Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Nambawan bikpela kot bilong Jemani i bin helpim husat long winim wanpela kot bilong lotu?
Dispela kot i senisim tok bipo narapela kot i bin pasim na tok nogat long ol Witnes long kamap wanpela koporesen bilong pablik-lo. Kot ol i winim i tok olsem ol lotu i stap fri long mekim lotu na ‘bihainim ol bilip bilong lotu’ na putim i go pas long ol lo bilong gavman.—8/15, pes 8.
• Jop i bin karim hevi inap long taim o olsem wanem?
Buk Jop i no stori olsem em i bin karim hevi inap planti yia. Dispela hevi bilong Jop na gutpela samting i kamap long en, dispela i kamap insait long sampela mun, ating i no winim wanpela yia.—8/15, pes 31.
• Olsem wanem yumi ken save tru olsem Satan em i no wanpela bilip kranki bilong ol tumbuna tasol?
Jisas Krais i save olsem Satan i stap tru. Wanpela man tru i bin traim em na i no samting nogut i stap insait long Jisas yet. (Matyu 4:1-11; Jon 8:44; 14:30)—9/1, pes 5-6.
• Sindaun 10:15 i tok: “Ol planti samting bilong ol maniman i banisim ol na ol i stap gut, olsem taun i gat strongpela banis. Tasol ol rabisman i sot long ol samting, olsem na bai ol i bagarap.” Olsem wanem dispela tok i stret?
Planti mani i save lukautim man na i gat sampela hevi i no save painim em, olsem wanpela taun i gat strongpela banis i save helpim ol man bilong en long i stap gut na stap bel isi liklik. Na sapos man i stap rabis na taim nogut i painim em, dispela inap bagarapim em tru.—9/15, pes 24.
• Olsem wanem “ol man i stat long kolim nem bilong Bikpela” long taim bilong Enos? (Stat 4:26)
Ol man i mekim wok long nem bilong God kirap long taim God i wokim Adam na Iv; olsem na taim ol manmeri long taim bilong Enos i kolim nem bilong Jehova, ol i no mekim olsem long pasin bilong bilip na lotu i tru. Ating sampela man i bin givim nem bilong Jehova long ol yet o long sampela man, i olsem rot bilong ol long giaman long lotuim God.—9/15, pes 29.
• Long Baibel, dispela tok “stretim” i gat wanem insait bilong en?
Dispela tok i no makim pasin bilong paitim strong o mekim nogut long man. (Sindaun 4:13; 22:15) Tok Grik ol i tanim olsem “stretim,” planti taim em i makim pasin bilong skulim, givim save, na stretim pikinini, na sampela taim ol i mas givim strongpela tok long em, tasol ol i mas mekim long pasin sori. Wanpela bikpela rot ol papamama inap bihainim pasin bilong Jehova em long larim rot i op long toktok gut wantaim ol pikinini bilong ol. (Hibru 12:7-10)—10/1, pes 8, 10.
• Olsem wanem ol Kristen tru i kamapim olsem ol i laikim wok bos bilong God?
Bilong helpim wok bilong Kingdom bilong God, ol Witnes Bilong Jehova i no save insait long ol wok politik o kirapim ol man long bikhet long ol gavman—maski long sampela hap ol i tambuim wok bilong ol Witnes. (Taitus 3:1) Ol i bihainim pasin bilong Jisas na ol disaipel bilong em na ol i wok strong long helpim ol man long kisim ol gutpela pasin em Baibel i as bilong en, olsem tok tru, stretpela pasin, na mekim gut wok.—10/15, pes 6.
• Olsem wanem wara bilong givim laip i go long Andes?
Ol Witnes Bilong Jehova long dispela hap i taitim bun long kisim tok i tru i go long ol man, na ol i mas mekim olsem long tupela tok ples em Kesua na Aimara. Ol Witnes i go lukim ol man i stap long ol ailan i stap long raunwara ol i kolim raunwara Titicaca, na long ol liklik ailan i “drip” long dispela wara, em ol i bin wokim long wanpela kain pitpit i save kamap long raunwara.—10/15, pes 8-10.
• God i givim wanem samting bilong stiaim yumi na em i wankain olsem kompiuta bilong stiaim ron bilong ol balus bilong nau?
God i wokim ol manmeri na bai ol inap tingim wanem pasin i stret o i no stret. Dispela samting em maus bilong bel. (Rom 2:14, 15)—11/1, pes 3-4.
• Bilong wanem indai bilong Jisas i gat bikpela pe?
Adam em i gutpela man olgeta na taim em i mekim sin em i dai na olgeta pikinini bilong em tu i kisim hevi bilong i dai. (Rom 5:12) Jisas em i gutpela man olgeta, na em i lusim laip bilong em bilong baim bek ol manmeri na dispela i opim rot bilong ol manmeri i ken kisim laip i stap gut oltaim.—11/15, pes 5-6.
• Lain Sitia em Kolosi 3:11 (NW ) i toktok long en, ol i husat?
Lain Sitia ol i tripman, bilong ol ples kunai long saut-is bilong Yurop na Esia long yia 700 i go 300 B.C.E. Ol i hapman bilong raun long ol hos na bilong pait. Ating tok bilong Kolosi 3:11 i no makim stret olsem ol i wanpela lain, tasol em i makim ol olsem ol welman.—11/15, pes 24-25.
• Olsem wanem na yumi ken tok dispela lo Jisas i kolim long Matyu 7:12 em i samting yumi mas tingim long olgeta taim?
Lotu Juda, na lotu Buda, na ol saveman bilong ol Grik, na tok bilong Konfusas, ol tu i bin kolim kain lo olsem. Tasol dispela lo Jisas i kolim antap long maunten em i bilong kirapim ol manmeri long mekim gutpela wok, na em samting bilong olgeta lain long olgeta hap, maski ol i bin stap long wanem wanem taim. (Matyu 7:12)—12/1, pes 3.