Yumi Ol Manmeri Bilong Bilip

Autim Tok Bilong Kingdom Long Altiplano Long Peru

NAMEL long ol kil bilong ol maunten Andis long hap is na long hap wes​​—⁠em long boda bilong Bolivia na Peru​​—⁠i gat wanpela bikpela hap graun i stap antap tru em ol i kolim Altiplano. Insait bilong dispela nem i olsem “ples antap.” Bikpela hap bilong Altiplano i stap long Bolivia.

Braitpela bilong Altiplano em 100 kilomita na longpela bilong en i winim 1,000 kilomita, na em i stap antap tru long mak bilong solwara inap olsem 3,700 mita. Sapos yu stap insait long wanpela balus na yu lusim Lima, em nambawan biktaun bilong Peru i stap long nambis na yu go long hap bilong Altiplano, bai yu abrusim maunten El Misti, em wanpela volkeno em ais i save karamapim olgeta na i go antap tru insait long ol klaut inap olsem 5,822 mita. Longwe liklik yu inap lukim het bilong tupela bikpela maunten em ais i karamapim, em Nevado Ampato na Nevado Koropuna, em ol i winim 6,000 mita i go antap. Nau, wantu yu inap lukim wanpela bikpela hap graun i stretpela na i antap tru​​—⁠em Altiplano bilong hap saut bilong Peru.

Nambawan biktaun bilong Altiplano bilong Peru em Puno, em i stap long hap not-wes bilong raunwara Titikaka​—⁠i no gat narapela raunwara em mak bilong en i antap olsem na ol sip i save raun long en. Dispela hap i stap antap tru, winim 3-pela kilomita long mak bilong solwara, olsem na skin bilong ol man i no save lain kwik long liklik win bilong dispela hap. Ol Kesua na Aimara Indian ol i sindaun arere long raunwara Titikaka. Ol i pasim ol retpela, o grinpela, o blupela klos na yu inap lukim ol i wok long ol liklik fam (chacras) bilong ol. Maski tok Spen em i bikpela tok ples bilong Peru, long Altiplano ol i save mekim tu tok Kesua na Aimara.

Go Pas Long Wok Autim Tok

I no longtaim i go pinis na planti bilong ol manmeri i save mekim tok Kesua na Aimara, na ol i gat pasin daun na ol i save wok strong, ol i wok long kisim stretpela save long tok i tru bilong Baibel. Bikpela as bilong dispela gutpela samting i kamap em long wanem Jehova i mekim gut long wok bilong ol painia salim, em ol manmeri i save givim bel long autim tok long olgeta de.

Olsem: Ol i makim tupela painia salim em José na Silvia bilong go long Putina, em wanpela taun i stap 50 kilomita longwe long raunwara Titikaka. Insait long tupela mun tasol, Silvia i lukautim 16 Baibel-stadi, na José i lukautim 14 Baibel-stadi. Insait long 6-pela mun tasol, namba bilong ol pablisa long kongrigesen i go antap tru, pastaim i gat 23 pablisa na bihain i gat 41. Na namba bilong ol manmeri i kam long ol miting em tu i go antap, pastaim i gat 48 na bihain 132.

José i tok: “Bilong kirapim ol miting bilong kongrigesen long ol dispela longwe hap, em i gutpela long kirap mekim Miting Bilong Pablik-Tok na Buk-Stadi. Dispela i save helpim ol nupela man long kam long ol miting.”

Tupela susa bilong skin​​—⁠wanpela em painia​​—⁠ol i bin bringim gutnius i go long Munani, em wanpela hap i stap longwe long Putina inap olsem 20 kilomita. Long dispela hap tupela i kirapim wanpela Baibel-stadi wantaim wanpela man aipas, nem bilong em Lusio.a Em i singautim brata bilong em Migel, em i wanpela man bilong mekim wok misin bilong lotu Katolik na hetman bilong wanpela ples i stap klostu. Taim wanpela pren i askim Migel long as na em i save go long Munani long olgeta wik, em i tok em bilong kisim save long Jehova na long Baibel. Nau dispela askim i kamap: “I gat wanem as na yumi no stadi long Baibel long hia?” Ol manmeri long hap bilong Migel ol i amamas tru long harim tok bilong Baibel, olsem na i no longtaim na ol Witnes i stretim rot long mekim ol miting long dispela hap.

