Autim Gutpela Tok—Mekim Wok Long Buk Nambawan Man Tru i Winim Olgeta Narapela Man
1 Inap planti yia pinis planti buk samting Sosaiti i bin wokim ol i kamapim sampela tok long i stap na wok bilong Krais Jisas. Dispela i stret, long wanem, “i no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Ap 4:12) Dispela nupela buk i narapela kain, long wanem, em i namba wan buk Sosaiti i bin wokim i stori long Jisas tasol na ol samting em i bin mekim na i no stori long narapela samting.
2 Tilim Buk Long Ol Narapela: Yumi ken stori long wanem ol samting long dispela buk bilong kirapim tingting bilong man? Ating stori bilong sapta 44, “Em i Mekim Dai Bikpela Win,” inap kirapim tingting bilong ol yangpela. Tok bilong sapta 57, “Em i Sori Long Ol Man i Gat Hevi,” inap mekim gut bel bilong man i gat sik o skin bilong em i no strong. Sapos man i bel hevi long wanpela famili o wanblut samting em i dai pinis, orait, ating kain man olsem bai laikim ol tok bilong sapta 90, “Ol Man i Dai Pinis Ol Bai Kirap Bek.” Sapos yu toktok wantaim man long ol samting nogut i kamap long graun, yu ken kamapim sampela tok long sapta 111 i stori long “Mak Bilong Las Taim.”
3 Bilong kirapim tok wantaim man bilong haus, yu ken mekim tok olsem: “God i laik bai yumi ol Kristen i mekim wanem? Baibel i tok, yumi mas bihainim gutpela pasin bilong nambawan man tru i winim olgeta narapela man i bin i stap long graun, em Krais Jisas. [Kaunim 1 Pita 2:21.] Em i lainim ol disaipel bilong em long laikim tru ol narapela man, na bihainim stretpela pasin, na beten long Kingdom bilong God i ken i kam. Sapos yumi laik bai God i kisim bek yumi, orait, yumi mas bilip na daun long Jisas, em dispela man God i makim bilong kisim bek yumi. [Kaunim Jon 14:6.] Jisas i no man nating. Nogat. Dispela buk i makim Jisas em i nambawan man tru i winim olgeta narapela man. Sapta 59 i kamapim klia dispela samting, olsem em i dispela man God i bin makim na em i Pikinini Bilong God i gat laip. God bai kisim bek yumi long rot bilong Jisas, olsem na i bikpela samting long yumi mas save gut long ol tok na wok bilong em, a? Ol i bin wokim dispela buk bilong helpim ol man long kisim dispela save, na sapos yu laik, yu ken kisim wanpela.”
4 Ating planti man i gat gutpela bel bai kisim na kaunim dispela buk. Yu mas go bek lukim olgeta man i kisim buk. Ating sampela taim yu ken mekim wok long dispela buk bilong kirapim Baibel-stadi. Na buk i gutpela tru bilong mekim famili-stadi long en na bilong mekim stadi wantaim ol yangpela. Sapos yu tilim dispela buk long ol narapela, dispela inap helpim ol long kisim save long rot i go long laip oltaim.
This article is repeated in km 12/92.