Maunten Atos—Wanpela “Maunten Holi”?

LONG ol 220 milion samting memba bilong Misin Otodoks, maunten Atos, long hap not bilong kantri Grik, em wanpela “maunten i holi tru long ol manmeri bilong Misin Otodoks long olgeta hap.” Wanpela samting planti bilong ol i gat bikpela laik tru long mekim em long go long dispela “maunten holi” bilong Atos. Dispela “maunten holi” em wanem samting? Olsem wanem dispela maunten i kamap olsem wanpela bikpela samting long ol? Na em wanpela “maunten” ol man i pret long God ol i mas i go long en bilong kisim helpim long ol samting bilong spirit na lotu tru long God?

Dispela tok “maunten holi” i stap long Baibel. Dispela tok i makim lotu bilong trupela God Jehova, em i stap holi, klin, na i winim olgeta narapela lotu. Taim King Devit i bringim bokis kontrak i kam putim long dispela hap, maunten Saion long Jerusalem bilong bipo em i kamap wanpela “maunten holi.” (Song 15:​1, NW; 43:​3, NW; 2 Samuel 6:​12, 17) Taim Solomon i wokim pinis haus lotu bilong em long maunten Moria, dispela nem “Saion” i karamapim tu dispela hap em tempel i stap long en. Olsem na maunten Saion i bin stap yet olsem wanpela “maunten holi” bilong God. (Song 2:​6, NW; Joel 3:​17, NW ) Haus lotu bilong God i bin stap long Jerusalem, olsem na sampela taim ol i kolim dispela taun olsem “maunten holi” bilong God.​—⁠Aisaia 66:​20, NW; Daniel 9:​16, 20, NW.

Olsem wanem long nau? Maunten Atos​—⁠o sampela narapela maunten​—⁠ol i “maunten holi” na ol man i mas i go long en bilong lotuim God bambai em i ken orait long ol?

“Maunten Holi” Bilong Ol Bruder

Maunten Atos em i stap long hap is bilong poin Kalsidais long pinis bilong wanpela longpela hap graun i sut i go long solwara Ijien, klostu long hap is bilong taun nau ol i kolim Tesaloniki. Dispela maunten i gutpela tru na i go antap inap 2,032 mita.

Long bipo yet, ol man i tingim maunten Atos i olsem wanpela ples holi. Long stori tumbuna bilong ol Grik, taim maunten Olimpus i no kamap yet olsem ples bilong ol god, Atos em i ples bilong ol god. Sampela yia bihain long taim bilong King Konstantin (yia 300 C.E. samting), Atos i kamap olsem ples holi bilong ol lotu Kristen. Wanpela stori tumbuna i tok, taim “virgo” Maria wantaim Evanjelis Jon i laik kisim sip i go long Saiprus bilong lukim Lasarus, bikpela ren na win i mekim na tupela i mas sua long Atos. Dispela maunten i luk naispela tru, olsem na Maria i askim Jisas long givim dispela maunten long em. Olsem na ol i kolim tu nem bilong maunten Atos olsem “Gaden Bilong Virgo Maria.” Sampela yia moa bihain, ol i kolim dispela maunten olsem Maunten Holi. Long yia 1050 C.E. samting, King Konstantin Monomakus Namba 9 i givim tok na ol i mekim dispela nem i kamap olsem nem tru bilong dispela maunten.

Maunten Atos i stap antap tru na em i stap longwe long ol narapela ples, olsem na em i gutpela ples tru bilong ol man i laik sakim olgeta gutpela laik bilong skin ol i ken go i stap long dispela hap. Insait long planti handet yia, ol man bilong misin Otodoks bilong kantri Grik, Sebia, Romenia, Balgeria, Rasia, na sampela narapela kantri moa, ol i wokim planti haus bruder, na ol haus lotu na ples bilong ol man long dispela maunten. Inap 20 bilong ol dispela haus bruder na haus lotu samting i sanap yet.

