I Stap Bilong Yumi Namel Long Ol Samting Nogut
‘Yu inap kisim bagarap long planti samting yu mekim long olgeta wan wan de—taim yu slip tu—na ol dispela samting inap kamap olsem laspela samting yu mekim long laip bilong yu.’—Nius Discover.
SAMPELA i tok, i stap bilong yumi i kain olsem man i wokabaut long wanpela hap graun ol i bin planim ol bom long en. Ol i tok olsem, long wanem, bagarap o indai inap painim yumi long wanpela taim yumi no ting em bai kamap, na i no gat toksave long dispela samting bai kamap. Long ol narapela narapela kantri i gat ol narapela narapela kain birua inap painim ol man, olsem bam long ka, pait insait long kantri, bikpela hangre, sik AIDS, sik kensa, sik bilong klok, na planti samting moa. Wanpela nius (U.S. News & World Report) i tok, long hap bilong Afrika long hap saut bilong ples wesan Sahara, sik AIDS i save kilim i dai planti man, winim ol narapela samting, na dispela sik i bin “kilim i dai 2.2 milion man long wanpela yia—dispela i winim tru namba bilong ol man i kisim bagarap long olgeta pait insait long ol kantri bilong Afrika.”
Long nau ol man i save tromoi planti bilion kina long helpim ol man long i stap laip longpela taim moa na long pinisim sik na ol bagarap i kamap long skin. Planti tingting ol i kamapim, olsem kaikai gut na no ken dring tumas na mekim eksasais bilong strongim skin; ol dispela pasin inap kamapim sampela gutpela samting bilong helpim ol. Tasol i gat wanpela samting i stap na em i givim save long yumi long olgeta bikpela samting bilong i stap bilong yumi na em i ken helpim yumi long i stap gut na bel isi. Dispela samting em Baibel. Insait long Baibel i gat ol tok bilong stiaim tingting bilong yumi long planti samting bilong helpim skin bilong yumi long i stap gut na yumi amamas. Baibel i no save kamapim olgeta liklik samting bilong stretim olgeta hevi. Tasol em i save kamapim ol gutpela tok bilong stiaim tingting bilong yumi long ol kain samting olsem pasin bilong yumi long kaikai, eksasais na strongim bodi, tingting yumi holim, maritpasin, kisim dring, tabak, na ol drak man i save kisim bilong painim amamas, na planti samting moa.
Long sindaun bilong planti man i gat hevi bilong mani. Long dispela kain hevi tu Baibel i save helpim yumi. Baibel i tokim yumi long kisim stretpela tingting long mani na pasin bilong lukautim gut mani bilong yumi, na tu, Baibel i helpim yumi long stap olsem gutpela wokman o bosman. Yumi ken tok olsem Baibel em i gutpela samting bilong stiaim tingting bilong yumi long ol samting bilong mani na stap strong long skin, na olgeta samting bilong sindaun bilong yumi. Yu gat laik long kisim save long olsem wanem Baibel i ken helpim yu long nau? Sapos olsem, plis ritim stori i kamap bihain long dispela.