Stretim Ol Samting Nogut Pait i Kamapim

INAP 20 yia Abraham i bin i stap insait long wanpela ami ol i save hait na mekim pait.a Tasol em i no save pait moa na em i no inap insait gen long ol pait. Na tu, sampela man bipo ol i bin stap olsem birua bilong em, nau ol i stap olsem gutpela pren tru bilong em. Wanem samting i kirapim em long senisim pasin bilong em? Tok bilong Baibel i mekim. Baibel i givim em gutpela samting bilong wetim i kamap bihain na pasin bilong tingting gut, na dispela i helpim em long bihainim tingting bilong God long ol samting ol man i save mekim. Tok bilong Baibel i pinisim laik bilong em long pait, na em i kirap lusim bel hevi na pasin bilong bel nogut long narapela. Em i kisim save olsem Baibel i gat ol gutpela tok i olsem marasin bilong mekim gut bel bilong man.

Olsem wanem Baibel i helpim man bel bilong em i bagarap stret? Baibel i no inap senisim ol samting i kamap pinis long Abraham. Tasol taim em i ritim na tingim gut long bel ol tok bilong God dispela i mekim na tingting bilong em i stret wantaim tingting bilong God. Nau em i gat gutpela samting bilong wetim i kamap bihain, na em i kisim nupela tingting long wanem ol samting i bikpela samting. Ol samting i bikpela samting long tingting bilong God, nau ol i bikpela samting long tingting bilong Abraham. Taim dispela samting i stat long kamap, bel bilong em i kirap long kamap orait. Long dispela rot Abraham i kisim helpim long senisim pasin bilong em.

Bikpela Pait Insait Long Kantri Yet

Mama i karim Abraham long Afrika long 1930 samting. Bihain long Namba Tu Pait wanpela strongpela kantri i stap klostu i bosim kantri bilong em, tasol planti wanlain bilong Abraham i laikim independens. Long 1961 Abraham i go insait long wanpela lain i laik winim independens na ol i hait na mekim pait long dispela strongpela kantri klostu long ol.

Abraham i tok: “Ol i birua bilong mipela. Ol i laik kilim mipela i dai, olsem na mipela i laik painim rot bilong kilim ol i dai.”

Planti taim em inap painim bagarap, olsem na long 1982, taim em i insait long pait 20 yia pinis, em i ranawe i go long Yurop. Long dispela taim em i gat klostu 50 krismas na em i no gat planti samting bilong mekim, olsem na em i kirap skelim ol samting em i bin mekim long i stap bilong em. Wanem samting i bin kamap long ol samting em i laik mekim? Wanem samting bai kamap long bihain? Long dispela taim Abraham i bungim sampela Witnes Bilong Jehova na em i kirap i go long ol miting bilong ol. Em i tingim bek sampela yia i go pinis, taim em i stap long Afrika na em i bin ritim wanpela liklik nius wanpela Witnes i bin givim long em. Dispela liklik nius i bin stori long wanpela paradais bai kamap long graun na wanpela gavman bilong heven bai bosim ol man. Olsem wanem? Tru tru kain samting olsem bai kamap?

Abraham i tok: “Long Baibel, mi kisim save olsem ol dispela yia mi bin wok long pait i lus nating. I gat wanpela gavman tasol bai mekim stretpela pasin long olgeta lain, em Kingdom Bilong God.”

Bihain liklik long taim Abraham i kisim baptais pinis na kamap wanpela Witnes Bilong Jehova, wanpela man, nem bilong em Robert, em i ranawe lusim Afrika na em i kam sindaun long dispela taun long Yurop em Abraham i sindaun long en. Robert na Abraham ol i bin insait long dispela wanpela pait, tasol tupela i stap insait long ol lain i birua birua. Planti taim Robert i tingting long as tru bilong i stap bilong em. Em i man bilong lotu, na em i bin ritim sampela hap bilong Baibel na em i save nem bilong God em Jehova. Ol Witnes long kongrigesen bilong Abraham i tok ol i laik helpim em long kisim sampela save moa long Baibel, na kwiktaim em i tok orait.

Robert i tok: “Taim mi kirap bung wantaim ol Witnes, mi amamas long pasin bilong ol long kamapim nem bilong Jehova na Jisas, na dispela i save kamapim long ples klia olsem tupela i narapela narapela. Dispela samting i stret wantaim save mi kisim pinis long Baibel. Na tu, ol Witnes i save bilas gut na ol i mekim gut long ol man, maski ol i bilong wanem kantri. Ol kain samting olsem mi bin pilim tru.”

Ol Birua i Kamap Pren

Pastaim Robert na Abraham ol i stap olsem birua birua, tasol nau ol i kamap olsem pren tru. Ol i stap wantaim long wanpela kongrigesen bilong ol Witnes Bilong Jehova na mekim wok autim tok long olgeta de. Abraham i tok: “Long taim bilong pait, planti taim mi tingting long olsem wanem ol man bilong ol kantri i stap klostu klostu, planti bilong ol i gat wankain lotu, tasol ol i bel nogut long narapela.” Em i tok moa olsem, “Pastaim mi na Robert i lotu long wankain misin, tasol narapela i go pait long narapela. Nau mitupela i Witnes Bilong Jehova, na bilip bilong mipela i mekim na mipela i stap wanbel wantaim.”