Orait nau, Migel i kirap long tokim ol narapela long ol samting em i wok long lainim. Tasol olsem wanem long wok misin bilong lotu Katolik na dispela wok hetman em i holim? Long wanpela miting long bikpela haus bung em i tokaut olsem em i laik pinis long wok misin bilong lotu Katolik. Ating bai ol i makim narapela man bilong senisim em, o olsem wanem? Wanpela man i stap long bung em i tok: “Long nau yumi wok long kisim save long tok i tru, olsem na bilong wanem yumi mas i gat narapela man bilong mekim wok misin?” Yumi save dispela man i tok long ol samting em ol Witnes Bilong Jehova i wok long skulim ol long en. Na narapela man i tok: “Mipela i no wanbel long yu wanpela tasol i lusim wok misin. Ating gutpela yumi olgeta i lusim, a?” Nau olgeta manmeri ol i bungim maus wantaim na singaut: “Yumi olgeta i lusim!”

Bihain liklik, long wanpela miting bilong ol, ol i stori long ol imis na kruse. Wanpela man i askim olgeta manmeri i stap long dispela miting long kaunim Lo 7:​25, i tok: “Yupela i mas kukim olgeta giaman god bilong ol. Na yupela i no ken aigris long ol gol na silva ol i save putim bilong bilasim ol giaman god bilong ol. Yupela i no ken kisim ol dispela samting, long wanem, Bikpela i no laikim tru ol giaman god. Nogut yupela i kisim na yupela i dai.”

Orait nau dispela man i askim olgeta manmeri em ol i wanbel long kukim olgeta imis long putim han bilong ol i go antap. Wantu olgeta han i go antap. (Aposel 19:​19, 20) Long dispela ples i gat 25 famili olgeta i stap na 23 famili ol i stadi long Tok Bilong God. Tupela ol i mekim wok olsem pablisa i no baptais yet, na 10-pela marit ol i tingting long stretim gut marit bilong ol bambai wokabaut bilong ol i ken stap klin long ai bilong Jehova.​​—⁠Taitus 3:1; Hibru 13:⁠4.

Skulim Ol Man Long Rot Bilong Ol Kaset Samting

Planti manmeri long hap bilong Altiplano ol i no save long rit na rait, olsem na ol video na kaset samting bilong Sosaiti Was Taua long tok ples bilong ol yet i save helpim ol tru​—⁠na i helpim ol tu long mekim ol Baibel-stadi. Long rot bilong wanpela kaset, wanpela painia salim, nem bilong em Dora, em i save mekim ol stadi long liklik buk God i Laik Yumi Mas Mekim Wanem? Em i save larim sumatin bilong Baibel i harim ol wan wan paragraf long kaset, na bihain em i givim askim long em long ol samting em i harim.

Wanpela redio-stesin long dispela hap i save kamapim sampela tok bilong liklik buk Yumi Mas Mekim Wanem? long tok ples Kesua. Na ol i save kamapim tu sampela tok bilong nius Kirap! long tok Spen. Dispela i mekim na planti manmeri moa ol i luksave long tok bilong Kingdom na ol i laik kisim sampela save moa taim ol Witnes Bilong Jehova i kam long haus bilong ol.

Maski ol man i no tingim tumas hap bilong Altiplano, God yet em i save tingim. Yes, pasin sori bilong Jehova long ol man i opim rot na planti manmeri i stap long Altiplano bilong ol maunten Andis ol i wok long kamap wanlain bilong ol dispela manmeri i save givim biknem long haus lotu tru bilong Jehova.​​—⁠Hagai 2:⁠7.

[Futnot]