Nupela Buk Planti Milion Man i Laikim

“OL MAN Bilong Laikim Pasin Bilong i Stap Fri” Kibung Distrik i bin kirap long Jun 1991, na wanpela bikpela tok i bin kamap long dispela kibung, nem bilong en: “Nambawan Man Tru i Winim Olgeta Narapela Man.” Brata bilong mekim dispela tok, em i tokaut long wanpela nupela buk yumi inap kisim, na nem bilong en i wankain long nem bilong dispela tok. Winim 6 milion manmeri long olgeta hap bilong graun ol i bin harim ol tok bilong ol dispela kibung, na ol i bin harim tu dispela tok, na mipela i bin raitim sampela tok bilong en long tupela stori i kamap paslain long dispela.

Ol i wokim 12 milion bilong dispela buk, nem bilong en: Nambawan Man Tru i Winim Olgeta Narapela Man, na ol i wokim long 60 tok ples. Ol manmeri long hap bilong Isten Yurop ol inap kisim long tok ples bilong ol, olsem long tok ples Albania, Kroesia, Hangari, Masedonia, Polan, Rasia, Serbia, Slovinia. Inap olsem 74,000 ol i bin bung long ol 7-pela kibung i kamap long hap bilong Rasia, na ol i amamas tru long kisim dispela buk long tok ples Rasia.

Ol i Kisim We Ol Tok Bilong En?

Kirap long Novemba 1985, Wastaua i bin stori long ol tok i stap long dispela buk. Tasol planti man bilong kaunim Wastaua, ol i tok ol i bel hevi, long wanem dispela tok i no kamap moa long ol Wastaua. Wanpela yangpela meri bilong Itali em i gat 12-pela krismas, nem bilong em Melesa, em i krai taim em i kaunim laspela stori bilong Jisas i stap long Wastaua. Em i tok: “Kibung bilong mipela i laik kirap long tumora, na mi beten askim Jehova long givim wanpela buk long mipela i stori long pasin na wok bilong Jisas. Long kibung, taim ol i tokaut long dispela nupela buk, mi paitim han i go i go inap long mi no inap paitim han moa.”

Ol dispela stori bilong Jisas yumi bin lukim long Wastaua ol i stap long dispela nupela buk i gat 448 pes. Dispela nupela buk i gat 133 sapta na ol piksa long en i gat planti kala kala. Olgeta tok Jisas i bin mekim, na olgeta samting i bin painim em long taim em i bin stap long graun na Baibel i stori long en, ol dispela tok i stap long dispela nupela buk na i olsem yumi lukim long Baibel, na dispela buk i kamapim tu ol tok piksa Jisas i stori long en na ol mirakel em i bin wokim. Wanem samting i kamap pastaim, na wanem samting i kamap bihain, em buk i putim ol stori olsem. Long pinis bilong ol sapta ol i raitim wanem ol hap bilong Baibel i stori long ol dispela tok bilong sapta.

Tasol ating sampela bai tok, ‘Mi kaunim pinis dispela buk, long wanem mi kaunim pinis ol stori long Wastaua.’ Tasol ol i bin kaunim ol wan wan stori long ol wan wan mun tasol, na ol i bin mekim olsem inap 6-pela yia. Ol dispela stori i gutpela, tasol nau ol inap kaunim olgeta stori wantaim, na dispela bai helpim ol long save gut long dispela nambawan man tru i winim olgeta narapela man!

Em i Strongim Bilip

Wanpela meri long Wosington, D.C., long Amerika, i tok, “Insait long tupela wik tasol mi kaunim pinis olgeta tok bilong dispela buk. Taim mi wok long kaunim dispela buk, aiwara i kapsait i kam daun. Mi kaunim pinis na mi beten na krai wantaim. Mi pilim olsem mi stap wantaim Jisas, na karim hevi wantaim em. Mi kaunim pinis dispela buk, na wanpela wik i go pinis, tasol taim mi tingim ol tok bilong dispela buk em mi bin kaunim, aiwara i kamap yet long ai bilong mi. Jehova i givim Pikinini bilong em bilong helpim yumi, na dispela tok mi kaunim i helpim mi long i go klostu moa long Jehova.

Wanpela meri bilong Pitsbeg, long Pensilvenia, Amerika, em i raitim pas na i tok olsem: “Nau tasol mi kaunim pinis olgeta tok bilong dispela buk i stori long Jisas. Em wanpela gutpela buk tru. Taim mi kaunim ol laspela sapta bilong dispela buk, aiwara i kapsait. Mi amamas long kaunim olgeta tok bilong dispela buk long wanpela taim tasol. Mi laikim tru dispela buk!”

