Ol i Mekim Laik Bilong Jehova

Givim Samting Olsem Ofa Long Helpim Wok Bilong Lotu i Tru

OL ISRAEL i bin lukim strong bilong Jehova long kisim bek ol man. Wanpela mirakel i kamap na ol i lukim solwara Retsi i bruk long tupela hap, na ol inap wokabaut long graun i drai i go inap long hapsait na ranawe long ol ami bilong Isip. Taim ol i sanap long hapsait longwe long ol Isip, ol i lukim dispela wara i bin bruk long tupela hap i pas gen na karamapim ol dispela lain i ranim ol. Jehova i bin helpim ol na ol i abrusim bagarap!​—⁠Kisim Bek 14:​21-31.

Tasol sori tru, maski Jehova i bin helpim ol, sampela Israel i no tingim ol samting God bilong ol i bin mekim bilong helpim ol. Taim Moses i stap long maunten Sainai, ol i givim ol bilas gol bilong ol long Aron na ol i tok strong olsem em i mas wokim wanpela imis na bai ol i ken lotuim. Taim Moses i kam bek, em i lukim ol dispela bikhetlain i kaikai, na dring, na danis, na brukim skru long wanpela bulmakau gol! Jehova i tokim Moses long kilim i dai 3,000 manmeri, em ol lain i bin kirapim ol Israel long mekim dispela pasin bikhet. Long dispela de, ol manmeri bilong God i lainim wanpela bikpela samting olsem ol i mas lotu long Jehova wanpela tasol.​—⁠Kisim Bek 32:​1-6, 19-29.

Dispela hevi i kamap na bihain liklik, Moses i kirap redi long bihainim tok bilong God long wokim wanpela haus lotu sel​—⁠wanpela haus bilong mekim lotu em ol inap brukim na karim i go wantaim ol. Bilong wokim dispela haus lotu sel ol i mas bungim ol samting i gat bikpela pe na ol man i gat save ol i mas wokim. Ol bai kisim we ol dispela samting na ol dispela man? Na yumi inap lain long wanem samting long dispela stori bilong Baibel?

Ol i Givim Ol Samting na Save Bilong Mekim Wok

Long maus bilong Moses, Jehova i tokim ol Israel olsem: “Yupela i mas givim sampela samting long em. Olgeta manmeri i laik givim ol samting long em, ol i mas bringim samting olsem, gol na silva na bras.” Ol i mas givim wanem ol samting? Sampela samting Moses i bin kolim em gol, silva, bras, tret, naispela laplap, skin bilong animal, diwai, na sampela kain gutpela ston.​—⁠Kisim Bek 35:​5-9.

Ol Israel i gat planti bilong ol dispela samting na ol inap givim ol dispela samting olsem ofa. Tingim, taim ol i lusim Isip, ol i bin kisim gol na silva na planti laplap i go wantaim ol. Ol “i kisim olgeta samting bilong ol Isip.”a (Kisim Bek 12:​35, 36) Pastaim, long laik bilong ol yet ol Israel i bin givim ol gol samting bilong ol long wokim wanpela imis bilong mekim lotu giaman. Olsem wanem? Nau bai ol i gat wankain laik long givim ol samting olsem ofa bilong mekim lotu i tru?

Tingim: Moses i no bin putim wanpela mak long ol samting ol wan wan i mas givim, na em i no bin mekim wanpela tok i semim ol o mekim bel bilong ol i gat tok na dispela i kirapim ol long givim samting, nogat. Em i bin askim ol tasol na bai “olgeta manmeri i laik” ol i ken givim ol samting. Moses i save em i no gat wok long subim ol manmeri bilong God long givim ol samting. Em i bilip olsem olgeta wan wan bai givim ol samting inap long skel bilong ol.​—⁠Skelim wantaim 2 Korin 8:​10-12.

Tasol ol i mas givim sampela samting moa bilong wokim haus. Jehova i tok tu long ol Israel olsem: “Olgeta man namel long yupela ol i save pinis long wokim ol samting, ol i mas i kam na wokim olgeta samting Bikpela i bin tok long yupela i mas wokim.” Em nau, i mas i gat ol man i save long wokim dispela haus. Tru tumas, ol man “i gat gutpela save na tingting bilong mekim olgeta gutpela wok”​—⁠em ol i save long wokim ol samting long diwai, long ain, na long gol na silva samting na bai ol inap pinisim haus. Tru, Jehova bai stiaim save bilong ol wokman long wokim ol samting, na taim ol i pinisim dispela wok, i stret Jehova i kisim biknem long dispela wok.​—⁠Kisim Bek 35:​10, 30-35; 36:​1, 2.

Ol Israel i laik tru long mekim ol samting olsem Jehova i tokim ol long mekim​—⁠ol i givim ol samting olsem ofa na ol i mekim wok long save bilong ol long wokim haus. Baibel i tok: “Tok bilong Moses i bin sutim bel bilong planti manmeri na ol i laik mekim olsem Moses i bin tok. Olgeta manmeri i gat save long wokim ol kain kain samting, ol i kam. Na ol manmeri i bringim ol samting long Bikpela bilong wokim haus sel bilong bung wantaim em. Na ol i bringim olgeta samting bilong mekim lotu na bilong olgeta wok bilong haus sel na bilong wokim klos bilong ol pris.”​—⁠Kisim Bek 35:​21, 22.

Dispela i Lainim Yumi Long Wanem Samting?

Long nau ol kontribusen ol man i save givim long laik bilong ol yet i save helpim wok bilong autim gutnius bilong Kingdom bilong God. Planti taim ol dispela kontribusen em mani. Tasol sampela taim, ol brata sista Kristen i mekim wok long save bilong ol bilong helpim wok bilong wokim ol Haus Kingdom, Haus Kibung, na ol brens-ofis. Na ol i mekim wok long wan handet samting haus Betel long olgeta hap bilong graun, na bilong mekim ol dispela wok, i mas i gat ol man i gat save long mekim. Olgeta man em ol i givim ol yet long mekim ol dispela wok ol i mas save olsem Jehova i no inap lusim tingting long ol gutpela wok ol i mekim!​—⁠Hibru 6:​10.

Na i wankain tu long wok bilong autim tok em yumi wan wan i save insait long en. Baibel i kirapim yumi olgeta long makim hap taim long wok strong long mekim wok autim tok. (Matyu 24:14; Efesus 5:​15-17) Sampela i save mekim wok olsem man bilong autim tok long olgeta de, olsem painia. Sindaun bilong sampela i mekim na ol i no inap lusim bikpela hap taim long mekim wok autim tok olsem wanpela painia. Maski i olsem, Jehova i amamas long ol tu. Olsem ol Israel i bin mekim bilong givim ol samting olsem ofa bilong wokim haus lotu sel, Jehova i no save putim mak long samting wan wan man i mas givim. Tasol em i laik yumi wan wan i givim bel bilong yumi, spirit bilong yumi, tingting bilong yumi, na strong bilong yumi long mekim wok bilong em. (Mak 12:30) Sapos yumi mekim olsem, orait yumi save em bai givim gutpela pe long yumi long ol wok yumi mekim long laik bilong yumi yet bilong helpim lotu i tru.​—⁠Hibru 11:⁠6.

[Futnot]