Baibel i Bekim Ol Bikpela Askim Bilong Ol Man Bilong Nau
OLSEM WANEM? Baibel inap helpim yumi ol man bilong nau? Bilong yumi ken tok yes long dispela askim, dispela buk bilong bipo yet em i mas givim gutpela tingting long ol man long ol bikpela samting bilong nau ol i laik save long en. Olsem wanem? Baibel i save mekim olsem?
Orait yumi ken stori long tupela samting ol man bilong nau i laik save long en. Taim yumi mekim olsem, yumi ken skelim ol tok bilong Baibel long dispela tupela samting.
Bilong Wanem God i Larim Pen na Hevi i Stap?
Ol pasin nogut bilong nau i mekim na planti man i gat dispela askim: Bilong wanem God i larim ol man i no gat asua ol i kisim pen na hevi? I stret ol i kamapim dispela askim, long wanem, ol hevi bilong pait na bagarapim man, paulim mani, kilim i dai wanpela lain olgeta, sampela long famili i kisim nogut, na sampela samting moa, em i wok long painim planti manmeri moa yet.
Olsem: Long Jun 1998 long noten Jemani, wanpela tren i bam long bris na 100 pasindia i dai. Maski ol dokta na ol paiaman i save gut long wok bilong ol, taim ol i lukim skin bilong ol man ol i bagarap pinis, bel bilong ol i bagarap stret. Wanpela bisop bilong Misin Evanjelikal i askim olsem: “O God, Bilong wanem dispela samting i kamap?” Bisop i no bekim dispela askim bilong em.
Ol samting i bin kamap bipo i soim olsem taim ol man i no gat asua ol i kisim nogut na ol i no save long as bilong en, sampela taim dispela i mekim ol i bel nogut. Tasol Baibel inap helpim kain man olsem, long wanem, em i stori long as na pasin nogut na hevi i save painim ol man i no gat asua.
Taim God Jehova i wokim graun na olgeta samting long en, em i no laik bai pasin nogut na hevi i painim ol man. Olsem wanem yumi inap save long dispela samting? Yumi inap save, long wanem, taim God i wokim pinis ol samting, em “i lukim olgeta dispela samting i gutpela, na em i amamas tru.” (Stat 1:31) Askim yu yet, ‘Sapos mi lukim samting i nogut tru, bai mi tok em “i gutpela”?’ Nogat, a? Na olsem tasol, taim God i tok olgeta samting “i gutpela,” i no gat wanpela samting nogut i stap long graun, nogat. Orait, pasin nogut i kamap olsem wanem na long wanem taim?
Bihain liklik long God i wokim tupela tumbuna bilong yumi bilong pastaim, em Adam na Iv, wanpela strongpela spirit i toktok wantaim Iv na em i sutim tok long Jehova olsem em i no wanpela man yumi ken bilip tru long em na i no stret em i stap nambawan bos. (Stat 3:1-5) Bihain dispela spirit, Satan, em i tok ol man i no inap stap gut long God sapos hevi i painim ol. (Jop 2:1-5) Orait Jehova i mekim wanem? Em i larim bikpela hap taim i lus bilong kamapim long ples klia olsem ol man i no inap bosim gut wokabaut bilong ol yet—Jehova i mas soim rot long ol. (Jeremaia 10:23) Taim ol man i bikhet na sakim ol lo bilong God, ol i mekim sin, na dispela i kamapim kain kain hevi. (Saveman 8:9; 1 Jon 3:4) Tasol maski kain samting olsem i kamap, Jehova i save sampela man bai stap gut long em.
Kirap long taim dispela pasin bikhet i kamap long Iden, inap 6,000 yia i bin kamap na i go pinis. Yu ting em longpela taim tumas? Tru, Jehova inap bagarapim Satan na ol lain bilong em inap planti handet yia i go pinis. Tasol i gutpela Jehova i bin wet pastaim na larim bikpela hap taim i lus, long wanem, nau ol samting i kamap long ples klia olsem i stret em i stap nambawan bos na ol man inap i stap gut long em. Sampela taim long ol kot bilong nau, planti yia i mas lus pastaim bilong kamapim long ples klia husat i gat asua na husat i no gat asua.
Ol tok i bin kamap—olsem husat i mas i stap bos bilong heven na graun, na ol man inap i stap gut long God o nogat—ol dispela tok em i bikpela samting tru long Jehova na ol manmeri, olsem na God i bihainim gutpela tingting taim em i larim bikpela hap taim i lus! Nau yumi save pinis long ol samting i kamap taim ol man i sakim ol lo bilong God na bosim wokabaut bilong ol yet. Pasin nogut i kamap long olgeta hap. Long dispela as tasol, planti man long nau i no gat asua ol i kisim pen na hevi.
Tasol gutpela tru, Tok Bilong God i makim olsem pasin nogut i no ken i stap inap olgeta taim. Liklik taim Jehova bai pinisim ol pasin nogut wantaim ol man i as bilong en. Sindaun 2:22 i tok: “God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” Tasol ol man i stap gut long God ol i ken tingim olsem klostu nau taim bai kamap na “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:4.
Em nau, Baibel i kamapim klia i gat wanem as na ol man i no gat asua ol i kisim pen na hevi. Na Baibel i tokim yumi olsem klostu nau pasin nogut na hevi na pen bai pinis. Tasol nau kain kain hevi i save painim yumi, olsem na yumi laik save long bekim bilong narapela bikpela askim.
I Stap Bilong Yumi i Gat Wanem As?
Long nau, winim olgeta taim bipo, ol man i laik save, i stap bilong ol i gat wanem as bilong en. Planti ol i askim ol yet: ‘Mi stap bilong mekim wanem? Olsem wanem mi inap save i gat wanem as na mi stap?’ I gat kain kain samting i kirapim ol long kamapim ol dispela askim.
Taim wanpela long famili i kisim nogut, dispela inap bagarapim i stap bilong narapela long famili. Olsem: Long 1998, long Baveria, Jemani, ol i stilim wanpela pikinini meri i gat 12-pela krismas na kilim em i dai. Wanpela yia bihain, mama bilong dispela pikinini i tokaut olsem long olgeta de em i wok long painim save long i stap bilong em i gat wanem as bilong en, tasol nogat. Sampela yangpela i laik save, ol i stap bilong mekim wanem. Ol i laik bai ol i ken i stap bel isi, na i stap bilong ol i gat as bilong en, na ol i laik pilim olsem ol narapela i laikim ol, tasol ol i bel hevi taim ol i lukim planti man i bihainim pasin bilong giaman na pasin nogut. Sampela narapela ol i save givim bel long mekim wanpela wok i gat biknem, tasol ol i kisim save olsem bikpela namba na strong, na mani kago, i no inap helpim ol na bai i stap bilong ol i gat as bilong en, nogat.
Maski wanem wanem samting i kirapim man na em i laik save em i stap bilong mekim wanem, i gutpela em i kisim bekim bilong dispela askim, a? Baibel i helpim gut yumi long dispela samting tu. Em i makim olsem Jehova em i God bilong kamapim laik bilong em, na i gat gutpela as na em i mekim ol samting. Yumi askim olsem, Bai yu wokim wanpela haus sapos i no gat as na yu wokim? Ating nogat, a? Long wanem, bilong wokim haus yu mas tromoi bikpela mani, na planti mun o yia i mas lus tu. As na yu wokim haus em i bilong yu yet o bilong narapela i ken i stap long en. Yumi ken mekim wankain tok long Jehova. I gat as na em i wokim graun na olgeta samting i gat laip long en. (Skelim wantaim Hibru 3:4.) Em i gat wanem laik long dispela graun?
Tok profet bilong Aisaia i tokaut olsem Jehova em i God tru. “Em i bin wokim skai na graun.” Tru tumas, “em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Yes, kirap long taim Jehova i wokim graun, em i gat laik bai ol man i ken i stap long en. Song 115:16: “Heven em i ples bilong God tasol, na em i givim graun long yumi manmeri.” Olsem na Baibel i soim olsem Jehova i wokim graun bilong ol man i bihainim tok bilong em ol i ken i stap long en na lukautim dispela graun.—Stat 1:27, 28.
Olsem wanem? Pasin bikhet bilong Adam tupela Iv i mekim na Jehova i senisim laik bilong em? Nogat. Olsem wanem yumi inap save? Orait, tingim dispela samting: Ol i raitim Baibel sampela tausen yia bihain long pasin bikhet i bin kamap long Iden. Sapos God i bin senisim laik bilong em bilong pastaim, orait bilong wanem Baibel i no kamapim dispela samting? Dispela i kamapim klia olsem laik bilong God long graun na ol man em i no senis liklik.
Na tu, i no gat wanpela taim na laik bilong Jehova i no kamap. Long rot bilong Aisaia, God i strongim yumi olsem: “Ren i save pundaun long skai, em i no save go bek nating antap long skai. Nogat. Em i save givim wara long graun na mekim ol kaikai i kamap long gaden, na ol man i save kisim. Sampela ol i save kaikai na sampela pikinini kaikai ol i save planim. Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:10, 11.
Ol Samting God i Laik Bai Yumi Mas Mekim
Em nau, yumi ken bilip tru olsem laik bilong God bai kamap tru, em i laik bai ol man i bihainim tok bilong em ol i ken i stap oltaim long graun. Sapos yumi laik stap oltaim long graun, yumi mas bihainim tok bilong saveman King Solomon, em i tok: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”—Saveman 12:13; Jon 17:3.
Bilong i stap bilong yumi i ken stret wantaim laik bilong God long ol man, yumi mas kisim save long trupela God na bihainim ol tok bilong em i stap long Baibel. Sapos nau yumi mekim dispela samting, orait yumi ken tingting long stap laip oltaim long Paradais long graun—long dispela taim bai yumi lain yet long ol pasin bilong God na ol gutpela samting em i bin wokim yumi no bin save long en. (Luk 23:43, NW) Em gutpela samting tru bilong wet long en, a?
Planti man i laik save i gat wanem as na ol i stap, ol i lukim Baibel na kisim bikpela amamas nau long dispela taim stret. Olsem: Wanpela yangpela man, nem bilong em Alfred, em i no save i gat wanem as na em i stap. Em i bel nogut long pasin bilong ol misin ol i insait long ol bikpela pait, na ol lain bilong politik ol i save giaman na paulim mani samting. Bilong kisim save long em i stap bilong mekim wanem, Alfred i go lukim ol Indian bilong Not Amerika, tasol ol i no inap helpim em, olsem na em i go bek long Yurop. Em i bel hevi, olsem na em i kirap kisim ol drak na laikim ol musik i pairap strong. Tasol bihain, Alfred i kirap na skelim gut ol tok bilong Baibel long olgeta wik na dispela i helpim em long save long as tru na em i stap, na em i stap bel isi.
Lait Bilong Soim Rot Long Yumi
Orait, yumi ken tok wanem long Baibel? Yu ting em inap helpim tru ol man bilong nau? Em inap, long wanem, em i givim gutpela tingting long ol man long ol bikpela samting bilong nau ol i laik save long en. Baibel i helpim yumi long save, God i no as bilong pasin nogut, na em i helpim yumi long save long ol samting yumi mas mekim na bai i stap bilong yumi i gat as bilong en. Na tu, Baibel i kamapim planti tok long sampela narapela samting yumi laik save long en long nau. Em i stori long marit, mekim bikpela long ol pikinini, pasin bilong wok gut wantaim ol narapela, man i dai pinis i no lus olgeta, na kain samting olsem.
Sapos yu no bin mekim, orait plis skelim gut ol tok bilong Baibel. Taim yu save olsem Baibel inap soim rot long yu, ating bai yu pilim wankain olsem man bilong raitim Song, em i wetim God Jehova i soim rot long em, na em i singsing olsem: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”—Song 119:105.
[Piksa long pes 6]
Yu save long as na God i larim ol man i no gat asua ol i kisim pen na hevi?
[Piksa long pes 7]
Yu inap mekim na i stap bilong yu i gat as bilong en