Yu Ting i Gat Rot Bilong God i Kisim Bek Yumi?
Wanpela nius i tok taim bilong yumi em i taim nogut bilong pait na kapsaitim blut bilong man, winim olgeta taim bipo. Pasin raskol, pait, birua long ol man bilong narapela lain, kisim drak, paulim ol samting, na bagarapim man, ol dispela pasin i kamap bikpela tru. Na tu, sik, lapun, na indai i givim bikpela pen na hevi long ol man. Yumi olgeta i laik kamap fri long ol dispela bikpela hevi, a? Taim yumi tingim taim bihain, yumi laik save olsem i gat rot bilong God i kisim bek yumi o nogat?
TINGIM dispela piksa olsem driman em aposel Jon i bin lukim olsem 2,000 yia i go pinis. Em i tok: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Profet Aisaia tu em i bin tok profet olsem: “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri. . . . Bikpela i tok pinis long mekim olsem.”—Aisaia 25:8.
Tingim ol gutpela samting bai kamap taim ol tok promis bilong God i kamap tru! Bai i no gat moa pasin bilong mekim nogut long wanpela lain, na ol samting i save kamapim pen na hevi. Tingim! Sik, lapun, na indai bai pinis olgeta! Baibel, em Tok Bilong God, i tok promis long ol man inap kisim laip oltaim long graun na sindaun bilong ol bai kamap gutpela olgeta. (Luk 23:43; Jon 17:3) Wanem man i laik, em i gat rot long kisim dispela gutpela samting. “[God] i laik kisim bek olgeta manmeri, bai ol i ken save long as bilong tok tru.”—1 Timoti 2:3, 4.
Tasol sapos yumi laik bai ol tok promis bilong God i ken helpim yumi, orait pastaim yumi mas save gut long wok Jisas Krais i mekim bilong kisim bek yumi na yumi mas bilip long em. Jisas yet i bin tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Aposel Pita i stori long bikpela wok Jisas Krais i mekim bilong kisim bek yumi na em i tok: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:12) Aposel Pol na wanwok bilong em, Sailas, ol i tokim wanpela man: “Yu mas bilip long Bikpela Jisas, na bai God i kisim bek yu wantaim ol lain bilong yu, na bai yupela i bilong em.”—Aposel 16:30, 31.
Yes, Jisas Krais em i “namba wan man bilong bringim yumi long rot bilong laip,” na long rot bilong em tasol God inap kisim bek yumi. (Aposel 3:15) Tasol olsem wanem na wanpela man inap kamap nambawan rot bilong kisim bek yumi? Sapos yumi save gut long dispela wok em i mekim, dispela inap strongim yumi long wetim God i kisim bek yumi.
[Ol Piksa Kredit Lain long pes 2]
Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo