut klia long ol tingting i stap long bel bilong Jehova na long ol tingting na laik i stap long bel bilong Pikinini bilong em, Jisas, i wankain olsem yumi ol man.’ Na wanpela man long Sambia i tok: ‘Nau mi gat narapela kain tingting olgeta long Jehova.’
Ol Witnes Bilong Jehova i amamas long givim dispela buk long ol man, nem bilong en Is There a Creator Who Cares About You? Wanpela meri i tok: “Taim mi kaunim pinis sapta 10 [“Sapos Man Bilong Wokim Yumi i Save Tingim Yumi, Bilong Wanem i Gat Planti Pen na Hevi i Stap?”] mi tok olsem, ‘Em bikpela samting long mipela i gat dispela buk long Japan!’ Mi laik putim gut ol dispela tok bilong sapta 10 long tingting bilong mi na mekim bikpela wok long en taim mi autim tok long ol man.” Wanpela meri i save stadi wantaim wanpela yangpela meri long Baibel, na dispela yangpela meri i go bikpela insait long haus lotu bilong ol Buda, em papa bilong em i mekim wok pris long en. Meri i tok: ‘Em i save hatwok long bilip olsem i gat Man bilong wokim olgeta samting. Ol tok bilong dispela buk i no subim man long bilip, tasol em i kamapim ol tok i tru, olsem na mi ting ol lain bilong lotu Buda tu bai i gat laik long kaunim. Na taim yumi kaunim dispela buk, yumi pilim moa yet olsem Jehova i save laikim tru yumi.’
Wanpela meri long Inglan i tok: “Nau tasol mi pinisim buk Creator na mi redi long kaunim gen. Man! Em i wanpela gutpela buk tru! Taim mi kaunim, mi laikim tru Jehova. Mi bin givim wanpela long meri i sindaun klostu long mi, na taim em i kaunim tupela sapta tasol em i tok, ‘Mi no inap lusim, mi laikim tru.’ Mi save dispela buk bai helpim planti manmeri long save gut long Bikpela Man bilong wokim yumi na laikim em tru.”
Wanpela man long Merilan, Amerika, em i tok: ‘Dispela buk i strongim mi tru long ol samting bilong spirit! Mi tingting pinis long givim wanpela buk long olgeta man mi save wok long ofis bilong ol. Sampela taim mi save hatwok long kirap autim tok long ol kain man olsem, em ol i gat planti wok na ol i bin skul gut. Tasol nau mi holim dispela buk na bai mi painim sampela gutpela tok bilong helpim mi long kirapim tok long ol man na ol inap pilim gut.’
Em nau, dispela buk Is There a Creator Who Cares About You? em bai helpim gut ol man i stap long olgeta hap bilong graun.
[Piksa Kredit Lain long pes 25]
Piksa long skin bilong buk i stap antap, Eagle Nebula: J. Hester na P. Scowen (AZ State Univ.), NASA