Askim

Yu ting sin i stap long skin bilong nupela meri Maria i nogutim Jisas taim em i kamap long bel bilong Maria?

Baibel i stori long taim ‘Jisas i kamap’ olsem: “Mama bilong en, Maria, ol i makim em pinis bilong maritim Josep. Tasol taim tupela i no i stap wantaim yet, ol i lukim Maria i gat bel. Holi Spirit tasol i bin mekim na Maria i gat bel.” (Matyu 1:18) Tru tumas, spirit holi bilong God i mekim na Maria i kisim bel.

Tasol olsem wanem long Maria? Kiau bilong bel bilong em i mekim sampela wok na bai em i ken kisim bel? Taim yumi tingim tok promis God i mekim long Abraham, Aisak, Jekop, Juda, na King Devit​—⁠em ol tumbuna papa bilong Maria⁠—dispela pikinini Maria i karim i mas i stap olsem wanpela tumbuna pikinini tru bilong ol. (Stat 22:18; 26:24; 28:​10-14; 49:10; 2 Samuel 7:16) I no gat narapela rot long ol dispela tok promis bilong God inap kamap tru long pikinini Maria i karim, a? Em i mas i stap olsem pikinini tru bilong Maria.​—⁠Luk 3:​23-34.

Ensel bilong Jehova i kamap long nupela meri Maria, na i tok: “Maria, yu no ken pret. God em i belgut tru long yu. Harim. Yu bai kisim bel na karim wanpela pikinini man. Na yu mas kolim nem bilong en Jisas.” (Luk 1:​30, 31) Bilong meri inap kisim bel, kiau bilong em i mas kisim laip. God Jehova i mekim na kiau bilong Maria i kisim laip. Em i kisim laip bilong dispela wanpela Pikinini bilong em i stap long heven na putim i go daun long graun.​—⁠Galesia 4:⁠4.

Olsem wanem? Sapos wanpela pikinini i kisim laip long bel bilong meri i gat sin, dispela pikinini inap kamap gutpela olgeta na sin i no stap long skin bilong em? Sapos papa i gutpela olgeta na mama i gat sin, olsem wanem long ol lo i stap long skin bilong ol man olsem pikinini bai kisim ol samting long papamama? Tingim olsem God i mekim wok long spirit holi bilong kisim laip bilong Pikinini bilong em i gutpela olgeta na putim long bel bilong Maria. Dispela i daunim strong bilong sin i stap long bel bilong Maria, olsem na kirap long taim pikinini i kisim laip ol jin samting bilong em i gutpela olgeta.

Tasol maski Maria i kisim bel long wanem rot, yumi ken save tru olsem wok em spirit holi bilong God i mekim long dispela taim i lukautim ol samting na laik bilong God i kamap. Ensel Gebriel i tokim Maria olsem: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.” (Luk 1:35) Em nau, kirap long taim Maria i kisim bel, i olsem spirit holi bilong God i bin kamapim wanpela banis na bai sin na ol samting nogut i no inap nogutim pikinini i wok long kamap long bel.

Tru tumas, Papa bilong Jisas long heven i mekim na em i kamap man i gutpela olgeta, i no wanpela man i as bilong dispela. Jehova i “redim wanpela bodi” long em, na kirap long taim em i kisim laip long bel bilong Maria, Jisas i ‘klin olgeta na em i stap longwe tru long ol man bilong mekim sin.’​—⁠Hibru 7:26; 10:⁠5.

[Piksa long pes 19]

“Yu bai kisim bel na karim wanpela pikinini man”