Ol manmeri i save pilim tru ol naispela piksa i stap long dispela buk. Wanpela man i kaunim dispela buk na em i pilim tru, na em i tok: “Taim mi kaunim dispela buk na mi lukim ol gutpela piksa, i olsem mi inap harim ol man i krai sori long pikinini i dai (sapta 47) o yumi inap pilim tingting bilong Jisas taim wanpela meri i karim blut em i kam holim klos bilong Jisas (sapta 46). Ol piksa i olsem piksa tru bilong man, na mi pilim tru hevi bilong ol. . . . I no hatwok long kaunim ol tok bilong dispela buk, na mi save amamas long kaunim, em i olsem wanpela gutpela samting mi inap mekim long olgeta de. Ol i raitim gut tru ol tok bilong dispela buk, na yumi inap save long ol samting Jisas i bin mekim, tasol yumi inap kisim save tu long tingting bilong Jisas.

Narapela Narapela Wok Bilong En

Planti ol i mekim wok long dispela buk taim ol i mekim famili-stadi bilong ol. Tupela marit long Silvaton, long Oregon, Amerika ol i tok: “Mipela i gat 3-pela liklik pikinini, na dispela buk i gutpela tru bilong mekim famili-stadi long en long olgeta nait.” Tru tumas, i gutpela tru sapos yumi save long ol samting King bilong yumi, em Krais Jisas, em i bin mekim.

Wanpela yangpela meri long Japan i raitim pas, na em i tok: “Taim mipela kaikai pinis long apinun na mipela sindaun malolo liklik, papa i save kaunim sampela tok bilong dispela buk. Mipela famili i kirap kaunim ol sapta bilong pastaim, tasol long olgeta nait taim mi laik slip, mi save kaunim wanpela sapta i kamap long laspela hap bilong en. Tasol ol tok bilong dispela buk i gutpela tru, na sampela taim mi save amamas long kaunim na mi no tingim taim, i go i go na taim mi lukim hanwas, em 1 klok moning.”

Planti ol i kirap nogut long ol tok ol i lukim long ol dispela stori. Wanpela meri Witnes i tok: “Mi bin kisim save long planti samting em pastaim mi no bin save long en.” Wanpela pas i kam long Kalifonia, Amerika, na i tok: “Mitupela meri bilong mi i bin stap insait long lain Witnes inap 35 yia pinis, na mipela inap tok tru olsem, long bipo, mipela i no bin kisim wanpela gutpela buk tru olsem, na mipela i amamas long kaunim.”

Planti man i ting ol Witnes Bilong Jehova i no save bilip long Jisas, tasol dispela buk inap helpim yumi long stretim dispela tingting kranki bilong ol. Wanpela man i amamas long kaunim dispela buk, na em i tok: “Taim mi kirap kaunim dispela buk, mi no inap lusim i stap. Em wanpela gutpela buk tru bilong helpim ol man i save tok lain bilong Jehova i no save bilip long Jisas o litimapim nem bilong em. Mipela mas wok long tilim dispela buk long kain man olsem.”

Taim ol Witnes Bilong Jehova i autim tok, bai ol i mekim bikpela wok long dispela buk. Wanpela meri Witnes i raitim pas na i tok: “Mi save stadi wantaim wanpela meri, na mi bin givim dispela buk long em, na nau pasin bilong em i senis. Mi stadi wantaim em inap wanpela yia pinis, na mi save tokim em long i kam long ol miting, tasol em i no save kam.” Dispela Witnes i tok, taim dispela meri i kaunim pinis sapta 1 i go inap sapta 45 bilong dispela buk, “em i tokim mi em bai kam long miting long Sande, long wanem em i mas kamapim tingting tru i stap long bel bilong em.”

Sampela Gutpela Samting Bilong En

Dispela buk, nem bilong en: Nambawan Man Tru i Winim Olgeta Narapela Man, em i kamapim gut ol stori i stap long hap bilong Matyu, Mak, Luk, Jon long Baibel. Dispela buk i helpim yumi long save bilong wanem Jisas i bin mekim sampela samting, na buk i kamapim insait bilong ol tok bilong em, olsem na yumi inap mekim wok long dispela buk bilong kisim save long tok bilong Baibel, long wanem em i kamapim gut ol tok bilong Baibel.

Tasol wanpela gutpela samting bilong dispela buk, em olsem: Samting i kamap pastaim em i stori pastaim long en, na samting i kamap bihain, em i save stori long en bihain. Sapos yumi tingim dispela samting, na yumi wok long lukim ol wan wan sapta, bai yumi inap save, taim Jisas i stap long graun, em i mekim wanem samting pastaim na wanem samting bihain. Taim ol man i kaunim tok bilong Matyu, Mak, Luk, Jon, sampela taim ol i ting sampela tok i pait wantaim narapela tok. Tasol dispela buk i helpim yumi long save, i no gat wanpela hap tok i pait wantaim narapela tok​—⁠olgeta tok i stret tasol.

I gutpela sapos yumi ol Kristen i ken lain gut long dispela man i bin soim rot long yumi, em Krais Jisas. Olsem na gutpela sapos yumi mekim wok long dispela nupela buk, Nambawan Man Tru i Winim Olgeta Narapela Man na kisim save long ol tok i stap long Matyu, Mak, Luk, Jon long Baibel.