Lotu Kristen Tru i Stap Strong na i Win!
“Tok bilong Bikpela i wok strong long ol manmeri, na i kamap strong long laip bilong ol. Na ol i raun na autim tok long planti hap.”—APOSEL 19:20.
1. Lotu Kristen long taim bilong ol aposel i go bikpela olsem wanem?
SPIRIT holi i givim strong long ol Kristen bilong pastaim, olsem na ol i givim bel tru long autim tok bilong God. Wanpela saveman i tok: “Lotu Kristen i go nabaut hariap long olgeta hap em Rom i bosim. Long yia 100, ating olgeta provins long boda bilong solwara Mediterenian i gat sampela Kristen long en.”
2. Satan i mekim wanem bilong daunim tok bilong gutnius? I gat wanem tok profet long dispela samting?
2 Satan i no inap pasim wok bilong ol Kristen bilong pastaim. Olsem na bilong daunim tok bilong gutnius, em i mekim wok long narapela rot—em ol lain i tromoim bilip tru. Jisas i bin tok profet long dispela samting long tok piksa em i mekim long wit na gras nogut. (Matyu 13:24-30, 36-43) Aposel Pita tu i bin tok sampela tisa giaman bai kamap insait long kongrigesen na kamapim kain kain tok giaman nogut. (2 Pita 2:1-3) Na aposel Pol i bin tok, paslain long de bilong Jehova, ol man bai bihainim pasin bilong tromoim bilip tru.—2 Tesalonaika 2:1-3.
3. Wanem samting i kamap bihain long ol aposel i dai pinis?
3 Bihain long ol aposel i dai pinis, ol bilip na save nating bilong ol haiden i karamapim tok bilong gutnius. Olsem Baibel i tok profet, ol tisa giaman i paulim na bagarapim tok i tru. Isi isi lotu Kristen giaman, ol i kolim Kristendom, i karamapim lotu Kristen tru. Wanpela lain pris pasto i kamap na ol i wok long pasim ol man nating long kisim Baibel. Tru, ol man i tok ol i Kristen i wok long kamap planti, tasol lotu bilong ol i no trupela lotu. Lotu Kristendom i go long planti hap na i kamap wanpela strongpela lain long hap bilong Wes, tasol ol i no kisim blesing na spirit bilong God.
4. Bilong wanem wok bilong Satan long pasim laik bilong God em i bagarap?
4 Tasol dispela wok bilong Satan long pasim laik bilong Jehova em i mas bagarap. Long taim lotu Kristen giaman i wok strong, i gat sampela man i bihainim yet lotu Kristen tru. Ol man i raitim gen Baibel, ol i wok strong na bai ol inap raitim stret ol tok. Olsem na ol tok bilong Baibel i stap gut, maski planti man i tok ol i gat namba long skulim ol man long Baibel, ol i bin paulim ol tok bilong en. Na insait long planti handet yia bihain, sampela saveman, olsem Jerom na Tindel, ol i strongim bel na tanim Tok Bilong God i go long narapela tok ples na ol i tilim long ol man. Planti milion manmeri i bin harim sampela tok bilong Baibel na kisim save long lotu i kain olsem lotu Kristen, tasol em i no lotu Kristen tru.
5. Profet Daniel i tok profet long wanem samting bilong stretpela save?
5 Bihain, olsem Buk Daniel i tok profet, stretpela save i kamap bikpela tru. Dispela samting i bin kamap long “taim bilong las de”—em dispela taim nau yumi stap long en. (Daniel 12:4) Spirit holi i bin helpim ol man long olgeta hap bilong graun, em ol i laikim tru tok i tru, long kisim stretpela save long trupela God na long laik bilong em. Maski inap planti handet yia ol lain bilong bikhet na givim baksait long bilip i bin lainim ol man long ol bilip giaman, tok bilong God i stap strong na i win! Long nau, ol i autim tok bilong gutnius long olgeta hap, na helpim ol man long save long wanpela nupela taim ol i ken wetim i kamap. (Song 37:11) Orait nau yumi ken stori long tok bilong God i kamap strong long taim bilong yumi.
