Stap Gut Long Narapela—Dispela Pasin i Olsem Wanem?
LAIN Hasidim em i wanpela lain Juda i bin kamap long yia 200 B.C.E. samting na ol i bin tok ol i wanpela lain i stap gut long God. Nem bilong ol i kam long wanpela tok Hibru, cha·sidhʹ, olsem “stap gut long.” Dispela tok Hibru i bin kam long narapela tok Hibru i wankain liklik, em cheʹsedh, em planti taim ol man i save tanim olsem “laikim tru,” “sori tru,” “mekim gutpela pasin long,” “marimari.” Buk Theological Dictionary of the Old Testament i tok, pasin cheʹsedh “i save mekim wok, na i helpim narapela, na i stap oltaim. Na dispela tok i no makim samting man i tingting tasol long mekim, em i makim tu samting dispela tingting i kirapim man long mekim. Em i makim pasin bilong lukautim laip bilong narapela. Em i mekim wok bilong helpim man i gat hevi. Em i mak bilong pasin pren.”
Long planti tok ples i no gat wanpela tok tasol yumi ken kolim bilong makim insait tru bilong dispela tok Hibru olsem i stap long Baibel, nogat. Tru, long Baibel dispela tok “stap gut long” i makim pasin bilong stap gut long ol wok samting yumi mas mekim, tasol i no dispela samting tasol. Em i makim tu pasin bilong laikim tru na pas strong long narapela na mekim sampela samting bilong helpim em. Bilong helpim yu long save gut olsem pasin bilong stap gut long narapela i olsem wanem, tingim samting Jehova i bin mekim bilong kamapim dispela pasin long Abraham, Moses, Devit, lain Israel, na ol narapela manmeri.
Jehova i Stap Gut Long Narapela
Jehova i tokim pren bilong em, Abraham: “Mi save was gut tru long yu.” (Stat 15:1; Aisaia 41:8) Jehova i no tok tasol long em bai mekim olsem, nogat. Em i kirap mekim sampela wok i stret wantaim dispela tok. Em i lukautim na kisim bek Abraham wantaim lain bilong em long han bilong king bilong Isip na Abimelek. Em i helpim Abraham long kisim bek Lot long han bilong 4-pela king ol i bung wantaim na i kam pait. Taim Abraham i gat 100 krismas na Sara i gat 90 krismas, Jehova i kirapim bek strong bilong tupela long kamapim pikinini na bai Pikinini em i bin tok promis long en inap kamap. Planti taim Jehova i toktok wantaim Abraham long rot bilong ol ensel na ol samting olsem driman. Jehova i stap gut long Abraham long taim em i stap laip, na tu, bihain tru long taim em i dai. Inap planti handet yia Jehova i bihainim ol tok promis bilong em long lain tumbuna bilong Abraham, em lain Israel, maski ol i mekim pasin bikhet. Pasin bilong Jehova long stap pren wantaim Abraham, dispela i makim pasin bilong stap gut long narapela em i wanem samting tru—Jehova i laikim em tru na dispela i kirapim em long mekim gutpela pasin long Abraham.—Stat, sapta 12 i go 25.
Baibel i tok, “Bikpela i save toktok wantaim Moses olsem man i save toktok wantaim pren bilong en.” (Kisim Bek 33:11) Tru tumas, Moses i stap pren tru wantaim Jehova—i no gat narapela profet paslain long taim bilong Jisas Krais i bin pas gut wantaim Jehova olsem, nogat. Jehova i bin mekim wanem bilong soim olsem em i stap gut long Moses?
Taim Moses i gat 40 krismas na em i gat strong na save, em yet i kirap mekim sampela wok bilong helpim lain bilong em long kamap fri. Tasol i no taim yet bilong mekim dispela wok. Em i mas ranawe, nogut ol i kilim em i dai. Inap 40 yia em i lukautim ol sipsip long Midian. (Aposel 7:23-30) Tasol Jehova i no lusim em. Long taim stret bilong mekim dispela wok, em i tokim Moses long go bek long Isip na bringim ol Israel i go lusim Isip.
