Em i Bin Mekim Wok Bilong Kamapim Lait “Long Olgeta Hap Bilong Graun”
GOD i bin givim wok long aposel Pol long kamapim lait bilong spirit “long olgeta hap bilong graun.” Em i mekim olsem na “olgeta manmeri God i bin makim bilong kisim laip i stap gut oltaim, dispela ol manmeri i bilip.”—Aposel 13:47, 48; Aisaia 49:6.
Narapela Kristen i bin givim bel na wok strong tru na i no les long kamapim lait bilong spirit, em William Lloyd Barry, em i insait long Lain Bilong Bosim Ol Witnes. Brata Barry i bin dai long Julai 2, 1999, taim em i mekim dispela wok long wanpela kibung distrik long Hawaii.
Mama i bin karim Lloyd Barry long Nu Silan long Disemba 20, 1916. Mama na papa bilong em i bin laik tru long save long tok i tru bilong Baibel i stap long ol buk bilong C. T. Russell, em Sosaiti Was Taua i bin tilim. Olsem na Brata Barry i bin kamap bikpela insait long famili Kristen.
Brata Barry i save laikim spot na skul, na tu em i bin winim bikpela skul bilong kisim save long saiens, tasol em i bin strong tru long tingim ol samting bilong spirit. Olsem na long Janueri 1, 1939, em i kirap mekim wok bilong God long olgeta de, na em i insait long famili Betel long ofis bilong Sosaiti long Ostrelia. Long 1941 gavman i bin tambuim wok bilong Sosaiti, tasol Brata Barry i mekim yet ol wok bilong ofis, na sampela taim Sosaiti i givim wok long em long raitim ol tok bilong strongim ol wanbilip bilong em. Na tu, em i bin stap olsem gutpela piksa long autim tok long ol man.
Long Februeri 1942, Brata Barry i maritim wanpela meri i save mekim wok bilong God long olgeta de. Insait long ol dispela yia gutpela meri bilong em, Melba, i bin wok gut wantaim em long planti hap bilong graun. Wanpela bikpela samting ol i mekim bilong go mekim wok bilong God long narapela kantri em, ol i bin i go long klas namba 11 bilong Wastaua Baibel Skul Bilong Gileat long Amerika. Sosaiti i salim ol i go mekim wok long wanpela hap em planti man bai i kolim olsem wanpela ples i stap longwe tru, em Japan. Taim ol i kamap long dispela hap long 1949, ol i kirap mekim wok misineri long wanpela biktaun i stap long nambis bilong Kobe. Long dispela taim i gat 12-pela man tasol i autim gutnius long Japan. Brata Barry i lainim tok ples na ol pasin bilong nupela ples bilong em na em i kirap laikim tru ol manmeri bilong Japan, na em i mekim wok long dispela hap inap 25 yia. Em i laikim tru ol man em “bel bilong ol i gutpela tru . . . bilong kisim laip i stap gut oltaim” na dispela i kamap klia taim yumi lukim ol lain brata Kristen i go bikpela long Japan, na dispela pasin bilong em i helpim em long mekim gut wok bilong lukautim brens inap planti yia.
Long Jun 1975, Sosaiti i salim Brata na Sista Barry i go long Bruklin, Nu Yok. Long dispela taim i gat olsem 30,000 Witnes long Japan. Brata Barry em wanpela Kristen God i makim em long spirit holi, olsem na ol i singautim em bilong i go mekim wok insait long Lain Bilong Bosim Ol Witnes Bilong Jehova. (Rom 8:16, 17) Em i gat save long raitim ol tok long buk, olsem na dispela save bilong em i bin helpim em tru long mekim nupela wok em i kisim long Dipatmen Bilong Raitim Tok. Em i gat bikpela save long mekim wok long brens na em i bin wok long ol narapela narapela ples, na dispela i mekim na em i bin helpim tru Komiti Bilong Wokim Ol Buk Samting taim em i wok insait long dispela komiti bilong Lain Bilong Bosim Ol Witnes.
Long ol dispela yia, Brata Barry i laikim yet Japan na ol manmeri bilong dispela hap. Ol sumatin bilong Skul Gileat na ol famili Betel ol i save long ol tok em bai mekim. Em i save kamapim ol gutpela stori bilong planti Witnes em ol i bin mekim wok misineri na ol dispela stori i save mekim bel bilong ol i amamas. Wok bilong autim tok bilong Kingdom long ol ples i stap longwe i kamap klia tru long tingting bilong ol brata sista taim Brata Barry i amamas tru long stori long ol samting i painim em yet. Sampela stori bilong em yet i stap long Wastaua (tok Inglis) bilong Septemba 15, 1960.
Mipela i bilip olsem taim Brata Barry i mekim wok wantaim Krais, laik bilong em long ol man em “bel bilong ol i gutpela tru . . . bilong kisim laip i stap gut oltaim” bai stap yet. Em i save tingim ol samting bilong spirit, na em i save givim bel long lotuim Jehova na tingim tru ol manmeri bilong God, olsem na tru tumas, planti manmeri i save long em na i laikim em ol bai sori tru long em. Tasol yumi amamas long Brata Barry i bin holimpas bilip i go inap long taim em i pinisim wok bilong em hia long graun.—KTH 2:10.
[Piksa long pes 16]
Lloyd Barry na John Barr long taim ol i kamapim buk “Insight on the Scriptures” long 1988
[Piksa long pes 16]
Ol sumatin i bin winim klas namba 11 bilong Skul Gileat, bihain long 40 yia ol i bung wantaim long Japan