Tok Bilong God i Kamap Strong Long Nau
6. Long 1914, ol Sumatin Bilong Baibel i save long wanem ol tok i tru?
6 Paslain liklik long yia 1900, tok i tru bilong Baibel i bin kirapim liklik lain bilong ol Sumatin Bilong Baibel, em nau yumi kolim ol Witnes Bilong Jehova. I kam inap long 1914, dispela lain i pilim tru tok i tru bilong Baibel. Ol i kisim gut ol gutpela tok i stori long laik bilong God. Ol i pilim tru pasin sori bilong Jehova long salim Pikinini bilong em i kam long graun, na nau rot i op long man i ken kisim laip oltaim. Na ol i bin kisim save long nem bilong God na ol pasin bilong em na ol i pilim tru. Na tu, ol i save olsem taim “bilong ol arapela lain” i pinis na i makim olsem klostu Kingdom bilong God, em wanpela gavman, bai bringim ol blesing i kam long ol man. (Luk 21:24) Tok bilong dispela gutnius em i gutpela tok tru! Ol i mas helpim olgeta man long olgeta hap long save long ol dispela tok i tru i gat strong. Ol i laik helpim ol man na bai ol i no ken bagarap!
7. Long taim bilong yumi, tok i tru bilong Baibel i bin kamap strong na i win olsem wanem?
7 Jehova i mekim gut long dispela liklik lain Kristen em i bin makim long spirit holi. Long nau, namba bilong ol man i kamap Kristen tru i winim 6 milion. Na ol Witnes Bilong Jehova i stap long 235 kantri, olsem na tok bilong God i bin go long planti kantri. Na tu, tok i tru bilong Baibel i bin wok strong—em i win long olgeta kain hevi, olsem pasin birua bilong ol lotu. Dispela wok bilong autim tok long olgeta hap i kamapim klia olsem Jisas i kam i stap olsem King bilong Kingdom.—Mayu 24:3, 14.
8. Sampela man i bin tok wanem long lain Witnes Bilong Jehova i kamap bikpela?
8 Ol man bilong raitim stori long ol samting i bin kamap bipo i bin tokaut olsem wok bilong lotu Kristen long taim bilong ol aposel i bin kamap bikpela hariap, na olsem tasol, planti saveman i bin mekim wankain tok long lain bilong Jehova long nau. Long Amerika, tupela saveman i tok: ‘Insait long 75 yia i go pinis, lain Witnes Bilong Jehova long olgeta hap i bin go bikpela hariap hariap.’ Wanpela nius bilong Is Afrika i tok ol Witnes “i bilong wanpela bikpela lain bilong lotu. I no gat planti lotu i wok long i go bikpela na i gat gutpela nem olsem dispela lotu. Long olgeta hap, ol man i save olsem dispela lotu i save bihainim olgeta tok bilong Baibel.” Na wanpela nius Katolik, ol i wokim long Yurop, i tok “ol Witnes Bilong Jehova i kamap planti tru.” Wanem samting i bin helpim dispela lain long kamap bikpela?
Spirit Holi i Mekim Wok Long Nau
9. (a) Wanem wanpela bikpela as na tok bilong God long nau i stap strong na i win? (b) Jehova i save mekim wanem bilong pulim ol man i kam long em?
9 Wanpela bikpela as na tok bilong God i win long nau, em spirit bilong Jehova i wok strong i stap, wankain olsem long taim bilong ol aposel. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Dispela tok i makim olsem long pasin isi God i pulim ol man i gat stretpela bel i kam long em—em i kirapim bel bilong ol long pilim tru ol tok. Long wok autim tok ol Witnes i mekim, Jehova i wok long pulim “ol gutpela samting bilong olgeta lain”—em ol man i gat pasin daun na pasin olsem bilong sipsip.—Hagai 2:6, 7, NW.