Na tu, Jehova i bin stap gut long Devit, em namba tu king bilong Israel. Taim Devit i stap yangpela yet, Jehova i tokim profet Samuel: “Em dispela man tasol. Kisim wel bilong makim king na putim long em.” Kirap long dispela taim Jehova i stap gut long Devit—em i lukautim na soim rot long Devit taim em i wok long kamap bikpela man na kamap king bilong olgeta lain bilong Israel. Jehova i helpim Devit na “ol laion na bea,” na traipela man Filistia, em Goliat, i no bagarapim em. Em i helpim Devit long winim planti pait na daunim ol birua bilong Israel, na em i helpim Devit long abrusim spia em Sol i tromoi long Devit taim Sol i jeles na birua long em.—1 Samuel 16:12; 17:37; 18:11; 19:10.
Tru, Devit i no gutpela olgeta. Em i bin mekim sampela bikpela rong. Tasol em i tanim bel tru, olsem na Jehova i stap gut long em na i no lusim em. Inap long taim Devit i dai, planti taim Jehova i lukautim laip bilong em. Em i helpim Devit taim em i gat hevi. Em i laikim tru Devit na mekim gutpela pasin long em!—2 Samuel 11:1–12:25; 24:1-17.
Lain bilong Israel i kamap lain bilong Jehova yet taim ol i stap long maunten Sainai na ol i tok promis long bihainim kontrak bilong Lo Bilong Moses. (Kisim Bek 19:3-8) Olsem na Baibel i tok piksa olsem lain Israel i marit long Jehova. Jehova i tokim lain Israel: “Bai mi singautim yu i kam bek long mi. Yu olsem yangpela meri i bin marit. . . . Oltaim bai mi sori tumas long yu na laikim yu tru na mekim gut long yu.” (Aisaia 54:6, 8) Jehova i bin mekim wanem bilong soim olsem em i stap gut long dispela lain bilong em yet?
Jehova yet i kirap na lukautim ol Israel long ol samting ol i mas kisim na em i helpim ol long pas gut wantaim em. Em i kisim bek ol long Isip, na mekim ol i kamap olsem lain bilong wanpela kantri, na bringim ol i go insait long “wanpela bikpela graun i gat planti gris na ol kaikai i save kamap gutpela tumas.” (Kisim Bek 3:8) Long rot bilong ol pris na ol Livai na ol profet, oltaim em i save skulim ol long ol samting bilong spirit. (2 Stori 17:7-9; Nehemia 8:7-9; Jeremaia 7:25) Taim lain bilong em i kirap lotuim ol narapela god, Jehova i stretim ol. Taim ol i tanim bel, em i lusim rong bilong ol. Tru, dispela lain i bin kamap olsem “meri” bilong em ol i no stap gut long em. Tasol Jehova i no kirap kwik na lusim ol, nogat. Em i tingim ol tok promis em i bin mekim long Abraham na em i pas strong wantaim dispela lain i go inap long taim laik bilong Em long ol i kamap tru olgeta. (Lo 7:7-9) Dispela em i gutpela piksa tru ol marit long nau i ken bihainim, a?
Jehova i save stap gut long ol narapela manmeri tu. Em i save givim ol samting long olgeta man inap long ol i ken i stap laip—ol stretpela man na ol man i no stret tu. (Matyu 5:45; Aposel 17:25) Na tu, em i bin givim Pikinini bilong em olsem ofa bilong baim bek ol man na bai ol i gat rot long lusim kalabus bilong sin na dai na kisim laip i stap gut oltaim long Paradais. (Matyu 20:28; Jon 3:16) Dispela ofa bilong baim bek ol man em i nambawan gutpela samting Jehova i bin mekim bilong lukautim laip bilong ol man. Tru tumas, dispela em i wanpela “wok bilong helpim man i gat hevi.”