Maunten Atos Long Nau

Long nau Atos i olsem wanpela hap i lukautim ol yet, na long 1926 ol i kamapim wanpela sata bilong ol. Inap planti yia i no gat planti bruder i stap long dispela hap, tasol nau namba i go bikpela, winim 2,000.

Olgeta wan wan bilong ol dispela haus bruder i gat ol gaden samting na haus lotu, na ples slip bilong ol man. Bikpela haus lotu bilong ol dispela lain i stap long ples ol i kolim Karoulia, em i stap antap tru long pinis bilong maunten Atos. Bilong i go antap long ol haus i stap long dispela hap, man i mas bihainim ol liklik rot i gat hatwok long en, na bihainim lata ol i wokim long ston, na ol sen samting bilong holim na i go antap. Long Atos, ol bruder i save bihainim yet ol pasin bilong lotu bilong bipo. Ol i mekim wok long klok bilong ol Bisantain (de i kirap long taim san i go daun), na ol i bihainim kalenda bilong Julius (13 de bihain long kalenda bilong Gregori).

Maski ol i tok dispela ples lotu i bilong santu Maria, inap 1,000 yia dispela hap olgeta i tambu long ol meri​—⁠maski em man o animal. Na tu, i tambu long ol man em ol i rausim bol bilong ol o i no gat mausgras. I no longtaim i go pinis, ol i orait liklik long ol man i no gat mausgras na sampela animal meri i ken i go klostu. Tasol i tambu yet long ol meri i go klostu inap 500 mita long nambis bilong Atos.

Wanpela “Maunten Holi” Bilong Olgeta Manmeri

Olsem wanem? Maunten Atos em “maunten holi” ol Kristen i stap aninit long God ol i mas i go long en bilong lotu? Taim Jisas i toktok wantaim wanpela meri Samaria i bilip olsem ol man i mas i go long maunten Gerisim bilong lotu long God, em i kamapim klia olsem ol man i no ken go long wanpela maunten tru tru bilong lotuim God. Jisas i tok: “Wanpela taim i laik kamap na bai yupela i no lotu long Papa long dispela maunten [Gerisim], na bai yupela i no lotu long em long Jerusalem tu.” Bilong wanem? “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.”​—⁠Jon 4:​21, 24.

Taim profet Aisaia i stori long taim bilong yumi, em i mekim tok piksa na em i tok profet olsem wanpela “maunten, haus bilong Bikpela i sanap long en, em bai stap antap tru na i winim olgeta arapela maunten” na ol manmeri bilong olgeta lain bai kam bung long en.​—⁠Aisaia 2:​2, 3.

Ol man na meri i laik bai God i ken orait long ol na ol i stap pren bilong Jehova, ol i mas lotuim em long ‘spirit na long pasin i tru.’ Planti milion manmeri long olgeta hap bilong graun ol i go antap pinis long “maunten” bilong Jehova. Ol i gat wankain tingting olsem bilong wanpela meri loya bilong kantri Grik em i tok olsem long maunten Atos: “Mi no ting ol samting bilong spirit i stap insait long sampela kain banis o long ol haus bruder tasol.”​—⁠Skelim wantaim Aposel 17:⁠24.

[Blok long pes 31]

Ol Samting i Dia Tumas

Insait long planti handet yia, ol bruder bilong Atos i bin bungim planti samting i dia tumas. Ol i bungim 15,000 ol rait bilong bipo, na sampela bilong ol dispela rait i bilong yia 300 C.E. samting. I gat ol piksa ol man i bin penim long bipo tru, ol imis samting, na ol samting ol i wokim long ain, na tu, i gat ol rait, volyum olgeta bilong gutnius, na sampela singsing bilong lotu. Ol i ting insait long olgeta rait Grik i stap long olgeta hap bilong graun, 25 pesen bilong ol i stap long maunten Atos, maski ol i no stretim yet sampela bilong ol. Long 1997, long namba wan taim ol bruder i orait long putim sampela bilong ol dispela samting i dia tumas long Tesaloniki bambai ol man i ken lukim.

[Piksa Kredit Lain long pes 31]

Telis/Greek National Tourist Organization