Kusko—Nambawan Biktaun Bilong Ol Inka Long Bipo

Wanpela man long Peru i raitim dispela stori bilong Kirap!

MIPELA sotwin stret taim balus i baut na i sut i go daun long wanpela ples daun i op liklik. Klostu nau mipela bai pundaun long Kusko, long Peru, em wanpela biktaun i gat biknem long bipo. Maski dispela biktaun i stap antap olsem 3,400 mita, long arere bilong dispela ples i gat sampela maunten i go antap moa, olsem na taim balus i wok long kam klostu long rot bilong en bilong pundaun, mipela i ting balus inap kisim bagarap. Tasol balus i pundaun gut. Nau mipela bai amamas long raun lukim dispela biktaun i gat nem na 275,000 manmeri i sindaun long en, na long bipo em i nambawan biktaun bilong wanpela bikpela lain man, em ol Inka.

Inap long nau ol man inap lukim sampela samting long Kusko i makim pasin na sindaun bilong ol Inka long bipo. Planti man i sindaun long dispela biktaun ol i save toktok yet long tok ples Kesua. Long olgeta hap bilong ol maunten Andis inap 8 milion manmeri ol i save toktok yet long dispela tok ples bilong bipo bipo. I no longtaim i go pinis na ol lain Kesua i bin kirapim gavman long senisim nem Kusko na kolim biktaun long nem Kosko, long wanem, Kosko i moa stret long pasin bilong kolim nem tru bilong dispela biktaun long tok ples Kesua.

Biktaun Bilong Bipo

Ol man bilong raitim stori bilong ol samting i bin kamap bipo ol i tok, dispela biktaun i kirap 1,500 yia paslain long taim mama i karim Krais. Em klostu long taim Moses i kisim bek ol Israel long Isip. Na inap 600 yia samting i go pinis, namba 9 king bilong ol Inka, em Pasakuti, em i kisim sampela strongpela graun na wokim piksa bilong biktaun Kusko em i laik wokim nupela. Pasakuti i kirap mekim wok king 89 yia paslain long ol Spen i kamkamap long yia 1527 samting na daunim dispela lain. Pasakuti i bosim wok na dispela biktaun i kamap olsem nambawan biktaun i gat planti tausen haus i lain gut, na i as bilong Kusko long nau.

Sampela asples i tok, bipo ples bung i stap namel tru long biktaun na kirap long dispela hap ol i brukim biktaun i go long 4-pela hap. Long tok ples Kesua ol i bin kolim ples bung olsem huacaypata, em ples bilong wokim ol amamas, na malolo, na dring. Sampela saveman bilong tok ples Kesua, ol i tok insait bilong tok “Kusko” o “Kosko” i olsem “As Bilong Graun.” Olsem na namel tru bilong ples bung bilong Kusko ol i bin kolim chawpi, em olsem “as tru bilong Bikpela Lain Inka.”

King bilong lain Inka i bin sindaun long Kusko bilong bosim lain bilong em long sampela hap bilong ol kantri nau ol i kolim Ajentina, Bolivia, Sili, Kalombia, Ekwado, na Peru​—⁠em planti hap bilong dispela ol graun i gat bikpela gris na i kamapim planti kaikai. Ol man i bin wokim ol gutpela gaden antap, namel, na daunbilo long ol maunten, em ol i katim na wokim olsem lata lata. Long ol dispela gutpela gaden ol i kamapim na lukautim sampela kaikai yumi save kaikai long nau, olsem poteto na bin lima.

Long dispela taim bipo, ating ol man i hatwok long raun long ol hap ol Inka i bosim sapos ol Inka i no bin wokim ol gutpela rot i go nabaut nabaut long olgeta hap. Taim mipela lukim naispela ples Kusko, mipela i no hatwok long tingting bek long ol Inka bilong bipo na pasin bilong ol long wokabaut wantaim ol animal lama bilong ol, em ol animal bilong karim ol hevipela samting long hap bilong ol maunten Andis. Ol i bin karim planti gutpela samting olsem ol gutpela gutpela ston, bras, silva, na gol.