Mekim Ol Wok Bilong Soim Olsem Yu Stap Gut Long Narapela
Pasin bilong stap gut long narapela em i olsem pasin bilong sori na mekim gutpela pasin long narapela. Sapos narapela i sori na mekim gutpela pasin long yu, i stret yu mas mekim wankain pasin long em tu, a? Na olsem tasol, sapos man i stap gut long yu, yu mas stap gut long em tu. Devit i kamapim klia olsem em i save gut long insait bilong tok cheʹsedh. Em i tok: “Mi brukim skru long pes bilong haus bilong yu na litimapim nem bilong yu.” Bilong wanem? “Long wanem, oltaim yu save laikim mi tru na yu save lukautim mi gut.” (Song 138:2) Jehova i laikim tru Devit, na dispela i kirapim Devit long lotuim Jehova na litimapim nem bilong Em. Orait olsem wanem? Taim yumi tingim ol samting Jehova i bin mekim bilong soim olsem em i laikim tru yumi, dispela i kirapim yumi long mekim wankain pasin long em tu? Sapos wanpela i bagarapim nem bilong Jehova, yu save tingim gutnem bilong em na yu kirap na mekim sampela tok bilong sambai long nem bilong em?
Kain samting olsem i bin kamap taim wanpela nupela Kristen wantaim meri bilong em ol i go long bung bilong planim wanpela wanblut i bin kisim bagarap long motabaik. Dispela i no wanpela bung bilong lotu, na ol man i kam long dispela bung ol i gat rot long stori long dispela man i dai pinis. Wanpela man i tok, em asua bilong God na dispela yangpela man i dai. Em i tok, ‘God i pinisim laip bilong em, long wanem, em i laik bai dispela man i stap long heven.’ Brata Kristen bilong yumi i no inap pasim maus. Em i go sanap long ples bilong mekim tok, maski em i no gat Baibel o hap pepa i gat sampela tok long en. Em i askim olsem: “Yu ting God bilong gutpela pasin sori na marimari na i gat olgeta strong, em i orait long samting i bin painim yangpela ya?” Orait nau em i kirap toktok i go inap 10-pela minit na em i kamapim sampela tok bilong Baibel i kamapim klia olsem i gat wanem as na yumi dai, na ol samting God i bin mekim bilong kisim bek ol man long indai, na ol man i dai pinis inap kirap bek na kisim laip oltaim long Paradais long graun. Ol 100 manmeri i kam bung ol i kirap paitim han i go longpela taim. Bihain, brata i stori long dispela taim na i tok: “Bel bilong mi i amamas tru—em samting mi no bin pilim bipo. Mi tok tenkyu long Jehova em i bin skulim mi long ol gutpela tingting na save bilong em, na em i bin givim rot long mi long sambai long nem holi bilong em.”
Bilong stap gut long Jehova, yumi mas stap gut long Baibel tu, em Tok bilong em. Bilong wanem? Long wanem, long rot bilong Baibel, Jehova i save skulim yumi long ol pasin yumi mas bihainim. Ol lo bilong en i gutpela tru na inap helpim gut yumi. (Aisaia 48:17) No ken larim ol narapela o ol samting yu yet yu no strong long en i pulim yu na yu no bihainim moa ol lo bilong Jehova. Stap gut long Tok Bilong God.
Na bilong i stap gut long God, yumi mas stap gut tu long oganaisesen bilong em. Long ol yia i go pinis ol i bin lukim olsem ol i mas stretim na kamapim klia moa tingting bilong yumi long sampela tok bilong Baibel. Tru tumas, i no gat narapela lain i kisim planti gutpela kaikai bilong spirit olsem yumi save kisim. (Matyu 24:45-47) Yes, Jehova i bin sambai na stap gut long oganaisesen bilong em long nau. Olsem na yumi tu i mas stap gut long dispela oganaisesen, a? A. H. Macmillan i bin mekim olsem. Taim em i laik dai, em i tok: “Taim mi gat 23 krismas, long Septemba 1900, mi dediket long God, na long dispela taim oganaisesen bilong Jehova i liklik tru. Tasol nau em i stap long olgeta hap na ol manmeri bilong en ol i stap amamas na givim bel tru long autim ol tok i tru bilong em. . . . Nau mi lukim olsem wok bilong God mi mekim hia long graun em i laik pinis, tasol mi bilip strong olsem Jehova i bin stiaim lain bilong em na givim ol samting long ol long taim stret bilong en.” Brata Macmillan i stap gut long mekim wok bilong God inap 66 yia, i go inap long taim em i dai long Ogas 26, 1966. Em i bin stap gutpela piksa long pasin bilong stap gut long oganaisesen bilong God long graun.