Robert i tok: “Dispela i mekim na mipela i stap narapela kain. Nau mipela i stap insait long wanpela lotu i gat pasin bilong i stap brata brata tru. Mipela i no inap go insait long pait gen.” Baibel i bin helpim gut bel na tingting bilong dispela tupela man bipo ol i stap birua birua. Isi isi ol i lusim pasin birua na bel nogut na kisim pasin bilong bilip long narapela na pasin pren.

Long wankain taim olsem Abraham na Robert i insait long pait, i gat tupela narapela yangpela man ol tu i insait long wanpela pait namel long tupela kantri, narapela i stap klostu long narapela. I no longtaim na Baibel i mekim wok olsem wanpela strongpela marasin bilong oraitim bel na tingting bilong tupela. Em bai mekim olsem wanem?

Kilim Ol i Dai na Bihain Dai Long Han Bilong Ol Birua

Gabriel i go bikpela insait long wanpela famili i save lotu, na ol i lainim em olsem kantri bilong ol i stap insait long wanpela pait i holi. Olsem na taim em i gat 19 krismas em i volantia long go insait long ami na em i askim ol long putim em long lain i go paslain long pait. Inap 13 mun em i stap long hap ol i pait strong tru, na sampela taim ol i stap klostu tru long ol birua, olsem wan na hap kilomita. Em i tok: “Mi tingim wanpela taim kepten bilong mipela i tokim mipela olsem ol birua bai kam long dispela nait stret. Bel bilong mipela i no stap isi, na i skrap long pait, olsem na long nait olgeta mipela wok long sutim ol roket-bom i go long ol birua.” Gabriel i ting ol man bilong dispela kantri em ol birua na i stret ol i mas dai. Em i tok: “Mi ting olsem mi mas kilim i dai planti man moa. Na mi gat wankain tingting olsem planti pren bilong mi, olsem mi mas pait i go inap ol birua i kilim mi i dai.”

Tasol bihain Gabriel i kisim tingting olsem ol samting em i mekim i no gat as bilong en. Olsem na em i ranawe i go long ples maunten, na i go insait long wanpela kantri i no insait long dispela pait, na bihain em i kamkamap long Yurop. Em i wok long askim God, bilong wanem i stap bilong em i gat hatwok tru long en? Na ol dispela hevi i painim em, em i strafe bilong God o nogat? Nau em i bungim ol Witnes Bilong Jehova, na ol i soim em long tok bilong Baibel olsem i gat wanem as na i stap bilong yumi long nau i gat planti hevi tru.​—⁠Matyu 24:​3-14; 2 Timoti 3:​1-5.

Taim Gabriel i wok long kisim planti save long Baibel, dispela i mekim na em i bilip moa yet olsem tok i tru i stap long Baibel. Em i tok: “Mi kisim save olsem yumi inap i stap oltaim long paradais long graun. Em samting mi gat laik long mekim taim mi liklik pikinini.” Tok bilong Baibel i mekim gut bel bilong Gabriel na bel bilong em i stap isi. Pastaim bel na tingting bilong em i bagarap olgeta, tasol nau em i wok long kamap orait. Olsem na bihain, taim Gabriel i bungim Daniel, em wanpela birua bilong en pastaim, pasin bilong bel nogut i no stap moa long bel bilong Gabriel. Tasol wanem samting i kirapim Daniel long kam long Yurop?

“Sapos Yu Stap Tru, Plis Helpim Mi!”

Daniel i kamap bikpela insait long lotu Katolik, na taim em i gat 18 krismas gavman i singautim em long insait long ami. Ol i salim em i go pait insait long dispela pait em Gabriel i pait long en, tasol tupela i birua birua. Long pait Daniel i stap insait long wanpela tenk (strongpela ka i gat bikpela gan) na wanpela bom i paitim stret dispela tenk. Ol poroman bilong em ol i dai, na em i kisim bikpela bagarap na ol birua i kalabusim em. Em i stap sampela mun long haus sik na long wanpela kem na bihain ol i salim em i go long wanpela kantri i no insait long dispela pait. Nau em i stap wanpis na rabis olgeta na em i tingting long kilim i dai em yet. Long dispela taim Daniel i beten long God olsem: “Sapos yu stap tru, plis helpim mi!” Long de bihain ol Witnes Bilong Jehova i bungim em na ol i bekim planti askim bilong em. Orait bihain em i go long Yurop olsem wanpela refyuji. Daniel i bung wantaim ol Witnes gen na stadi long Baibel. Ol save em i kisim i mekim na em i wok long lusim pasin bilong tingting planti na bel nogut long ol samting i bin painim em.

