Beten i Gat Strong
San i laik go daun long taun Nahor long Midel-Is. Wanpela man Siria, nem bilong em Elieser, em i kam wantaim 10-pela kamel long wanpela hulwara i stap ausait long taun. Skin bilong Elieser i les na nek i drai, tasol em i tingting long ol samting bilong ol narapela. Em i kam long narapela kantri bilong painim poroman marit bilong pikinini man bilong bikman bilong em. Na tu, em i mas painim dispela meri namel long ol wanblut bilong bikman bilong em. Olsem wanem em bai mekim dispela samting i gat hatwok long en?
ELIESER i bilip olsem beten i gat strong. Em i bihainim pasin daun olsem ol pikinini na askim God olsem: “God, Bikpela bilong bikman bilong mi Abraham, yu ken marimari long bikman bilong mi, na mekim wok bilong mi i kamap gutpela nau. Mi stap hia klostu long hul wara, na ol yangpela meri bilong ples bai i kam bilong pulimapim wara. Bai mi tokim wanpela yangpela meri olsem, ‘Plis, yu daunim sospen wara bilong yu na bai mi dring liklik wara.’ Na sapos em i tok, ‘Yu dring, na bai mi givim wara long ol kamel bilong yu tu,’ orait mi laik bai em dispela meri tasol yu makim bilong wokman bilong yu Aisak. Sapos ol samting i kamap olsem, orait bai mi save yu marimari long bikman bilong mi, na yu laik helpim em.”—Stat 24:12-14.
Bilip bilong Elieser olsem beten i gat strong i no lus nating. Namba wan meri i kam long hulwara em i tumbuna pikinini meri bilong brata bilong Abraham! Nem bilong em Rebeka, na em i no marit, na em i save bihainim stretpela pasin, na em i gat gutpela skin. Em i givim wara long Elieser bilong em i ken dring, na em i tok em i ken givim wara long olgeta kamel bilong Elieser tu. Bihain, taim famili i stretim tok pinis, Rebeka i orait long go wantaim Elieser long wanpela kantri i stap longwe na long kamap meri bilong pikinini man bilong Abraham, em Aisak. Em nau, God i kamapim long ples klia olsem em i harim beten bilong Elieser. Long dispela taim bipo, wan wan taim tasol God i bin mekim sampela samting olsem mirakel bilong helpim ol man!
Yumi ken lain long planti samting long beten bilong Elieser. Dispela beten i kamapim klia strongpela bilip na pasin daun bilong em, na pasin bilong em long tingim ol samting bilong ol narapela. Beten bilong Elieser i kamapim tu olsem em i daun long pasin Jehova i save mekim long ol manmeri. Em i save God i laikim tru Abraham, na tu, em i save long tok promis bilong God olsem long rot bilong Abraham olgeta manmeri bai kisim ol blesing long bihain. (Stat 12:3) Olsem na bilong kirapim beten bilong em, Elieser i tok: “God, Bikpela bilong bikman bilong mi Abraham.”
Krais Jisas em i dispela tumbuna pikinini bilong Abraham em olgeta gutpela manmeri bai kisim blesing long rot bilong em. (Stat 22:18) Sapos yumi laik bai God i harim beten bilong yumi long nau, yumi mas daun long ol samting God i save mekim long ol man long rot bilong Pikinini bilong em. Krais Jisas i tok: “Sapos yupela i pas long mi, na tok bilong mi em i stap long yupela, orait yupela i ken askim inap long laik bilong yupela, na ol samting bai i kamap olsem yupela i bin tok.”—Jon 15:7.
Wanpela disaipel bilong Krais em i save olsem dispela tok bilong Jisas i tru, em aposel Pol. Bilip bilong em olsem beten i gat strong i no lus nating. Em i kirapim ol wanwok Kristen long kamapim olgeta wari bilong ol long God long rot bilong beten, na em i tok: “Krais i save strongim mi, na long strong bilong em mi inap mekim olgeta samting.” (Filipai 4:6, 7, 13) Olsem wanem? Dispela i makim olsem olgeta samting Pol i askim God long en em bai kisim? Orait nau yumi ken skelim dispela samting.
