Ripot Long Wok Bilong Kingdom
Ol i Bilip na Ol i Kisim Gutpela Pe Tru
APOSEL Pol em man i gat strongpela bilip, na em i kirapim ol wanbilip long ol tu i mas kisim bilip. Em i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Ol dispela stori i stap daunbilo ol i kam long Mosambik na ol i kamapim olsem wanem Jehova i save givim gutpela pe long ol man i gat strongpela bilip na em i save harim beten bilong ol.
• Wanpela sista em man bilong em i dai pinis na em i bilong wanpela provins long hap not, em Niasa, em i bin tingting planti long olsem wanem em na ol 6-pela pikinini bilong em ol i ken go long “Bihainim Rot God i Makim” Kibung Distrik. Bilong lukautim em yet long mani em i save salim ol kaikai samting long maket, tasol klostu long taim kibung i laik kamap, em i gat liklik mani tasol inap long baim rot bilong em na ol pikinini long go long kibung. Tasol em i pasim tok long bel long bilip long ol gutpela samting Jehova i save givim, na em i kirap redim ol samting bilong i go long kibung.
Em i kalap long tren wantaim 6-pela pikinini bilong em. Taim ol i raun long tren, boskru i kam bilong askim em long tiket. Boskru i lukim kat sista i pasim na em i askim olsem, em kat bilong wanem samting? Sista i tokim em olsem dispela kat em i pasim i bilong makim olsem em i wanpela bilong ol lain i go long kibung distrik bilong ol Witnes Bilong Jehova. Boskru i tok: “Dispela kibung bai kamap long we?” Taim boskru i kisim save olsem dispela kibung bai kamap long narapela provins, em Nampula, em i stap longwe inap olsem 300 kilomita samting, em i tokim sista long baim hap mani tasol long pe bilong tiket! Na long hap mani i stap yet em i givim tiket bilong kam bek long dispela sista na famili bilong em. Sista i amamas tru long em i bin bilip long Jehova!—Song 121:1, 2.
• Inap 25 yia samting, wanpela meri bilong lotu i beten long God long em i ken soim stretpela rot long em bilong lotuim God. Long lotu em i save go long en ol i save bungim pasin bilong mekim lotu wantaim ol pasin bilong ol tumbuna, na em i tingting planti olsem God i amamas long dispela kain pasin bilong lotuim em o nogat.
Em i tok: “Long olgeta taim mi bin tingim tok bilong Jisas i stap long Matyu 7:7: ‘Yupela i mas prea na askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim. Yupela i mas paitim dua, na God bai i opim long yupela.’ Mi tingim dispela skripsa, na long olgeta taim mi save beten long God long soim mi long tok i tru. Wanpela taim pasto bilong mipela i askim olgeta man i save salim ol kaikai samting long maket long kisim sampela mani na ol samting ol i salim long maket i kam long em na bai em i ken givim blesing long ol. Mi ting dispela samting pasto i askim mipela long en em i no stret wantaim ol tok bilong Baibel, olsem na mi no kisim wanpela samting i go long em. Taim pasto i lukim olsem mi no kisim wanpela ‘ofa’ i go long em, em i kirap toknogutim mi long ai bilong ol narapela wanlotu. Long dispela taim mi kisim save olsem dispela em i no rot God i laik bai mipela i mas lotuim em, olsem na mi lusim dispela lotu. Orait mi wok yet long beten bilong painim tok i tru.
“Bihain mi strongim bel na mi go lukim wanpela wanblut em i Witnes Bilong Jehova. Em i givim wanpela liklik nius long mi, na taim mi kaunim wantu mi kisim save olsem God i harim ol beten bilong mi. Bihain, man mi save sindaun wantaim em tu i laikim tok i tru bilong Baibel, na mipela i stretim marit bilong mipela. Bihain man bilong mi i sik nogut tru. Tasol i go inap long em i dai em i strongim mi long holimpas tok i tru na bai mitupela i ken bung gen long Paradais.
“Inap long olgeta taim bihain mi tenkyu long Jehova long em i bin harim ol beten bilong mi na em i soim mi long stretpela rot bilong lotuim em. Na tu God i bin harim beten bilong mi na olgeta 8-pela pikinini bilong mi ol i kisim baptais na kamap wokman bilong Jehova.”