10. Wanem kain man i bin kisim tok bilong God?
10 Spirit holi i bin givim strong long ol manmeri bilong God long bringim tok bilong God i go long olgeta hap bilong graun, tasol i no dispela samting tasol—spirit holi i bin kirapim olgeta kain man long pilim tru tok bilong gutnius. Tru tumas, ol man i kisim tok bilong God ol i bin kam long “olgeta lain man, na bilong olgeta tok ples, na bilong olgeta kain skin, na bilong olgeta kantri.” (KTH 5:9; 7:9, 10) Sampela bilong ol em ol maniman na rabisman, na ol man i winim bikpela skul, na ol man i no save rit rait. Sampela i bin kisim tok bilong God taim pait i stap na ol lain i mekim nogut tru long ol, na sampela i bin kisim tok i tru taim gutaim i stap na ol i gat gutpela sindaun. Aninit long olgeta kain gavman, na long olgeta kain lain, na long banis kalabus nogut o long gutpela haus bilong king, i gat ol man na meri i bin kisim gutnius.
11. Spirit holi i mekim wanem wok long wokabaut bilong ol manmeri bilong God? Husat ol i stap narapela narapela kain?
11 Maski ol manmeri bilong God ol i bilong kain kain lain na sindaun, ol i sindaun gut wantaim long pasin wanbel. (Song 133:1-3) Dispela i kamapim klia olsem spirit holi i wok strong i stap long wokabaut bilong ol man i mekim wok bilong God. Spirit bilong em i gat bikpela strong long helpim ol wokboi bilong em long kamapim ol gutpela pasin, olsem laikim tru ol narapela, amamas, bel isi, helpim ol man. (Galesia 5:22, 23) Long nau, yumi inap luksave gut long samting profet Malakai i bin tok profet long en long bipo: “Tru tumas bai yupela lukim . . . olsem stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.”—Malakai 3:18, NW.
Tok Bilong God i Wok Strong Long Ol Man i Givim Bel Long Mekim Wok
12. Wanem tingting bilong ol Witnes Bilong Jehova long wok bilong autim tok? Ol i save ol man bai mekim wanem long wok bilong ol long autim tok?
12 Ol Witnes Bilong Jehova ol i no save go long lotu na stap nating tasol, nogat. Olgeta wan wan i insait long wok bilong autim tok. Olsem ol Kristen bilong pastaim, ol i amamas long givim ol yet long God long bihainim laik bilong em, na ol i helpim ol narapela long kisim save long ol tok promis bilong God long Kingdom. Ol i wanwok bilong God, na ol i wok wantaim spirit holi bilong em long bringim ol narapela i kam long mekim wok bilong Jehova. Taim ol i mekim olsem, ol i bihainim pasin bilong Jehova long marimari na sori long ol man i no bilip. Na ol i mekim olsem, maski ol i bungim ol man i tok bilas, o les long harim tok, o mekim nogut tru long ol. Jisas i redim lain bilong em long bungim ol kain man olsem. Em i tok: “Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu. Na sapos ol i bin bihainim tok bilong mi, orait ol bai i bihainim tok bilong yupela tu.”—Jon 15:20.
13. Wanem ol samting lain Kristendom i sot long en ol i pulap tru insait long lain Witnes Bilong Jehova?
13 Yumi kirap nogut tru long pasin bilong ol Witnes Bilong Jehova long nau na pasin bilong ol Kristen tru long taim bilong ol aposel i wankain. Tasol pasin bilong ol Witnes Bilong Jehova i narapela kain tru long lain bilong Kristendom long nau. Wanpela saveman i stori long pasin bilong ol Kristen bilong pastaim long givim bel tru long autim tok, na em i tok: “Sapos lo bilong sios i no senis na bai wok bilong autim tok i ken kamap gen olsem samting olgeta Kristen i baptais pinis i mas mekim, na tu, sapos wokabaut bilong ol Kristen i no kamap gutpela, winim bilong ol man i no bilip, orait wok bilong yumi long autim gutnius i no inap kamap gutpela tumas.” Ol samting lain Kristendom i sot long en ol i pulap tru insait long lain Witnes Bilong Jehova! Bilip bilong ol i tru na i gat laip, na as bilong dispela bilip em ol tok i tru bilong Baibel em bel bilong ol i kirapim ol long autim long olgeta man i laik harim.—1 Timoti 2:3, 4.