God i No Save Harim Olgeta Beten
Taim Pol i mekim gutpela wok bilong em, em i karim wanpela hevi bilong skin na em i tok dispela hevi i olsem ‘nil i sutim skin’ bilong em. (2 Korin 12:7) Ating ol birua na ol “giaman brata” i mekim na Pol i bel hevi tru. (2 Korin 11:26; Galesia 2:4) O em i gat sik long ai na em i pilim pen long dispela. (Galesia 4:15) Maski dispela ‘nil i sutim skin’ i wanem samting, em i daunim Pol. Em i tok: “Tripela taim mi beten strong long Bikpela, long em i ken rausim dispela samting long mi.” Tasol God i no rausim dispela hevi. God i tokim Pol olsem ol gutpela samting bilong spirit em i kisim pinis long God, olsem strong bilong karim ol hevi, ol dispela samting em inap long em. God i tok tu olsem: “Strong bilong mi em i save kamap strong tru long man i no gat strong.”—2 Korin 12:8, 9.
Ol samting i bin painim Elieser na Pol i lainim yumi long wanem samting? God Jehova i save harim beten bilong ol man i laik lotuim em long pasin daun. Tasol dispela i no makim olsem God i save inapim olgeta laik bilong man, long wanem, God i save tingim ol samting bai kamap long bihain. Save bilong em long ol samting inap helpim yumi, winim save bilong yumi yet. Na bikpela samting moa, oltaim em i save mekim ol samting i stret wantaim laik bilong em olsem Baibel i stori long en.
Taim Bilong Kamap Orait Long Spirit
God i tok promis long oraitim ol sik bilong ol manmeri, em ol sik bilong skin, tingting, na bel. Em bai mekim olsem long taim Pikinini bilong em i bosim graun long Taim Bilong Wan Tausen Yia. (KTH 20:1-3; 21:3-5) Ol gutpela Kristen i amamas long wetim dispela gutpela taim bihain, na ol i bilip tru long strong bilong God long kamapim dispela samting. Ol i no ting God i mas wokim mirakel na oraitim sik bilong ol long nau, nogat; ol i beten askim God long mekim gut bel bilong ol na long givim strong long ol long karim ol dispela hevi. (Song 55:22) Taim ol i sik, ol inap beten askim God long stiaim ol long painim gutpela marasin samting em ol i gat mani bilong kisim.
Sampela lotu i kirapim ol man long beten bambai sik bilong ol i ken pinis long nau, na ol i tok Jisas na ol aposel bilong em ol i bin mekim ol mirakel bilong oraitim ol sik. Tasol ol dispela mirakel i gat as bilong en. Ol i kamapim klia olsem Krais Jisas em i Man God i makim, na tu, God i bin givim baksait long lain Juda na em i orait long nupela kongrigesen Kristen. Long taim bilong ol aposel, ol wok mirakel i bikpela samting bilong strongim bilip bilong nupela kongrigesen Kristen. Taim dispela nupela kongrigesen i stap pinis na i kamap strong, pasin bilong wokim ol mirakel “i pinis.”—1 Korin 13:8, 11.
Long dispela bikpela taim bilong nau, God Jehova i stiaim lain bilong em long mekim wok bilong helpim ol man long kamap orait long ol samting bilong spirit. Rot i op yet, olsem na ol manmeri i mas hariap na bihainim dispela tok: “Nau Bikpela i stap klostu long yupela na i wetim yupela, olsem na nau em i taim bilong yupela i mas beten long em na i go klostu long em. Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God, Bikpela bilong yumi. Em i save marimari moa yet long ol manmeri i kam bek long em, na em i save lusim sin bilong olgeta dispela lain.”—Aisaia 55:6, 7.
Ol i autim gutnius bilong Kingdom bilong God bilong helpim ol sinman i tanim bel long kamap orait long ol samting bilong spirit. (Matyu 24:14) God Jehova i strongim ol wokman bilong em long mekim dispela wok bilong helpim ol man long kisim laip, na taim pinis bilong dispela taim nogut i no kamap yet, God i wok long helpim planti milion manmeri bilong olgeta lain long tanim bel na long pas gut wantaim em. Ol man i beten askim God long helpim ol long kamap orait long ol samting bilong spirit, na ol man i beten askim God long helpim ol long mekim dispela wok bilong helpim ol man—God i save harim beten bilong ol.
[Piksa Kredit Lain long pes 3]
Eliezer and Rebekah/The Doré Bible Illustrations/Dover Publications