Yumi mas stap gut long oganaisesen bilong God, tasol yumi mas stap gut long ol narapela tu. Olsem wanem? Taim ol lain i laik mekim nogut tru long yumi, bai yumi stap gut long ol brata na sista bilong yumi? Long taim bilong Namba Tu Pait, ol brata bilong yumi long Netelan ol i stap gutpela piksa tru long pasin bilong i stap gut long ol brata sista. Wanpela elda long Kongrigesen Groningen, em Klaas de Vries, i bin kisim nogut long han bilong wanpela lain polis bilong Hitler ol i kolim Gestapo—ol i sutim planti askim long em, putim em i stap wanpis long wanpela rum inap 12-pela de na givim bret na wara tasol long em, na bihain ol i sutim gen ol askim long em. Ol i makim gan long em na tokim em, sapos insait long tupela minit em i no kamapim ples ol brata i holim bikpela wok ol i stap long en, na kamapim ol narapela bikpela samting ol i laik save long en, orait ol bai kilim em i dai. Klaas i mekim dispela tok tasol: “Mi no ken tokim yu. . . . Mi no ken kamapim ol brata bilong mi.” Inap 3-pela taim ol i holim gan na tok long kilim em i dai. Bihain Gestapo i les na lusim em, na ol i salim Klaas i go stap long narapela kalabus. Em i no kamapim ol brata bilong em long ol birua.
Olsem wanem? Bai yumi stap gut long poroman marit bilong yumi? Olsem Jehova i bin stap gut long kontrak em i mekim wantaim lain Israel, bai yumi stap gut long tok promis bilong marit yumi bin mekim? Yumi mas stap gut long poroman marit bilong yumi, tasol i no dispela samting tasol. Yumi mas mekim sampela samting bilong pas gut wantaim em. Yu yet mas kirap na mekim sampela wok bilong strongim marit bilong yu. Lusim hap taim bilong bung wantaim, toktok wantaim, helpim na strongim bel bilong em, putim yau long tok bilong em, lap wantaim, krai wantaim, kisim amamas wantaim, wok wantaim bilong kamapim sampela wok bilong helpim yutupela yet, stap pren wantaim. Na was gut tru. Nogut bel i kirap na yu kirap laikim narapela em yu no marit long em. Tru, i no gat rong long kamap pren wantaim narapela na i stret yu ken mekim olsem, tasol bel i no ken kirap long em—bel i mas kirap long poroman marit bilong yu tasol. No ken larim narapela i mekim na yu no pas moa wantaim poroman.—Sindaun 5:15-20.
Stap gut long ol wanbilip na famili. Taim ol yia i kamap na i go pinis, no ken lusim tingting long ol. Raitim pas, telefon, o go lukim ol. Maski yu stap we o yu stap olsem wanem, wok strong na bai yu no ken mekim ol i bel hevi. Mekim ol samting na bai ol i amamas long tok ol i save long yu o ol i famili bilong yu. Pasin bilong stap gut long ol bai strongim yu long mekim ol pasin i stret na dispela bai strongim bel bilong yu.—Esta 4:6-16.
Tru tumas, man i stap gut long narapela em i save kirap na mekim sampela wok bilong strongim gutpela pasin pren i stap namel long em na ol narapela. Mekim ol samting yu inap mekim bilong bekim ol gutpela pasin sori Jehova i bin mekim long yu. Bihainim pasin bilong Jehova na stap gut long ol brata sista long kongrigesen Kristen, na poroman marit, na famili, na ol pren. Tokim ol man i sindaun klostu long yu long ol gutpela pasin bilong Jehova. Man bilong raitim Song i tok: “Bikpela, oltaim bai mi singim song i tok long sori bilong yu. Long olgeta taim bai mi tokaut long yu no save senisim tok bilong yu.” (Song 89:1) Yumi laik go klostu tru long kain God olsem, a? Tru tumas, “oltaim em i save laikim yumi tru.”—Song 100:5.
[Piksa long pes 23]
A. H. Macmillan