Askim

Ol Witnes Bilong Jehova i ting olsem wanem long baim samting man i bin stilim?

Ol Kristen i no save baim samting ol i save man i bin stilim.

Pasin bilong stil em i no stret. Lo bilong God long Israel i tok klia olsem: “Yupela i no ken stil.” (Kisim Bek 20:15; Wok Pris 19:11) Sapos ol i holim wanpela stilman, ol bai skelim em long kot na em i mas bekim samting em i stilim inap tupela, o 4-pela, o 5-pela.

Kirap long bipo yet ol stilman i laik painim man bilong baim samting ol i bin stilim bambai ol i ken kisim kwik mani, na nogut dispela i stap yet long han bilong em na ol i holim em na em i no gat rot bilong haitim rong bilong em. Long dispela as ol stilman i save singaut long liklik pe tasol bilong baim samting ol i stilim na dispela i save pulim ol man long baim kwik. Ating Kisim Bek 22:​1 i stori long dispela pasin bilong stilman long larim narapela man i baim samting em i stilim. Dispela ves i tok: “Sapos wanpela man i stilim wanpela bulmakau o wanpela sipsip na i kilim i dai o em i larim narapela man i baim, orait yupela i mas mekim em i givim papa bilong abus 5-pela bulmakau bilong bekim dispela bulmakau, na 4-pela sipsip bilong bekim sipsip.”

Wanpela tisa bilong lotu Juda (em Abraham Chill) i tok: “I tambu tru long baim o kisim samting narapela man i bin stilim, maski yu no save em i bin stilim. Olsem na yu no ken baim meme long wasman bilong ol meme, long wanem, ating papa bilong en, em bos bilong dispela wasman, em i no save long dispela na wasman yet i laik kisim dispela mani.”​—⁠Buk The Mitzvot⁠—​The Commandments and Their Rationale.

Lo bilong God i no tambuim man long “baim meme long wasman bilong ol meme,” nogut wasman yet i laik holim dispela mani na i olsem man i baim wanpela meme narapela i stilim. Nogat. Tasol ol wokboi bilong Jehova i mas was gut na taim ol i laik baim samting (meme o narapela samting) long wanpela man, sapos i luk olsem dispela man em i no papa bilong dispela samting o em samting ol man i bin stilim, orait ol i no ken baim. Lo bilong God i kamapim klia olsem God i save, i stret i gat sampela samting em bilong wanpela man yet, na sapos narapela man i stilim, nau papa bilong en i no gat moa. Sapos wanpela man i baim samting em i save ol man i bin stilim, ating i no olsem em yet i kamap stilman, tasol nau papa bilong dispela samting bai hatwok moa long kisim bek samting bilong em.​—⁠Sindaun 16:19; lukim tu 1 Tesalonaika 4:⁠6.

Yumi olgeta i save, ol man bilong baim samting​—⁠ol meri bilong haus o bisnisman​—⁠ol i laik baim samting long gutpela pe. Ol meri bilong olgeta hap ol i laik baim samting long taim ol man i daunim pe bilong en, o long taim i gat planti na pe i liklik tasol, o ol i baim long bakstua o long liklik stua, na bai pe i no bikpela. (Sindaun 31:14) Tru, ol i laik kisim samting long liklik pe, tasol nogut ol i lusim stretpela pasin. Ol man i stap gut long God long taim bilong Nehemia ol i no save baim samting long de Sabat, maski ol inap kisim long liklik pe long dispela de. (Nehemia 10:31; lukim tu Amos 8:​4-6.) I wankain long ol Kristen. Ol i no laikim pasin bilong stil, na dispela i helpim ol long daunim laik bilong ol long kisim samting long liklik pe sapos ol i save em samting ol man i bin stilim.

I gat sampela man ol i baim i go ol samting long ol man na planti man i save em ol samting ol man i bin stilim. O sapos wanpela man i mekim pasin hait na kolim liklik pe tru bilong wanpela samting, orait ol man i gat gutpela tingting ol inap save em samting ol man i bin stilim. Ating lo bilong kantri tu i tokaut long man i mas kisim gutpela tingting olsem. Wanpela buk bilong lo i tok:

“Maski man i no save ol i bin stilim samting long husat o husat i bin stilim, o long wanem taim o long wanem hap ol i bin stilim, o wanem kain samting i bin kamap na ol i stilim, sapos em i save ol i bin stilim na em i kisim, orait em i gat asua. . . . Sampela kot i tok, man i kisim samting olsem, sapos em i kisim long rot em ol man i gat gutpela tingting na i save was gut inap save em rot bilong kisim samting ol man i bin stilim, orait dispela man i gat asua.”

Em narapela gutpela as na Kristen i no save baim samting ol man i bin stilim. Sapos em i baim kain samting olsem em inap kamap man bilong brukim lo. Planti man i no tingting planti long brukim lo sapos ol i ting ol inap mekim na abrusim strafe. Tasol ol Kristen i no gat tingting olsem. Ol i laik “aninit long ol gavman.” Ol i man bilong bihainim lo na dispela i lukautim ol​—⁠ol i no mekim rong, olsem na ol i no kamap long kot. Na tu pasin bilong ol long bihainim lo i helpim ol na bel bilong ol i stap stret long ai bilong Jehova.​—⁠Rom 13:​1, 4, 5.

Pren bilong God, em Abraham, em i makim gutpela pasin bilong bihainim maus bilong bel. Long taim bilong em, 4-pela king bilong hap sankamap i daunim ol king i stap long hap em Lot i stap long en, na ol ami bilong ol i kisim planti gutpela samting na karim i go, i olsem ol i stilim. Abraham i bihainim ol dispela birua na daunim ol na kisim bek ol samting ol i bin stilim. King bilong Sodom i tokim Abraham: “Yu ken holim olgeta samting yu kisim long pait.” Tasol Abraham i bekim ol dispela samting long papa tru bilong en na em i tok: “Mi no inap kisim wanpela samting bilong yu, . . . Nogat tru. Nogut yu tok, ‘Mi yet mi mekim Abram i kamap man i gat planti samting.’ ”​—⁠Stat 14:​1-24.

Ol Kristen i no laik kisim mani long rot bilong samting ol man i bin stilim. Jeremaia i tok: “Sapos man i mekim pasin i no stret na i kisim planti mani samting, em i olsem wanpela pisin i stilim ol kiau bilong narapela pisin na i kisim ol pikinini i kamap long ol dispela kiau.” (Jeremaia 17:11) Olsem na ol Kristen i save bihainim gutpela tingting, ol i no laik brukim lo bilong gavman na kisim samting ol man i bin stilim. Tasol ol i tingting tu long bihainim stretpela lo bilong God, olsem na ol i no laik insait liklik long dispela pasin i no stret, em pasin bilong stil. Devit i tok stret olsem: “Liklik samting bilong wanpela stretpela man i winim planti samting bilong olgeta man nogut.”​—⁠Buk Song 37:⁠16.