14. Wanem tingting bilong Jisas long wok bilong em? Wanem tingting bilong ol disaipel bilong em long nau?
14 Jisas i tingim tru wok bilong em long autim tok, na dispela wok em i nambawan samting long tingting bilong em. Em i tokim Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru.” (Jon 18:37) Lain bilong God i gat wankain tingting olsem Jisas. Tok i tru i stap long bel bilong ol, na ol i wok long painim kain kain rot bilong ol i ken helpim planti man long kisim save long en. Sampela rot ol i painim bilong mekim dispela wok ol i narapela kain tru.
15. Sampela i bin mekim wanem narapela kain pasin bilong autim tok bilong gutnius?
15 Long wanpela kantri long Saut Amerika, ol Witnes i raun long wanpela han wara bilong wara Amason bilong autim tok i tru long ol man. Tasol taim pait i kamap long 1995, i tambu long ol man i no soldia long raun long dispela wara. Ol Witnes i strong long helpim ol man i laik harim tok long kisim yet ol buk bilong Baibel, olsem na ol i raitim pas na putim wantaim ol Wastaua na Kirap! insait long ol botol plastik. Ol i tromoi ol botol long wara na ol botol i trip i go. Ol i save mekim olsem i go inap 4 na hap yia inap long taim tambu i pinis na ol inap raun gen long wara. Ol man i sindaun long arere bilong dispela wara ol i tok tenkyu long ol Witnes long ol dispela nius. Wanpela meri, bipo em i stadi long Baibel wantaim ol Witnes, em i holim ol na aiwara i kamap. Em i tok: “Mi ting bai mi no lukim yupela gen. Tasol taim mi kirap long kisim ol nius long botol, em nau, mi save pinis yupela i no bin lusim tingting long mi!” Sampela moa i sindaun long arere bilong dispela wara i tok, ol i bin kaunim ol dispela nius planti taim. Long planti setelmen, i gat wanpela hap long wara em strongpela tait i mekim na ol pipia samting i trip antap ol i tantanim na bung namel long wara. Ol man i gat laik long harim tok bilong Baibel i bin kam planti taim long dispela hap bilong sekim, sampela nius i stap long wara o nogat.
16. Sapos yumi redi long helpim ol man, olsem wanem sampela taim dispela i opim rot long kamapim disaipel?
16 God Jehova na ol strongpela ensel bilong em ol i stiaim na helpim wok bilong autim tok. (KTH 14:6) Sapos yumi redi long autim tok long olgeta taim, orait sampela taim long taim yumi no tingim, rot bai op long kamapim ol disaipel. Long Nairobi, Kenya, tupela meri Kristen i autim tok pinis long ol haus. Orait nau wanpela yangpela meri i kamap long ol, na em i amamas tru na i tok: “Mi bin beten askim God long helpim mi long bungim kain meri olsem yupela.” Em i askim ol Witnes long kam long haus bilong em, na long dispela de stret, ol i kirapim Baibel-stadi wantaim em. Bilong wanem dispela meri i gat laik tru long lukim dispela tupela Kristen? Tupela wik bipo, bebi bilong em i dai. Olsem na taim em i lukim wanpela manki i holim liklik nius “I Gat Gutpela Samting bai Painim Ol Man i Dai Pinis?,” em i laik kisim dispela nius na em i tokim manki long givim long em. Manki i no laik givim, tasol em i makim long pinga ol Witnes i bin givim dispela nius long em. I no longtaim na dispela meri i wok long kamap strong long ol samting bilong spirit, na em i no hatwok olsem bipo long karim hevi bilong pikinini bilong em i dai pinis.
Pasin Sori Bilong God i Mas Win
17-19. Long rot bilong ofa bilong baim bek ol man, Jehova i sori long ol man olsem wanem?
