Ripot Long Wok Bilong Kingdom
Em i No Sot Moa Long Ol Samting Bilong Spirit
SAIPRUS em i wanpela ailan i stap long hap not-is bilong solwara Mediterenian. Long taim bilong ol man i bin raitim Baibel, Saiprus i gat nem olsem ples bilong kopa na gutpela timba. Pol na Barnabas i autim gutnius bilong Kingdom long dispela hap long namba wan raun bilong ol long mekim wok misineri. (Aposel 13:4-12) Long nau, gutnius i helpim yet sindaun bilong planti man long Saiprus. Dispela samting i painim Lucas, em wanpela man i gat 45 krismas samting. Em i tok:
“Mi kamap long famili i gat 7-pela pikinini, long wanpela fam bilong lukautim ol bulmakau. Kirap long taim mi pikinini yet, mi gat bikpela laik long ritim ol buk. Nambawan buk mi laikim tru, em liklik buk Baibel bilong Ol Skripsa Grik. Taim mi gat 10-pela krismas, mi na sampela pren i kamapim wanpela liklik grup bilong stadi long Baibel. Tasol dispela grup i no stap longpela taim, long wanem, sampela lapun bilong ples ol i tok mipela i sakim bilip bilong lotu bilong mipela.
“Bihain, taim mi skul long Amerika, mi bungim ol manmeri bilong kain kain lotu. Dispela i kirapim gen laik bilong mi long save long ol samting bilong spirit. Inap planti de mi stap long laibreri bilong yunivesiti na kisim save long narapela narapela lotu. Mi go long planti haus lotu tu, tasol maski mi hatwok olsem, mi sot yet long ol samting bilong spirit.
“Taim mi pinis long skul, mi go bek long Saiprus na mi kisim wok long haus sik olsem dairekta bilong laboritori. Wanpela lapun man, nem bilong em Antonis, em i wanpela Witnes Bilong Jehova na em i save kam lukim mi long ples wok bilong mi. Tasol lain bilong Misin Grik Otodoks i lukim em taim em i kam lukim mi.
“I no longtaim na wanpela tisa bilong lotu i kam lukim mi na em i no laik bai mi toktok wantaim ol Witnes Bilong Jehova. Kirap long taim mi liklik yet mi bin lain olsem Misin Grik Otodoks em i trupela lotu, olsem na mi bihainim laik bilong misin na mi no bung moa wantaim Antonis, na mi kirap toktok long Baibel wantaim dispela tisa bilong lotu. Mi go tu long planti haus bruder long Saiprus. Mi go long noten Grik bilong lukim maunten Atos, em wanpela maunten i holi tru long tingting bilong ol man bilong Misin Otodoks. Tasol mi no kisim bekim long ol askim bilong mi long Baibel.
“Mi beten askim God long helpim mi long painim tok i tru. Bihain liklik, Antonis i kam lukim mi gen long ples wok, na mi pilim olsem God i bin harim beten bilong mi. Olsem na mi no go moa long lukim dispela tisa bilong lotu, na mi kirap stadi long Baibel wantaim Antonis. Mi wok long kamap strong, na long Oktoba 1997, mi kisim baptais bilong makim olsem mi dediket pinis long Jehova.
“Meri bilong mi na tupela bikpela pikinini meri bilong mipela, em ol i gat 14 na 10 krismas, pastaim ol i birua long mi. Tasol gutpela pasin bilong mi i mekim na meri bilong mi i laik kam long wanpela miting long Haus Kingdom. Em i pilim tru gutpela pasin bilong ol Witnes na pasin bilong ol long tingim em. Em i amamas tru long pasin bilong ol Witnes long yusim Baibel. Olsem na meri bilong mi na tupela pikinini meri ol i laik stadi long Baibel wantaim ol Witnes Bilong Jehova. Tingim bikpela amamas bilong mi taim ol dispela 3-pela meri i kisim baptais long “Tok Profet Bilong God” Kibung Distrik long 1999!
“Em nau, wok bilong mi long painim tok i tru i karim gutpela kaikai. Nau famili bilong mipela olgeta—meri bilong mi na 4-pela pikinini—mipela i wanbel long lotu tru long Jehova.”