Wanem Samting Em Ki Bilong Mekim Wok i Kamap Gutpela?
TUPELA yangpela man i wok long redim gut wanpela narapela kain masin bilong ol i ken traim em. Wantu strongpela win i kisim masin i go antap, na bihain win i sakim masin i kam daun wantaim bikpela pairap. Dispela tupela man i bel hevi, na ol i no mekim wanpela tok. Hatwok bilong ol i bagarap pinis—diwai na ain ol i bin wokim dispela masin long en i hip i stap na slip nating long graun.
Samting i kamap long dispela de long Oktoba 1900, em i no namba wan taim dispela samting i kamap long Orville na Wilbur Wright. Bipo tu wok bilong ol long kamapim wanpela kain balus i no bin kamap gutpela. Ol i bin lusim pinis sampela yia na planti mani bilong wokim wanpela balus.
Tasol pasin bilong ol long wok strong i karim gutpela kaikai. Long Disemba 17, 1903, long Kiti Hok, Not Karolaina, Amerika, dispela tupela brata i kirapim wanpela kain balus i gat ensin, na balus i flai inap 12-pela sekon. Em sotpela taim tasol sapos yumi skelim wantaim raun bilong ol balus long nau, tasol dispela i senisim tru i stap bilong ol man!
Klostu olgeta wok inap kamap gutpela sapos man i no les kwik. Maski man i gat laik long lainim nupela tok ples, o wanpela wok, o em i laik kamap pren bilong narapela, em inap winim mak bilong klostu olgeta samting sapos em i wok strong. Man bilong raitim buk, em Charles Templeton, em i tok: “Inap 9-pela bilong 10-pela 10-pela wok ol inap kamap gutpela, sapos man i mekim wanpela samting: em i wok strong.” Man bilong raitim stori long nius, em Leonard Pitts, Jr., em i tok: “Yumi toktok long bikpela save bilong ol man long wokim ol samting, na yumi save sampela taim gutpela samting i kamap na wok i kamap gutpela, tasol planti taim yumi no tingim ol samting i bikpela samting. Em pasin bilong ol man long wok strong, na i no long olgeta taim wok bilong ol i kamap gutpela. Ol i kirap wok long moningtaim tru na ol i wok i go inap long biknait.”
Dispela i strongim tok bilong Baibel: “Man bilong wok hat bai i kamap bosman.” (Sindaun 12:24) Pasin bilong wok strong i makim olsem yumi no les long mekim wok. Dispela em i bikpela samting sapos yumi laik inapim wok yumi kirap long mekim. Pasin bilong no ken les em wanem samting? Yumi ken mekim wanem bambai yumi no ken les long wok strong bilong winim ol mak yumi bin putim? Na yumi no ken les long mekim wanem ol samting? Stori i kamap bihain long dispela bai bekim ol dispela askim.
[Piksa Kredit Lain long pes 3]
U.S. National Archives photo