Sanap Strong na Bilip Tru

“Wanpela Wok Em i Nambawan Tru”

KIRAP long taim ol Witnes Bilong Jehova long nau ol i bin kirap nupela long mekim wok bilong ol, ol i bin tingting tru long wanpela tok profet bilong Jisas Krais i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Taim yia 1914​—⁠em kirap bilong “taim bilong las de”​—⁠i kam klostu, ol Sumatin Bilong Baibel i bilip tru na kirapim wanpela wok bilong skulim planti manmeri bilong olgeta hap long ol tok bilong Baibel.​—⁠2 Timoti 3:⁠1.

Bilong mekim dispela wok bilong autim gutnius long olgeta hap, ol dispela wokman bilong Jehova i kamapim wanpela pasin i nupela, na i narapela kain, na em inap mekim ol man i tingim tru gutnius. Bilong kisim sampela save moa long dispela samting, yumi ken stori long ol samting i bin kamap long bipo.

Nupela Rot Long Autim Gutnius

Em Janueri bilong yia 1914. Yu ken tingting olsem yu sindaun namel long 5,000 manmeri long wanpela bikpela haus bung long Nu Yok Siti na ol i pasim ol lait. I gat wanpela traipela laplap samting bilong sutim piksa wokabaut long en. Wanpela man i kamap long piksa, em i gat waitpela gras na i pasim longpela saket. Ating yu bin lukim ol piksa wokabaut bilong bipo i no gat toktok, tasol taim dispela man i toktok yu inap harim tok bilong em. Dispela em i namba wan taim ol i soim wanpela nupela kain piksa wokabaut, na stori bilong en i narapela kain. Dispela man i toktok, em Charles Taze Russell, em i namba wan presiden bilong Sosaiti Was Taua, na piksa wokabaut yu lukim em piksa “Photo-Drama of Creation.”

C. T. Russell i bin luksave long bikpela wok ol piksa wokabaut inap mekim bilong helpim wok bilong autim tok long planti manmeri. Olsem na long 1912 em i kirapim wok bilong kamapim piksa “Photo-Drama of Creation.” Bihain dispela piksa i kamap longpela olsem 8-pela aua na ol i bungim ol piksa slait wantaim piksa wokabaut long en, na ol piksa i gat kala kala na yu inap harim toktok na musik.

Ol i brukim piksa i go long 4-pela hap bilong soim long 4-pela narapela narapela taim, na stori bilong “Photo-Drama” i kirap long taim God i wokim ol samting na i stori long ol samting i painim ol man long bipo na i kam inap long taim Jehova bai kamapim samting em i tokaut pinis long mekim long dispela graun na ol man long pinis bilong Taim Bilong Wan Tausen Yia Bilong Krais i Stap King. Sampela yia bihain ol kampani i kirap yusim dispela nupela save bilong wokim ol piksa wokabaut na kisim mani long en. Tasol sampela milion manmeri i bin lukim piksa “Photo-Drama of Creation” na ol i no gat wok long baim get!

Ol i redim ol musik i gutpela tru na 96 plet singsing i gat ol tok long en bilong piksa “Photo-Drama.” Na ol i wokim ol piksa slait bilong ol naispela piksa bilong ol samting i bin kamap long bipo. Na tu ol i mas wokim sampela handet moa nupela piksa. Sampela bilong ol dispela piksa slait ol i penim long han. Na ol i mekim mekim dispela wok, long wanem, ol i kamapim 20 narapela narapela piksa “Photo-Drama” na olgeta i gat 4-pela hap bilong en. Long dispela rot ol inap soim wanpela hap bilong piksa “Photo-Drama” long 80 taun long wanpela de!

Ol Wok Ol i Mekim

Taim ol man i lukim piksa “Photo-Drama,” ol brata i soim dispela piksa ol i mas mekim wanem wok? Wanpela Sumatin Bilong Baibel, Alice Hoffman, i tok: “Long kirap bilong piksa ‘Photo-Drama,’ piksa bilong Brata Russell i kamap. Taim maus bilong em i kirap long toktok ol i mas kirapim wanpela pikap . . . na mipela inap harim nek bilong em.”