Ol Inka i gat planti gol, tasol ol i no bin mekim wok long en olsem mani. Gol i save lait tru, olsem na ol Inka i ting gol i samting bilong god bilong ol, em san. Ol i bilasim planti haus lotu na haus king bilong ol long gol. Na ol i bin wokim wanpela gaden i gat ol animal na purpur giaman long en, em ol samting ol i bin sapim long gol. Tingim Kusko long bipo: Ol i bilasim ol haus long gol na i lait tru taim san i holim. Man! Ating em i wanpela gutpela samting tru bilong lukim, a? Gol i pulap tru, olsem na ol Spen i mangalim dispela gol ol i kam daunim dispela lain long yia 1533 na kisim olgeta gol bilong ol.

Ol Narapela Kain Haus Bilong Kusko

Ol Inka i bin wokim ol naispela haus ston i narapela kain, na long Kusko bilong nau dispela kain stail i stap yet. Planti haus bilong nau, ol i bin wokim antap long ol banis ston i bin stap planti handet handet yia. Ol i bin katim sampela ston bilong sindaun gut long sampela hap stret bilong banis. Wanpela banis em planti turis i save go lukim i gat wanpela kain ston olsem, na ol Inka i bin katim dispela ston na bai i gat 12-pela arere bilong en. Arere bilong ol dispela kain ston i mekim na ston i stret long wanpela hap bilong banis tasol​—⁠olsem ki i stret long wanpela lok tasol.

Ol Inka i gat save long katim ston, ol i saveman tru bilong wokim haus. Ol i no gat masin samting olsem ol man bilong nau i save mekim wok long en, tasol ol inap katim stret ol ston na taim ol ston i sindaun long hap bilong en, sap bilong wanpela naip i no inap slip namel long narapela narapela ston! Sampela bilong ol dispela ston i hevi nogut tru​—⁠hevi bilong wan wan i olsem planti ton. Inap long nau yumi no save olsem wanem ol dispela man bilong bipo ol i gat save bilong mekim ol dispela bikpela wok.

Lotu Long Kusko

Planti bilong lain Kesua ol i bihainim lotu Katolik na ol man i no tingim ol moa olsem ol lain bilong lotuim san. Tasol ol i save bihainim yet ol bilip haiden, em ol bilip i bin kamap paslain long lotu bilong ol Inka long lotuim san. Ol i wokim yet bung bilong makim taim ol i bungim pinis ol kaikai bilong gaden, na ol i givim ofa long wanpela samting ol i kolim Pacha-Mama. Dispela nem i kam long wanpela tok Kesua na insait bilong en i olsem “mama bilong graun.”

Ol Witnes Bilong Jehova long Peru i wok long skulim ol man long tok bilong Baibel na wok bilong ol i kamap gutpela. Inap longtaim liklik, Sosaiti Wastaua i bin wokim ol buk na nius bilong Baibel long tok ples Kesua inap long ol man i save long dispela tok ples, ol i ken kisim save long tok bilong Kingdom long tok ples bilong ol yet. Long 6-pela hap ol Witnes i wokim ol miting Kristen long dispela tok ples.

Long nau ol man i no ting Kusko i as bilong graun, tasol planti turis i save go lukim dispela narapela kain biktaun. Ating wanpela taim yu tu bai kam na lukim dispela gutpela ples Peru, a?

[Ol Piksa long pes 12, 13]

1. Kusko na ples bung bilong en

2. Ol Inka i bin katim stret ol ston na sap bilong wanpela naip i no inap slip namel long narapela narapela ston

3. Klos tru bilong ol Peru

4. Ol lama i animal bilong karim ol hevipela samting long hap bilong ol maunten Andis