Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim, yu tingim yet o nogat:

• Long Rom 5:​3-5, bilong wanem aposel Pol i kolim pasin bilong wetim God i kisim bek yumi long pinis bilong wanpela lista?

Pol i kolim ol samting i save kamap long ol Kristen​—⁠ol i karim ol hevi, strongim bel, God i orait long ol, na ol i wetim God i kisim bek ol. Dispela pasin bilong ‘wetim God i kisim bek yumi’ em i no dispela pasin yumi lain long en long taim yumi stadi long Baibel, nogat, tasol isi isi dispela pasin em i kamap strong moa long tingting na bel bilong Kristen.​​—⁠12/15, pes 22-23.

• Bilong wanem wanpela Kristen long nau inap laik long kisim save long ol pilai ol i bin mekim long Grik long bipo?

Taim yumi kisim save long stori na pasin bilong mekim ol dispela pilai, dispela inap helpim yumi long kisim sampela save moa long sampela skripsa bilong Baibel. Sampela bilong ol dispela skripsa i toktok long pasin bilong “bihainim lo bilong resis,” na ‘lusim olgeta kain samting i mekim yumi i no inap ran strong, na lukluk i go long pasin bilong Jisas,’ na ‘ran strong na kamap pinis long mak,’ na kisim prais. (2 Timoti 2:5; 4:​7, 8; Hibru 12:​1, 2; 1 Korin 9:​24, 25; 1 Pita 5:⁠4)​​—⁠1/1, pes 28-​30.

• Ol i kamapim wanem nupela pasin bilong autim gutnius long Janueri 1914?

Ol i kamapim piksa “Photo-Drama of Creation.” Dispela piksa i gat 4-pela hap bilong soim na i gat ol piksa wokabaut long en na planti handet piksa slait i gat kala, planti bilong ol dispela piksa i gat tok bilong en ol i bin rekodim na ol i pilaim taim piksa i kamap. Ol i kamapim 20 narapela narapela piksa “Photo-Drama” na ol i soim long ol man long planti hap na lainim ol long tok bilong Baibel.​​—⁠1/15, pes 8-9.

• Olsem wanem Gavening Bodi i narapela long koporesen gavman i orait long en?

Ol memba bilong koporesen i save vot na makim ol dairekta bilong koporesen, tasol i no gat wanpela man i makim ol memba bilong Gavening Bodi, Jisas Krais yet i makim ol. I no gat wok long ol memba bilong Gavening Bodi long stap olsem ol dairekta bilong ol koporesen em ol Witnes Bilong Jehova i mekim wok long en. Long miting bilong olgeta yia bilong Sosaiti Was Taua bilong Pensilvenia nau tasol ol i bin mekim, ol memba bilong Gavening Bodi i bin stap olsem ol dairekta na ofisa ol i bin lusim ol dispela wok long laik bilong ol yet. Ol brata bilong lain “arapela sipsip” em ol i gat save ol i kisim ples bilong ol. (Jon 10:16) Dispela i mekim na Gavening Bodi i ken lusim bikpela hap taim moa long redim kaikai bilong spirit, na long lukautim ol brata long olgeta hap long ol samting bilong spirit.​​—⁠1/15, pes 29, 31.

• Yumi ken skelim wanem tupela stori bilong Baibel bilong lain long pasin bilong daunim bel hevi?

Wanpela em stori bilong Hana, mama bilong Samuel. Eli, em hetpris bilong Israel, em i no bin skelim gut na em i kamapim wanpela tok i no stret, na Hana inap larim dispela tok i mekim em i bel hevi tru. Tasol long gutpela pasin daun em i tokaut stret long samting em i mekim. Na tu, Hana i no bel nogut long Eli. Narapela em stori bilong Mak, ating em i bin bel hevi taim aposel Pol i no laik em i go wantaim ol long wanpela raun bilong wok misineri. Em i no bel hevi nogut tru long em i no inap mekim dispela wok, nogat; em i raun yet wantaim Barnabas.​​—⁠2/1, pes 20-22.

• Bilong wanem ol Kristen i mas was gut long pasin bilong givim o kisim ol program bilong kompiuta long ol narapela?

Planti program bilong kompiuta (na ol pilai bilong kompiuta tu) i gat laisens long en, na man i baim o yusim ol dispela program i ken putim long wanpela kompiuta tasol. Taim yumi wokim kopi bilong ol program na givim long ol narapela o givim nating long ol, dispela i brukim lo i tambuim pasin bilong wokim kopi bilong ol program. Ol Kristen i laik bihainim dispela lo, “samting bilong Sisar, yupela i mas givim long Sisar.” (Mak 12:17)​​—⁠2/15, pes 28-29.

• Siril na Metodius ol i husat, na ol i bin mekim wanem bilong helpim wok bilong stadi long Baibel?

Tupela i brata, mama i karim ol long Tesalonaika, long Grik, long 800 C.E. samting. Ol i kamapim ol leta o rait bilong ol tok Slav na ol i tanim bikpela hap bilong Baibel long tok Slav.​​—⁠3/1, pes 28-29.

• Wanem insait bilong dispela tok “tingting bilong man i bihainim laik bilong Holi Spirit”?​—⁠Rom 8:⁠6.

Dispela i makim olsem strong bilong Jehova i stiaim, bosim, na kirapim yumi. Yumi ken larim spirit i stiaim yumi taim yumi kaunim na stadi long Baibel, na givim bel long bihainim ol lo bilong God, na beten askim God long givim spirit bilong em long yumi.​—⁠3/15, pes 15.

• Yumi inap mekim wanem sapos ol narapela i kisim tingting kranki long yumi?

Em i bikpela samting long wok strong long stretim hevi long pasin sori. Sapos yu no inap stretim, no ken bel hevi. Beten askim Jehova long helpim yu, em i save “skelim” bel bilong ol man. (Sindaun 21:2; 1 Samuel 16:⁠7)​​—⁠4/1, pes 21-23.