Ripot Long Wok Bilong Kingdom
Ol i Stretim Bek Nem Bilong God
TOK bilong God, em Baibel, em i tok: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God long dispela de em bai i kam bilong kotim ol manmeri.” (1 Pita 2:12) Ol Kristen tru i wok strong long bihainim gutpela pasin na bai ol i no bagarapim nem bilong Jehova.
Long Senanga, em wanpela hap bilong Sambia, ol i stilim redio bilong wanpela skul-tisa long haus bilong em. Em i sutim tok long ol Witnes Bilong Jehova, long wanem, ol i bin autim tok long dispela hap. Em i go putim ripot long polis olsem ol Witnes i bin stilim redio bilong em. Bilong kamapim olsem ol Witnes i bin go long haus bilong em, em i soim ol wanpela liklik nius em i painim long plua. Tasol ol polis i no laik bilipim tok bilong em. Ol i tokim em long go bek na painimaut gut dispela samting.
Ol elda i kirapim ol dispela Witnes i bin autim tok long hap bilong tisa long dispela de, long i go toktok wantaim em long dispela samting. Sampela brata i go toktok wantaim em, na ol i tokim em ol i laik stretim bek nem bilong Jehova. Taim ol i toktok wantaim em, ol i tokim tisa olsem ol i bin bungim wanpela yangpela man long haus bilong em na ol i givim wanpela liklik nius long em. Tisa inap tingim pes bilong dispela yangpela man taim ol i stori gut long man i luk olsem wanem. Tupela i bilong wanpela lotu tasol. Tisa i toktok wantaim dispela yangpela man, tasol em i tok em i no bin stilim redio. Tisa i toktok wantaim papamama bilong dispela yangpela man na em i go bek long haus. Insait long wanpela aua, mama bilong yangpela man i bringim bek redio long tisa.
Tisa i sori tru long pasin em i bin mekim long sutim tok nating long ol Witnes, na em i go lukim ol elda na askim ol long lusim tingting long pasin em i bin mekim. Ol elda i tok orait, tasol ol i askim em long kamapim klia ol samting i bin kamap bambai ol narapela i ken save ol Witnes i no gat rong. Ol i mekim wanpela toksave long skul, na dispela i stretim bek nem bilong Jehova. Ol Witnes Bilong Jehova inap wok yet long autim tok long dispela hap.
[Ol Mep/Piksa long pes 19]
(Bilong save ol dispela rait i stap we long pes, lukim buk o magasin)
AFRIKA
Sambia
[Kredit Lain]
Mountain High Maps® Copyright © 1997 Digital Wisdom, Inc.