Nambawan Man Tru i Winim Olgeta Narapela Man
1 Nem bilong dispela nupela buk em Nambawan Man Tru i Winim Olgeta Narapela Man. Taim yumi kisim buk na lukim dispela nem, ating nau yumi laik kisim save long ol tok i stap insait long buk. Sapos yumi tok wanpela man em i nambawan tru na i winim olgeta narapela man i bin i stap long graun, i olsem em i winim planti planti bilion manmeri. Tru tumas, kain man olsem em i win tru!
2 Pikinini bilong God, em Krais Jisas, em inap tru long kisim nem olsem. Taim em i stap long graun, em i no wok long kamap maniman, o kisim biknem, o mekim wok politik samting. Em i no kamap nambawan man tru long dispela rot. Nogat. Papamama bilong Jisas i no gat planti mani samting, na inap long taim Jisas i gat 30 krismas, em i no gat nem. Tasol taim em i winim 30 krismas, em nau, ol tok na ol samting em i mekim i kirapim tingting bilong olgeta manmeri long ples Palestain. Jisas i kamapim gut pasin na laik bilong God Jehova, em bipo ol man i no bin save tumas long en. Jisas i mekim bikpela wok autim tok, winim olgeta narapela man, na em i wokim ol bikpela mirakel, na redim rot bilong ol man i ken i stap long nupela taim long bihain.
3 Bilong Wanem Yumi Mas i Gat Dispela Buk: Aposel Pol i kirapim yumi long “lukluk i go” long Jisas, em i stap olsem gutpela piksa bilong yumi ken bihainim pasin bilong em. (Hi 12:2) Kirap long 1985 i go inap 1991, Sosaiti i bin putim long Wastaua (tok Inglis) 149 stori bilong i stap na wok bilong Jisas. Ol dispela stori i givim gutpela save moa long yumi long ol tok na ol samting Jisas i bin mekim bilong helpim yumi. Ol i bin helpim yumi long save, i bikpela samting long yumi mas bihainim pasin bilong em. Ol i bin sotim tok bilong ol dispela stori na bungim insait long wanpela buk. Em i gutpela samting tru yumi ken mekim wok long en bilong helpim ol narapela long lukluk i go long Jisas na stap aninit long dispela man Jehova i makim bilong “i stap antap tru long olgeta kain strongpela spirit, na long olgeta hetman na long olgeta gavman, na long olgeta samting i gat strong”!—Ef 1:21.
4 Ol Gutpela Samting Bilong Buk: Taim yu laik tilim dispela buk, yu ken kamapim askim olsem: “Wanem samting i mekim na Jisas i nambawan man tru i winim olgeta narapela man?” Dispela buk i gat 133 sapta, na bilong bekim dispela askim yu ken soim sampela sapta long man bilong haus, em ol sapta i stori long i stap na pasin na ol tok na wok bilong Jisas. Sapta 24 i stori long ol wok Jisas i kam long graun bilong mekim. Sapta 35 i kamapim ol bikpela tok Jisas i mekim long maunten. Sapta 43 i stori long pasin bilong Jisas long mekim tok piksa bilong lainim ol man. Sapta 133 i helpim yumi long save long ol gutpela blesing ol manmeri bai kisim taim Jisas inapim pinis olgeta wok bilong em. Long pinis bilong olgeta sapta wan wan ol i raitim wanem hap bilong Baibel ol i kisim stori long en, na i gat sampela askim. Sapos yu mekim wok long ol dispela askim, ating dispela bai helpim yu long kirapim tingting bilong ol man bilong haus. Na tu, yu ken soim ol gutpela piksa long man bilong haus, em ol piksa i kamapim gut ol pasin bilong Jisas, olsem em i laikim tru ol man na sori long ol, na em i no les liklik long autim tok.—Lukim sapta 44, 95, 117, na 123.
5 Dispela nupela buk i gat ol gutpela samting bilong en na yumi ken givim bel long tilim long ol man. Olgeta man i laik kisim laip i stap oltaim, ol i mas kisim save long Krais Jisas. (Jo 17:3) Sapos yumi wok strong long tilim dispela buk, orait, bai planti man inap kisim save long dispela man em i nambawan man tru i winim olgeta narapela man i bin i stap long graun.
[Ol Askim]
1, 2. I gat wanem as na yumi ken tok, Pikinini bilong God, em Krais Jisas, em i nambawan man tru i winim olgeta narapela man?
3. (a) Ol stori long dispela nupela buk i givim gutpela save long yumi long wanem samting? (b) Ol stori i helpim yumi long save long wanem bikpela samting? (c) Dispela buk em gutpela samting bilong helpim yumi long mekim wanem?
4. Kolim sampela samting ol sapta long dispela buk i stori long en. Mekim liklik soim long pasin bilong tilim dispela buk.
5. I gat wanem ol samting na yumi ken givim bel long tilim dispela buk?
This article is repeated in km 12/92.