Ol i Kirapim Klas Namba 108 Bilong Skul Gileat Long Mekim Wok Holi
TAIM Baibel i stori long pasin bilong lotu long God, planti taim em i kolim dispela tok “wok holi.” Ol i kisim dispela tok long wanpela tok Grik, insait bilong en i olsem mekim wok bilong God. (Rom 9:4, NW ) Long bung bilong namba 108 klas i winim skul long Wastaua Baibel Skul Bilong Gileat, inap 5,562 brata sista i putim yau long ol tok bilong program ol i harim ol gutpela tok bilong helpim ol sumatin i winim skul long mekim wok holi em God Jehova bai amamas long en.a
Theodore Jaracz, em wanpela bilong Lain Bilong Bosim Ol Witnes, em i mekim wok siaman long dispela bung. Bilong kirapim bung ol i mekim singsing namba 52, nem bilong en, “Nem Bilong Papa Bilong Yumi.” Namba tu lain bilong dispela singsing i tok: “Mipela i painim rot long mekim holi nem bilong yu.” Dispela tok i kamapim tru laik i stap long bel bilong olgeta sumatin bilong klas i winim skul (ol i bilong 10-pela narapela narapela kantri), olsem ol i laik mekim wok long skul ol i kisim bilong mekim wok misineri long 17 narapela narapela kantri ol bai go long en.
Long ol tok em i mekim pastaim, Brata Jaracz i stori long faipela mun ol i wok strong long stadi long Baibel na dispela i bin redim ol long mekim wok long ol narapela kantri. Dispela i helpim ol long “skelim gut olgeta tok na pasin,” olsem skelim gut ol samting ol i lainim pinis wantaim Tok Bilong God, na “holimpas ol gutpela pasin.” (1 Tesalonaika 5:21) Em i mekim tok bilong strongim ol long stap gut long Jehova, na Tok bilong em, na ol wok ol i bin skul long mekim. Wanem samting bai helpim ol long mekim olsem?
Gutpela Tok Bilong Helpim Ol Long Mekim Wok Holi
Lon Schilling, em wanpela bilong Komiti Bilong Lukautim Ol Wok Long Betel, em i mekim wanpela tok, “Bai Yu Isi Long Ol Man?” Em i kamapim klia olsem pasin bilong isi long ol man em i gutpela samting, na em i save kamapim gutpela tingting olsem bilong God. (Jems 3:17) Pasin bilong isi long man i olsem yumi orait long bihainim sampela tingting bilong em, na mekim wankain pasin long olgeta man, na tingim gut man, na no ken les kwik long man. Brata Schilling i tok: “Ol manmeri i save isi long ol narapela ol i save tingting gut long ol samting ol i mekim long ol narapela. Ol i no save strong tumas.” Wanem samting inap helpim wanpela misineri long bihainim pasin bilong isi long ol man? Em i mas i gat pasin daun, na putim yau na harim gut tok bilong ol narapela na long dispela rot em bai kisim sampela save, na em i mas orait long tingim tok bilong ol narapela, tasol no ken lusim ol lo bilong God.—1 Korin 9:19-23.
“No Ken Lusim Tingting Long Kisim Kaikai!” em het-tok bilong namba tu tok bilong program. Samuel Herd, em tu i wanpela bilong Lain Bilong Bosim Ol Witnes, em i kamapim dispela tok. Em i kamapim klia olsem em i bikpela samting long kisim kaikai bilong spirit long olgeta taim bambai ol inap i stap strong long mekim wok holi. Brata Herd i tok: “Taim yu mekim wok bilong autim tok na skulim ol man long ples bai yu go mekim wok long en, i no longtaim na ol wok bilong spirit yu mekim bai i go bikpela. Olsem na yu mas kisim moa yet kaikai bilong spirit bambai yu gat strong inap long mekim dispela wok.” Pasin bilong kisim kaikai bilong spirit long olgeta taim bai helpim misineri long abrusim bel hevi bilong spirit na pasin bilong sori long ples na bel hevi. Dispela i save helpim em long i stap bel gut na strong long i stap long ples wok bilong em long mekim wok holi.—Filipai 4:13.
Wanpela tisa bilong Skul Gileat, em Lawrence Bowen, em i strongim ol sumatin long “Tingim Gen Samting Bilong Pastaim.” Wanem insait bilong tok bilong em? Em i tokim olgeta manmeri long opim Baibel long Sindaun 1:7, em i tok: “Sapos yu laik kisim gutpela save, orait pastaim yu mas aninit long Bikpela.” Brata bilong mekim tok em i tok olsem: “Ol tok na save i no kamapim bilip olsem Jehova i stap tru, ol dispela tok i no olsem save tru, na man i no inap kisim gutpela na stretpela tingting long en.” Brata Bowen i tok, ol tok bilong Baibel i kain olsem wanpela piksa ol i bin wokim na ol i brukim i go long ol liklik liklik hap. Orait taim man i wok long skruim gut olgeta wan wan hap bilong en, piksa i wok long kamap ples klia. Na olsem tasol, taim man i wok long kisim sampela save moa long Baibel, ol samting i kamap klia moa na em i pilim tru tok em i lainim. Dispela inap helpim em long mekim wok holi bilong God.
