Askim

Ol Kristen tru i mas i gat wanem tingting long givim long ol narapela man ol kopi bilong ol program bilong kompiuta ol i save baim?

Ating sampela bai i kisim tingting kranki long tok bilong Jisas olsem: “Yupela i mas givim nating long ol manmeri. Yupela i no ken kisim pe long en.” Ol bai tingim dispela tok na ol bai ting i orait long givim ol program bilong kompiuta long ol narapela. Tasol Jisas i no toktok long ol buk samting na ol program bilong kompiuta em ol dispela samting i gat lo i tambuim ol man long wokim kopi bilong en na givim nating long ol narapela. Taim em i toktok long pasin bilong givim nating, em i toktok long wok bilong autim tok. Taim ol aposel i go long ol taun na ol ples long autim tok, Jisas i tokim ol olsem ol i mas autim tok bilong Kingdom, oraitim ol sikman, na rausim ol spirit nogut. Taim ol aposel i mekim ol dispela samting ol i no ken kisim pe long en, nogat, ol i mas “givim nating.”​​—⁠Matyu 10:​7, 8.

Planti man i gat ol kompiuta bilong ol yet na bilong wok na ol i laik kisim ol program bilong kompiuta. Na bilong kisim ol dispela program, man i mas baim. Tru, sampela man i save wokim ol program na ol i save givim nating long olgeta man na ol i tok ol man i ken wokim wanpela kopi bilong ol i ken kisim na ol i ken givim long ol narapela. Tasol planti program bilong ol kompiuta ol man i save wokim, ol i salim bilong kisim mani. Ol man i wokim ol dispela program ol i laik bai ol man i mekim wok long en long wok bisnis bilong ol o ol yet i laik mekim wok long en, ol i mas baim. Sapos wanpela man i kisim wanpela program o wokim kopi bilong en na em i no baim, em i brukim lo, na i wankain tu long pasin bilong wokim kopi bilong ol buk, maski ol i givim nating long ol narapela.

Planti program bilong kompiuta (na ol pilai bilong kompiuta tu) i gat laisens long en, na man i baim o mekim wok long ol dispela program ol i mas bihainim ol tok na lo ol i kamapim bilong ol dispela program. Planti bilong ol dispela laisens i tok olsem man i baim dispela program em tasol i ken putim long kompiuta bilong em na mekim wok long en, olsem em i mas putim long wanpela kompiuta tasol, ating long haus, long ples wok o long skul. Sampela laisens i tok orait long man i baim dispela program i ken wokim kopi bilong dispela program na holim bilong em yet, tasol em i no ken wokim kopi bilong en na givim long ol narapela man. Man i baim dispela program, sapos em i laik givim olgeta (wantaim laisens na ol pepa bilong en) long narapela, orait em i ken givim. Tasol em i no inap mekim wok moa long dispela program. I gat ol narapela narapela laisens, olsem na sapos man i baim wanpela program o ol i givim wanpela long em, em i mas askim bilong save olsem i gat wanem lo long dispela laisens.

Planti kantri i gat lo i tambuim pasin bilong wokim kopi bilong sampela samting, na ol program bilong kompiuta tu, na ol i strong long ol man i mas bihainim ol dispela lo. Olsem: Wanpela nius (The New York Times) bilong Janueri 14, 2000, i kamapim ripot olsem “Ol polis bilong Jemani na Denmak i holimpas sampela bilong ol lain i save stilim ol program bilong kompiuta na ol pilai bilong kompiuta samting” na wokim ol kopi bilong en na salim, na ol i salim sampela bilong ol dispela program long rot bilong Intenet tu.

Kongrigesen Kristen i mas i gat wanem tingting long dispela samting? Tingim tok Jisas i mekim, em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Dispela tok i makim olsem ol Kristen i mas bihainim ol lo bilong gavman sapos ol i no pait wantaim lo bilong God. Aposel Pol i stori long ol gavman na i tok olsem: “Olgeta man i mas i stap aninit long ol gavman. . . . Ol man i sakim tok bilong gavman, ol i sakim tok bilong ol man God yet i bin putim long wok bilong ol. Na ol man i mekim olsem, ol bai i kisim pe nogut long pasin ol i mekim.”​—⁠Rom 13:​1, 2.

Em i no wok bilong ol elda long kongrigesen Kristen long skelim kompiuta bilong ol narapela, na mekim olsem ol i gat namba long skelim ol dispela samting na ol i strong long ol brata i mas bihainim ol lo i tambuim ol man long wokim kopi bilong ol program bilong kompiuta. Tasol ol i bilip na skulim ol Kristen olsem ol i mas abrusim pasin bilong kisim ol samting em i no bilong ol na ol i mas strong long bihainim ol lo. Dispela i lukautim ol Kristen na ol i no brukim lo na kisim strafe, na bel bilong ol i no gat tok long ai bilong God. Pol i tok: “Olsem na yumi mas aninit long gavman. Na yumi no ken pret long dispela pe nogut tasol na bihainim tok bilong em. Nogat. Yumi mas save long bel bilong yumi yet olsem dispela pasin i stret, olsem na yumi bihainim.” (Rom 13:⁠5) Pol i mekim wankain tok bilong kamapim tingting bilong ol Kristen tru, em i tok: “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.”​—⁠Hibru 13:⁠18.

[Blok long pes 29]

Sampela ples bisnis na skul i save baim laisens i tok orait long planti man i ken mekim wok long wanpela program, na ol i kolim stret hamas man ol i ken mekim wok long dispela program. Long 1995, ol kongrigesen bilong ol Witnes Bilong Jehova i bin skelim wanpela stori i gat dispela tok i stap long en:

“Planti kampani i save wokim ol program bilong kompiuta na salim, ol i gat lo bilong tambuim ol man long wokim kopi bilong program bilong ol, na ol i givim wanpela laisens i tokaut long olsem wanem ol man i ken mekim wok long ol dispela program na i stret wantaim lo bilong gavman. Planti laisens i tok olsem man i baim dispela program em i no ken givim kopi bilong en long ol narapela; i gat wanpela lo bilong olgeta kantri i tambuim ol man long mekim olsem. Olsem na man i no inap givim kopi bilong ol program bilong kompiuta long ol narapela. . . . Sampela bikpela kampani i save salim ol kompiuta ol i bin putim ol program pinis long en na i gat laisens. Tasol sampela stua i save salim ol kompiuta ol i no save givim laisens, long wanem, ol program ol i putim long kompiuta em i no bilong ol na ol i hait na putim, na dispela i makim olsem man i baim dispela kompiuta em i brukim lo taim em i yusim ol dispela program. Olsem na ol Kristen i mas abrusim pasin bilong skruim sampela program moa long en o wokim kopi bilong dispela program i gat tambu long wokim kopi bilong en (olsem ol buk na nius bilong Sosaiti), long wanem, ol i no kisim tok orait long man i bin wokim dispela program.”