Nau Gabriel na Daniel ol i stap pren tru, ol i kamap Witnes Bilong Jehova i baptais pinis na ol i stap wanbel long wanpela lain brata bilong spirit. Gabriel i tok: “Mi laikim tumas Jehova na mi bin kisim save long Baibel na dispela i helpim mi long kisim wankain tingting olsem Jehova. Daniel i no wanpela birua bilong mi moa. Sampela yia i go pinis mi inap amamas long kilim em i dai. Tasol Baibel i bin givim skul long mi i narapela kain olgeta​—⁠mi mas i gat laik long i dai bilong helpim Daniel.”

Daniel i tok: “Mi bin lukim ol man i kilim i dai ol man bilong ol narapela lotu na kantri. Na mi lukim ol man i kilim i dai ol wanlotu bilong ol bilong narapela kantri. Taim mi lukim dispela samting, mi pilim olsem em i asua bilong God. Nau mi save Satan em i as bilong ol dispela pait. Mi na Gabriel i stap olsem tupela wanbilip. Mitupela i no inap pait gen!”

“Tok Bilong God Em i Gat Laip, na Em i Wok Strong i Stap”

Bilong wanem Abraham, Robert, Gabriel, na Daniel ol i senisim pasin bilong ol olsem? Olsem wanem ol i bin rausim pasin bilong bel nogut na bel hevi long bel na tingting bilong ol?

Olgeta wan wan ol i bin ritim, na tingim gut long bel, na lainim tok i tru i stap long Baibel, em dispela tok “i gat laip, na em i wok strong i stap.” (Hibru 4:12) Man bilong kamapim ol tok bilong Baibel em i Man bilong wokim yumi, na em i save long kirapim bel bilong man i gat laik long putim yau na lain long tok bilong em. “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” Taim man bilong ritim Baibel i larim Baibel i stiaim em, dispela i mekim na em i kisim ol nupela pasin na lo bilong stiaim wokabaut bilong em. Em i kirap lain long tingting bilong Jehova long ol samting. Dispela i save helpim em long planti samting na i oraitim bel na tingting em pasin bilong pait i bin bagarapim.​—⁠2 Timoti 3:⁠16.

Baibel i tok i no gat wanpela kantri, o kala bilong skin, o lain i winim ol narapela. “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Man i save ritim na bilipim dispela tok, isi isi em bai daunim pasin bilong bel nogut long ol man bilong narapela skin o kantri.​—⁠Aposel 10:​34, 35.

Ol tok profet bilong Baibel i kamapim olsem klostu nau God bai senisim wok bos bilong ol man na Kingdom bilong Mesaia bai kamap senis bilong en. Long rot bilong dispela gavman God bai “mekim i dai pait long olgeta hap graun.” Ol lain i save kamapim ol pait na kirapim ol man long pait, ol bai pinis. Ol man i kisim bagarap long ol pait, ol bai kirap bek na ol inap kisim laip long paradais long graun. Long dispela taim bai i no gat wanpela i mas ranawe long ol lain i laik birua o mekim nogut long ol.​—⁠Song 46:9; Daniel 2:44; Aposel 24:⁠15.

Ol man i stap long dispela taim, Baibel stori long ol olsem: “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol . . . Wok ol i mekim bai i no inap lus nating. Na ol pikinini bilong ol bai i no inap painim bagarap.” Bai i no gat wanpela hevi o bagarap em Kingdom i no inap stretim. Taim man i bilip na wetim gutpela samting olsem i kamap, isi isi dispela bai tekewe bel hevi na pen i stap long bel na tingting bilong em.​—⁠Aisaia 65:​21-23.

Tok bilong Baibel i olsem strongpela marasin bilong oraitim bel na tingting bilong man. Long nau tu ol tok bilong Baibel i wok long oraitim ol man, em ol pait i bin bagarapim bel na tingting bilong ol. Ol man bipo ol i stap birua birua nau ol i stap wanbel insait long wanpela bikpela lain brata i stap long olgeta hap. Long nupela taim God bai kamapim, dispela wok long oraitim bel na tingting bai wok i go inap long taim i no gat pasin bilong birua na bel nogut na bel hevi i stap long bel na tingting bilong olgeta man. Man bilong wokim yumi i tok promis olsem “ol man bai i no inap tingim moa ol samting i bin kamap bipo.”​—⁠Aisaia 65:⁠17.

[Futnot]

[Rait long pes 4]

“Long Baibel, mi kisim save olsem ol dispela yia mi bin wok long pait i lus nating”

[Rait long pes 5]

Baibel i gat bikpela strong long daunim bel na tingting nogut bilong ol man bipo ol i stap birua birua

[Rait long pes 6]

Isi isi man i lusim pasin birua na bel nogut na kisim pasin bilong bilip long narapela na pasin pren

[Rait long pes 6]

Taim man bilong ritim Baibel i larim Baibel i stiaim em, dispela i mekim na em i kisim ol nupela pasin na lo bilong stiaim wokabaut bilong em

[Piksa long pes 7]

Ol man bipo ol i stap birua birua, nau ol i wanbel insait long wanpela bikpela lain brata i stap long olgeta hap

[Piksa Kredit Lain long pes 4]

Refugee camp: UN PHOTO 186811/J. Isaac