17 Tok bilong God i kamap strong long olgeta hap, na wankain olsem ofa bilong Krais Jisas long baim bek ol man, wok bilong autim tok i kamapim klia olsem Jehova i laikim tru ol man long olgeta hap. Aposel Jon i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
18 Tingim dispela pasin sori Jehova i kamapim taim em i stretim rot bilong givim dispela pe bilong baim bek ol man. Inap planti milion milion yia, God i bin pas gut wantaim dispela wanpela Pikinini bilong em, em i “as bilong olgeta samting God i bin wokim,” na God i laikim em tumas. (KTH 3:14) Jisas i laikim tumas Papa bilong em, na long “taim graun i no kamap yet,” Jehova i laikim tumas Pikinini bilong em. (Jon 14:31; 17:24) Jehova i larim gutpela Pikinini bilong em i dai na bai ol man inap kisim laip oltaim. Olaman! Dispela i kamapim klia tru olsem God i laikim tumas ol manmeri long graun!
19 Jon 3:17 i tok: “God i no salim Pikinini bilong en i kam long graun bilong skelim pasin bilong ol manmeri bilong graun olsem jas. Nogat. Em i salim em i kam bilong kisim bek ol.” Olsem na Jehova i salim Pikinini bilong em i kam bilong helpim na kisim bek ol man; Em i no salim em bilong givim strafe long ol man, nogat. Dispela i stret wantaim tok bilong Pita: “[Jehova] i laik bai olgeta man i mas tanim bel, olsem na em i isi long yupela na em i wet i stap yet.”—2 Pita 3:9.
20. Olsem wanem wok bilong autim gutnius i helpim wok bilong kisim bek ol man?
20 Jehova i bin stretim rot na bai i gat as bilong lo bilong em long kisim bek ol man, maski em yet i lusim bikpela samting tru. Olsem na Jehova i laik bai dispela ofa i ken helpim planti man moa yet. Aposel Pol i tok: “ ‘Olgeta manmeri i askim Bikpela long helpim ol, em bai i kisim bek ol.’ Tasol sapos ol i no bilip long em, olsem wanem bai ol i askim em long helpim ol. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?”—Rom 10:13, 14.
21. Yumi mas i gat wanem kain tingting long wok bilong autim tok em yumi inap insait long en?
21 Em i wanpela gutpela samting tru yumi inap insait long dispela wok bilong autim tok na skulim ol man long olgeta hap bilong graun! Dispela wok i gat hatwok bilong en, tasol Jehova i amamas tru taim em i lukim lain bilong em i stap gut long bihainim tok i tru na autim gutnius! Olsem na maski yu gat wanem kain sindaun, larim spirit bilong God na pasin bilong laikim tru narapela long bel i kirapim yu long insait long dispela wok. Na tingim: Samting yumi lukim i kamap long olgeta hap em i kamapim klia tru olsem klostu nau, God Jehova bai truim tok promis bilong em long kamapim “nupela skai na nupela graun” i gat “stretpela pasin tasol bai stap long en.”—2 Pita 3:13.
Yu Inap Tingim?
• Bilong wanem ol lain i tromoim bilip tru i no inap pasim ol man long autim tok long gutnius?
• Olsem wanem tok bilong God i bin stap strong na i win long taim bilong yumi?
• Spirit holi i mekim wanem kain wok long nau?
• Pe bilong baim bek man na wok bilong autim gutnius i kamapim klia wanem samting?
[Sat/Piksa long pes 16]
(Bilong save ol dispela rait i stap we long pes, lukim buk o magasin)
Namba bilong ol man i autim tok bilong Kingdom insait long 100 yia i go pinis
Ol Pablisa (namba i makim ol milion)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Ol Piksa long pes 15]
JEROM
TINDEL
GUTENBEK
HUS
[Kredit Lain]
Gutenberg and Hus: From the book The Story of Liberty, 1878
[Piksa long pes 15]
Ol Sumatin Bilong Baibel i autim gutnius, 1920-1929
[Ol Piksa long pes 16, 17]
Long olgeta hap i gat ol manmeri i amamas long gutnius ol i harim
[Piksa long pes 18]
Wok autim tok i kamapim pasin sori bilong God olsem ofa bilong Jisas Krais i mekim