Wallace Liverance, em kuskus bilong Skul Gileat, em i mekim laspela tok bilong dispela hap bilong program. Em i toktok long “Givim Tok Tenkyu Olsem Ofa Bilong Yu Long God.” Em i stori long taim Jisas i bin oraitim 10-pela man i gat sik lepra. (Luk 17:11-19) Wanpela tasol i bin kam na litimapim nem bilong God na tok tenkyu long Jisas. Brata Liverance i tok, “Yumi save ol narapela i amamas nogut tru long kamap klin. Ol i amamas long ol yet, tasol i luk olsem ol i tingting tasol long pris i mas tokaut olsem ol i klin.” Man i kisim save long tok i tru na em i kamap klin long samting bilong spirit, dispela wantaim pasin bilong em long tok tenkyu i mas kirapim em long tok tenkyu long God long ol gutpela samting em i save mekim. Brata i tokim ol sumatin bilong klas namba 108 bilong Skul Gileat long tingim tingim ol samting God i mekim na gutpela pasin bilong em bambai olgeta wok na ol samting ol i mekim olsem ofa i ken kamapim tok tenkyu bilong ol long God.—Song 50:14, 23; 116:12, 17.
Ol Stori Bilong Sampela na Toktok Wantaim Ol Long Olsem Wanem Ol i Mekim
Mark Noumair, em tu i wanpela tisa bilong Skul Gileat, i lukautim narapela hap bilong program. Long dispela hap em i kamapim ol stori bilong ol samting i bin painim ol sumatin taim ol i autim tok long taim bilong skul. Taim ol sumatin i no kam yet long Skul Gileat ol i bin mekim wok autim tok long olgeta de inap planti yia, olsem averes bilong ol i inap olsem 12-pela yia. Taim ol i stap long skul ol i bin kirapim planti Baibel-stadi wantaim ol manmeri i stap bilong ol i narapela narapela kain, na dispela i kamapim klia olsem ol sumatin i save “kisim pasin bilong olgeta kain man.”—1 Korin 9:22.
Bihain long ol stori bilong ol sumatin, Charles Molohan na William Samuelson i toktok wantaim sampela long famili Betel na ol wasman bilong raun ol i bin skul long Skul Gileat. Wanpela brata ol i toktok wantaim em, em Robert Pevy, em i bin mekim wok long kantri Filipin bihain long taim em i winim skul long klas namba 51 bilong Skul Gileat. Em i kirapim klas long tingim dispela tok: “Taim hevi i kamap, olgeta i save tokaut long tingting bilong ol yet long rot bilong stretim dispela hevi. Long olgeta taim bai i gat wanpela man, save bilong em i winim save bilong yu na tingting bilong em i winim tingting bilong yu. Tasol sapos yu kisim tingting bilong God i stap long Baibel, bai i no gat narapela inap winim dispela tingting. Long olgeta taim Baibel i bekim stret ol askim.”
Bilong pinisim ol gutpela tok bilong program, John Barr, em i wanpela bilong Lain Bilong Bosim Ol Witnes, em i toktok long “Mekim Wok Holi Bilong Jehova Em i Ken Orait Long En.” Em i kamapim klia olsem wanem yumi ken mekim wok holi taim yumi autim tok bambai yumi ken helpim ol manmeri i gat gutpela bel long lotuim God long pasin i stret. Em i opim Baibel long tok bilong Jisas long Matyu 4:10 pastaim, na bihain em i tok: “Bilong lotu long Jehova wanpela tasol, yumi mas givim baksait long ol samting i laik pulim yumi na bai ol i kamap olsem god bilong yumi—olsem mangal, laikim tumas mani kago, na litimapim nem bilong yumi yet. Mipela i amamas long tingim ol misineri bilong yumi, kirap long 1943 na i kam inap long nau ol i bin givim baksait long ol dispela samting! Na mipela save yupela sumatin bilong klas namba 108 bilong Skul Gileat bai bihainim gutpela pasin bilong ol. Yupela bai mekim wok holi bilong Jehova, long wanem, i stret long mekim wok holi bilong Jehova wanpela tasol.”
Em i gutpela tok bilong pinisim wanpela bung i strongim ol manmeri i harim. Orait nau em i taim bilong harim gude bilong ol manmeri bilong ol narapela kantri em ol i laik tok amamas long ol sumatin, na ol sumatin i kisim setifiket, na ol i ritim wanpela pas em klas i raitim bilong tok tenkyu long gutpela skul ol i bin kisim. Ol i strongim klas long mekim pasin bilong stap gut long wok bilong ol na long mekim wok bilong Jehova. Olgeta manmeri i bung, em sampela i bilong 25 narapela narapela kantri, ol i singsing na beten wantaim bilong pinisim bung.
[Futnot]
a Bung i kamap long Wastaua Edukesen Senta long Patesen, Nu Yok, long Mas 11, 2000.
[Blok long pes 23]
OL SAMTING BILONG OL SUMATIN
Hamas kantri ol i kam long en: 10
Hamas kantri ol bai go long en: 17
Hamas sumatin: 46
Krismas bilong ol, averes: 34
Hamas yia long tok i tru, averes: 16
Hamas yia long wok painia, averes: 12
[Piksa long pes 24]
Klas Namba 108 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.