Zola Hoffman i stori long dispela piksa olsem: “Mi kirap nogut tru long lukim piksa wokabaut i stori long taim God i wokim olgeta samting. Na mipela i lukim ol plaua i op isi isi.”

Karl F. Klein bilong Gavening Bodi Bilong Ol Witnes Bilong Jehova, em i laikim tru musik, na em i tok: “Long wankain taim yu lukim ol dispela piksa bai yu harim ol musik bilong ol hapman bilong mekim musik na i gutpela tru.”

I gat sampela narapela samting i kamap na ol man i no inap lusim tingting long en. Clayton J. Woodworth, Jr. i tok: “Sampela taim ol i paulim samting na dispela bai kirapim ol man long lap. Olsem: Wanpela taim ol i pilaim wanpela singsing nem bilong en ‘Ranawe i Go Long Maunten Olsem Wanpela Pisin,’ tasol piksa i kamap em i piksa bilong wanpela traipela dainaso”!

I gat dispela piksa “Photo-Drama of Creation” na tu, ol i kamapim piksa “Eureka Drama.” (Lukim blok.) I gat tupela kain: Wanpela i gat ol plet singsing bilong ol tok na musik. Narapela i gat ol plet singsing bilong ol tok na musik wantaim ol piksa slait. Dispela “Eureka Drama” i no gat piksa wokabaut, tasol ol man i stap long ol liklik ples ol i amamas long lukim.

Wanpela Strongpela Tul Bilong Autim Tok

Taim yia 1914 i laik pinis, winim 9,000,000 manmeri long Not Amerika, Yurop na Ostrelia ol i lukim pinis piksa “Photo-Drama of Creation.” Maski ol Sumatin Bilong Baibel i no planti, ol i no pret long mekim wok long dispela nupela rot bilong autim gutnius. Ol i amamas long givim mani bilong ol long baim ol gutpela haus bilong soim dispela piksa long ol man. Olsem na piksa “Photo-Drama of Creation” i bin mekim bikpela wok long helpim ol man long kisim save long Tok Bilong God na ol samting em bai mekim.

Wanpela man i raitim pas i go long C. T. Russell na i tok: “Namba wan taim mi lukim piksa Drama bilong yu em i senisim tru tingting bilong mi long ol samting bilong sindaun bilong mi; o bai mi tok olsem, em i senisim tru save mi holim long tok bilong Baibel.” Wanpela meri i tok: “Klostu bilip bilong mi i bagarap, tasol mi pilim olsem piksa ‘Photo-Drama of Creation’ i bin helpim mi tru . . . long nau mi kisim dispela bel isi em dispela graun i no inap givim na mi no inap lusim maski dispela graun i laik givim mi planti samting.”

Wanpela brata, longtaim em i wok long hetkota bilong Sosaiti, em Demetrius Papageorge, i tok: “Taim yumi skelim namba bilong ol Sumatin Bilong Baibel na liklik mani ol i holim bilong mekim wok, yumi ken tok olsem dispela piksa ‘Photo-Drama’ em i wanpela wok em i nambawan tru. Tru tumas, spirit bilong Jehova i bin helpim dispela wok!”

[Blok/Ol Piksa long pes 8, 9]

“Eureka Drama”

Etpela mun bihain long taim ol i soim piksa “Photo-Drama of Creation” long namba wan taim, ol i kamapim narapela piksa i wankain liklik, ol i kolim “Eureka Drama.” Ol i wok yet long soim piksa “Photo-Drama of Creation” long ol bikpela taun, tasol long ol liklik taun na ples ol i kamapim dispela piksa “Eureka Drama,” em i gat wankain stori tasol. Ol i bin tok, wanpela bilong dispela piksa “Eureka Drama” em i gutpela rot bilong ol sista i ken autim tok. Bilong wanem ol i tok olsem? Long wanem, hevi bilong ol dispela plet singsing em i 14 kilo tasol. Tasol bilong pilaim ol dispela plet singsing ol i mas karim wanpela pikap.